Agsagana a Naimbag iti Panangisuro
1. No mangyad-adaltayo iti Biblia, apay a masapul nga ipamaysatayo a tulongan ti estudiante a mangapresiar kadagiti maad-adalna?
1 No mangyad-adaltayo iti Biblia, masapul a nakasaganatayo a naimbag tapno matignay ti estudiante nga agserbi ken Jehova. Nasayaat ti resulta dagiti panagreggettayo no tulongantayo ti iyad-adalantayo a mangapresiar kadagiti maad-adalna manipud iti Biblia. Dayta ti manggutugot met kenkuana. (Deut. 6:5; Prov. 4:23; 1 Cor. 9:26) Kasanotayo a maaramid dayta?
2. Kasano a makatulong ti kararag iti nasayaat a panagsagana?
2 Agkararag Bayat ti Panagsagana: Yantangay ni Jehova ti mangpadakkel iti bin-i ti kinapudno iti puso ti estudiante, maitutop a no agsaganatayo ket espesipiko nga ikararagtayo ti maipapan iti estudiante ken dagiti partikular a kasapulanna. (1 Cor. 3:6; Sant. 1:5) Ti kasta a kararag matulongannatayo met a mangikeddeng no ania pay ti aramidentayo tapno mapno ti pusona “iti umiso a pannakaammo” maipapan iti pagayatan ni Jehova.—Col. 1:9, 10.
3. Kasanotayo nga ikabilangan dagiti kasapulan ti iyad-adalantayo bayat ti panagsaganatayo?
3 Ikabilangan ti Iyad-adalan: Ammo ni Jesus a ti epektibo a panangisuro ramanenna ti panangikabilangan kadagiti dumdumngeg. Namindua a nayimtuod ken Jesus ti isu met laeng a saludsod. “Babaen ti panangaramidko iti ania a matawidko ti agnanayon a biag?” Iti tunggal isusungbatna, isu ket nagusar iti nagduduma a pamay-an. (Luc. 10:25-28; 18:18-20) Masapul a panunotentayo no ania dagiti kasapulan ti iyad-adalantayo bayat ti panagsaganatayo. Ania kadagiti naisitar a teksto ti ipabasatayo kenkuana? Kasano kaadu nga impormasion ti saklawentayo? Ania dagiti punto a mabalin a narigat a tarusan wenno awaten ti estudiante? No saganaantayo ti dadduma a saludsod a mabalin nga iyimtuodna, ad-adda a nakasaganatayo a mangipaay iti epektibo a sungbat.
4. Ania ti ramanen ti nasayaat a panagsagana?
4 Repasuen ti Material: Uray no namin-adun a naadaltayo ti material, daytoy ti umuna a gundaway nga ilawlawagtayo dayta iti iyad-adalantayo. Tapno madanontayo ti pusona, napateg nga agsaganatayo a naimbag para iti tunggal panagadal. Kayatna a sawen, aramidentayo no ania ti iparparegtatayo nga aramiden ti iyad-adalantayo. Repasuentayo ti material agraman dagiti naisitar a teksto bayat a sipapanunottayo iti estudiante, ken nalabit ugedantayo dagiti napateg a punto.—Roma 2:21, 22.
5. Kasanotayo a matulad ni Jehova?
5 Maseknan unay ni Jehova iti panagrang-ay ti tunggal estudiante iti Biblia. (2 Ped. 3:9) No iwayaantayo ti agsagana para iti tunggal panagadal, iparparangarangtayo ti kasta met laeng a pannakaseknan.