Annadanyo
Panangikondukta Kadagiti Progresibo a Panagadal iti Biblia
Daytoy a suplemento ket pakagupgopan dagiti napateg a punto manipud kadagiti serye dagiti artikulo a panangikondukta kadagiti progresibo a panagadal iti Biblia a masarakan iti Ti Ministeriotayo iti Pagarian. Maiparegta kadagiti amin nga annadanda daytoy a suplemento ken usarenda daytoy no mangikonduktada kadagiti panagadal iti Biblia. Maysa pay, dagiti punto iti daytoy a suplemento ket mabalin a pagsasaritaan bayat dagiti taripnong sakbay ti panangasaba, ken dagiti manangaywan iti serbisio mabalinda nga usaren daytoy kas pakaibatayan dagiti palawagda no sumarungkarda kadagiti grupo ti panagadal iti libro.
Paset 1: Ania ti Panagadal iti Biblia?
No regular ken sistematiko ti pannakisaritayo maipapan iti Biblia, uray apagbiit, nga us-usarenyo ti Biblia wenno ti maysa kadagiti nairekomenda a publikasion, mangikonkonduktakayon iti panagadal iti Biblia. Mabalin nga ireport ti panagadal no naminduan a naikondukta kalpasan ti pannakaidemostrana ken no adda pamatianyo nga agtultuloy ti panagadal.—km 7/04 p. 1.
Dagiti Mairekomenda a Publikasion
◼ Ania ti Kalikaguman ti Dios Kadatayo?
◼ Pannakaammo a Mangiturong iti Biag nga Agnanayon
◼ Agdayawkayo iti Maymaysa a Pudno a Dios
◼ Ti Mabalinmo ti Makigayyem iti Dios! ket mabalin nga iyadal kadagiti tattao a nakapuy nga agbasa wenno addaan iti limitado nga edukasion.
Paset 2: Panagsagana a Mangikondukta iti Panagadal
Nasken nga idatagtayo ti impormasion iti wagas a manggutugot iti puso ti iyad-adalantayo. Kasapulan ti naan-anay a panagsagana ken panangikabilangan kadagiti kasapulan dagiti iyad-adalantayo.—km 8/04 p. 1.
No Kasano ti Agsagana
◼ Usigem ti paulo, subtitulo, ken aniaman a ladawan iti kapitulo wenno leksion.
◼ Kitaem ti sungbat dagiti saludsod, a markaam laeng dagiti kangrunaan a sasao ken grupo dagiti sasao.
◼ Ikeddengmo no ania dagiti teksto a basaenyo bayat ti panagadal. Isuratmo iti ababa dagiti napateg a punto iti pingir ti mapagadalan a publikasion.
◼ Mangisaganaka iti ababa a repaso dagiti kangrunaan a punto.
Ibagaymo ti Leksion iti Kasasaad ti Iyad-adalam
◼ Ikararagmo ti maipapan iti iyad-adalam ken dagiti kasapulanna.
◼ Panunotem no ania dagiti posible nga isaludsod ti estudiante ken dagiti punto a nalabit narigatna a tarusan wenno akseptaren.
◼ Usigem: Ania ti nasken a tarusan wenno aramidenna tapno rumang-ay iti naespirituan? Kasanok a madanon ti pusona?
◼ No kasapulan, mangisaganaka iti ilustrasion, panunotem no kasano nga ilawlawag dagiti bambanag, wenno mangibangonka kadagiti saludsod a tumulong iti iyad-adalam a mangtarus iti kaipapanan ti maysa a punto wenno teksto.
Paset 3: Epektibo a Panangusar iti Kasuratan
Ti panggeptayo a mangikondukta kadagiti panagadal iti Biblia ket tapno ‘mangaramid iti ad-adalan’ babaen ti panangtulong kadagiti tattao a mangtarus ken mangawat iti sursuro ti Sao ti Dios ken mangipakat kadagita iti panagbiagda. (Mat. 28:19, 20; 1 Tes. 2:13) Gapuna, ti panagadal ket naisentro koma iti Kasuratan.—km 11/04 p. 8.
Mangisuro Manipud iti Sao ti Dios
◼ Ipakitam iti iyad-adalam no kasano a biroken dagiti espesipiko a teksto iti bukodna a kopia iti Biblia.
◼ Kitaen ken pagsaritaanyo dagiti teksto iti Biblia a mangipakita iti Nainkasuratan a pakaibatayan dagiti patpatientayo.
◼ Agusarka kadagiti saludsod. Imbes nga ilawlawagmo iti iyad-adalam dagiti teksto iti Biblia, pailawlawagmo dagita kenkuana.
◼ Pagtalinaedem a simple. Saanmo nga ilawlawag ti amin nga aspeto ti maysa a teksto. Dakamatem laeng daydiay kasapulan tapno mailawlawag ti punto.
◼ Mangtedka iti praktikal nga aplikasion. Tulongam ti iyad-adalam a mangkita no kasano nga agaplikar kenkuana dagiti teksto iti Biblia.
Paset 4: Panangsanay Kadagiti Estudiante nga Agsagana
Alisto a rumang-ay iti naespirituan ti estudiante a mangbasa a nasaksakbay iti leksion, manguged kadagiti sungbat, ken mangpanunot no kasano nga iyebkasna dagita iti bukodna a sasao. Gapuna, no naipasdeken ti regular a panagadal, duakayo a mangisagana iti leksion tapno maipakitayo iti iyad-adalanyo no kasano ti agsagana. Iti kaaduan a mayad-adalan, makatulong no duakayo a mangisagana iti intero a kapitulo wenno leksion.—km 12/04 p. 1.
Pananguged ken Panaginotar
◼ Ilawlawagmo no kasano a biroken dagiti direkta a sungbat dagiti nakaimprenta a saludsod.
◼ Ipakitam iti iyad-adalam ti bukodmo a kopia ti publikasion a pagad-adalanyo a dagiti laeng kangrunaan a sasao ti inugedam.
◼ Tulongam ti estudiante a mangkita a ti tunggal naisitar a teksto pasingkedanna ti punto iti parapo, ken ipakitam kenkuana no kasano ti aginotar iti ababa iti pingir ti panid ti ad-adalenyo a publikasion.
Panangkita iti Pakabuklan ti Leksion ken Panangrepaso
◼ Ipakitam iti estudiante no kasanona nga usigen ti paulo ti kapitulo wenno leksion, dagiti subtitulo, ken ilustrasion sakbay nga irugina ti detalyado a panagsaganana.
◼ Paregtaem ti estudiante a repasuenna dagiti kangrunaan a punto iti ngudo ti panagsaganana.
Paset 5: Panangikeddeng No Kasano Kaadu ti Material a Saklawen
Ti kaadu ti material a mausig ket agpannuray iti abilidad ken kasasaad ti mangyad-adal ken ti mayad-adalan.—km 1/05 p. 1.
Mangbangon iti Natibker a Pammati
◼ Napatpateg ti panangtulongtayo iti estudiante tapno matarusanna a naimbag ti leksion imbes a mangsaklaw iti nakaad-adu a material iti ababa a tiempo.
◼ Busbosem ti uray mano a minuto a kasapulan tapno matulongam ti estudiante a mangtarus ken mangawat kadagiti masursurona.
◼ Mangilatangka iti umdas a tiempo a mangusig kadagiti napateg a teksto a nakaibatayan dagiti isursurom kenkuana.
Agtalinaedka iti Tema
◼ No adu ti kayat nga ibaga ti estudiante maipapan kadagiti personal a bambanag, mabalin a pagsaritaanyo dagita kalpasan ti panagadal.
◼ Saan nga adu unay ti ibagam kabayatan ti panagadal. Limitaram ti panangiraman kadagiti kanayonan a punto wenno kapadasan tapno saan a malapdan ti pananggun-od ti estudiante iti umiso a pannakaammo maipapan kadagiti pamunganayan a sursuro ti Biblia.
Paset 6: No Agsaludsod ti Estudiante
No naipasdeken ti panagadal iti Biblia, gagangay a kasayaatan no naurnos ken agsasaruno ti panangusigyo kadagiti sursuro ti Biblia imbes a laktalaktawanyo dagiti topiko. Tumulong daytoy iti estudiante tapno adda pangibatayanna iti umiso a pannakaammo ken tapno rumang-ay iti naespirituan.—km 2/05 p. 6.
Agbalinka a Mannakaawat
◼ Mabalin a sungbatan a dagus dagiti saludsod a mainaig iti maad-adal a material.
◼ Mabalin nga usigen iti sabali a gundaway dagiti saludsod nga awan pakainaiganna iti maad-adal a material wenno agkasapulan iti panagsukimat. Makatulong no isuratmo dagita a saludsod.
◼ No marigatan ti estudiante a mangakseptar iti maysa a sursuro, mangusigkayo iti kanayonan a material a naan-anay a mangilawlawag iti topiko.
◼ No saan latta a kombinsido ti estudiante, pagsaritaanyonto ti topiko iti sabali a gundaway sa ituloyyo pay laeng ti panagadal.
Agbalinka a Naemma
◼ No saanmo nga ammo ti sungbat ti maysa a saludsod, saanka a mangted iti opinion.
◼ In-inut nga isurom ti estudiante no kasano ti agsukimat.
Paset 7: Panagkararag Sakbay ken Kalpasan ti Panagadal
Tapno rumang-ay iti naespirituan dagiti iyad-adalantayo iti Biblia, nasken ti pamendision ni Jehova. Maitutop ngarud ti agkararag sakbay ken kalpasan ti panagadal.—km 4/05 p. 8.
No Kaano a Mayanatup ti Agkararag
◼ Kadagidiay relihioso a tattao, masansan a mabalin nga isingasing ti panagkararag iti damo pay laeng a panagadal.
◼ Kadagiti dadduma, nasken a tingitingentayo no kaano a mayanatup ti agkararag.
◼ Mabalin nga usaren ti Salmo 25:4, 5 ken 1 Juan 5:14 a mangilawlawag no apay a nasken ti agkararag.
◼ Mabalin nga usaren ti Juan 15:16 a mangipakita no apay a rumbeng ti panagkararag ken ni Jehova babaen ken ni Jesu-Kristo.
No Ania ti Mabalin nga Ikararag
◼ Maitutop nga idaydayawtayo ni Jehova kas Gubuayan dagiti banag a masursurotayo.
◼ Iyebkasmo ti napasnek a pannakaseknam iti iyad-adalam.
◼ Iyebkasmo ti apresasion iti organisasion nga us-usaren ni Jehova.
◼ Kiddawem a bendisionan ni Jehova ti panangikagumaan ti iyad-adalam a mangyaplikar kadagiti maad-adalna.
Paset 8: Panangiturong Kadagiti Estudiante iti Organisasion
Ti panggeptayo a mangyadal iti Biblia ket saan laeng a tapno mangisuro kadagiti doktrina no di pay ket tapno tulongan dagiti iyad-adalantayo nga agbalin a paset ti kongregasion Kristiano. Mangbusboskayo iti sumagmamano a minuto a mangiranud iti impormasion maipapan iti organisasion ni Jehova.—km 5/05 p. 1.
Dagiti Gimong ti Kongregasion
◼ Ilawlawagmo ti tunggal gimong ti kongregasion. Iti damo pay laeng a panagadalyo, awisem idan a tumabuno.
◼ Iranudmo dagiti napateg a punto a naidatag kadagiti gimong.
◼ Parayrayem ti panangseggana iti Memorial, dagiti asamblea, ken ti ibibisita ti manangaywan iti sirkito.
◼ Usarem dagiti retrato kadagiti publikasiontayo tapno mailadawanda iti panunotda no ania ti maar-aramid.
◼ Paregtaem ida a mangbasa iti broshur a Dagiti Saksi ni Jehova—Siasinoda? Ania ti Patpatienda?
Usarenyo Dagiti Video a Mangparayray iti Apresasion
◼ Jehovah’s Witnesses—The Organization Behind the Name
◼ Our Whole Association of Brothers
◼ United by Divine Teaching
◼ To the Ends of the Earth
Paset 9: Panangisagana Kadagiti Estudiante a Mangasaba iti Di Pormal
No dagiti iyad-adalantayo iti Biblia ket mamatida iti masursuroda, matignayda a mangisarsarita iti dayta.—km 6/05 p. 1.
Paregtaem Ida a Mangasaba
◼ Adda kadi gagayyem ken kameng ti pamiliana a maawisna a makiraman iti panagadal?
◼ Adda kadi katrabahuan, kaeskuelaan, wenno dadduma pay nga am-ammona a nangipakita iti interes?
Sanayem Ida a Mangiranud Kadagiti Patpatienda
◼ Kadagiti napili a punto bayat ti panagadal, isaludsodmo iti iyad-adalam, “Kasanom nga usaren ti Biblia a mangilawlawag iti daytoy a kinapudno iti pamiliam?”
◼ Tulongam ti estudiante a mangtarus iti kinapateg ti panagbalin a nadayaw ken naanus no isarsaritana kadagiti sabsabali ti maipapan iti Dios ken dagiti panggepna.
◼ Ti broshur a Dagiti Saksi ni Jehova—Siasinoda? Ania ti Patpatienda? ket mabalin nga usaren dagiti estudiante a tumulong kadagiti gagayyem ken kameng ti pamiliada a mangtarus kadagiti naibatay iti Biblia a patpatien ken aktibidadtayo.
Paset 10: Panangsanay Kadagiti Estudiante iti Ministerio a Panagbalaybalay
No maikeddeng dagiti panglakayen a ti mayad-adalan iti Biblia ket kualipikadon nga agbalin kas di bautisado nga agibumbunannag, mabalinnan ti makiraman iti kongregasion iti trabaho a panangasaba iti publiko.—km 7/05 p. 1.
Agsaganakayo a Dua
◼ Ipakitam iti estudiante no sadino ti pakasarakanna kadagiti singasing a presentasion.
◼ Tulongam a mangpili iti simple nga introduksion a praktikal iti lokal a teritoria.
◼ Paregtaem ti estudiante a mangusar iti Biblia iti ministeriona.
◼ Agensayokayo a dua. Ipakitam kenkuana no kasano ti sitataktika a panangsungbat kadagidiay gagangay nga ibagbaga dagiti tattao.
Agkaduakayo a Mangasaba
◼ Bay-am a paliiwen ti estudiante ti panangidatagmo iti presentasion nga insaganayo a dua.
◼ Ikabilangam ti personalidad ken abilidad ti estudiante. Iti dadduma a kaso, mabalin a kasayaatan no bay-am a mangidatag iti bassit laeng a paset ti presentasion.
◼ Tulongam ti baro nga agibumbunannag a mangipasdek iti regular nga eskediul a makiraman iti ministerio.
Paset 11: Panangtulong Kadagiti Estudiante a Mangaramid Kadagiti Panagsarungkar
Ti panagsagana para iti panagsarungkar ket mangrugi iti damo nga ibibisita. Paregtaenyo ti estudiante a maaddaan iti napasnek nga interes kadagidiay makasaritana. In-inut a sanayenyo ti kabbaro nga agibumbunannag a mangawis kadagiti bumalay a mangyebkas kadagiti kapanunotanda, dumngeg kadagiti komentoda, ken mangpaliiw kadagiti banag a pakaseknanda.—km 8/05 p. 1.
Panagsagana nga Agsarungkar
◼ Lagipenyo ti damo
nga ibibisitayo, ken ipakitam iti estudiante no kasano ti mangpili iti topiko a paginteresan ti bumalay.
◼ Duakayo a mangisagana iti ababa a presentasion a mangitampok iti maysa a teksto ti Biblia agraman ti maysa a parapo iti publikasion.
◼ Mangisaganaka iti saludsod a mabalin nga iyimtuod iti ngudo ti saritaan.
Agsarungkar a Siaanep
◼ Paregtaem ti iyad-adalam a mangsarungkar a dagus kadagiti amin a mangipakita iti interes.
◼ Tulongam ti estudiante a mangtarus a nasken ti panangikagumaan a mangdanon kadagidiay saan a madandanon kadagiti pagtaenganda.
◼ Isurom iti baro nga agibumbunannag no kasano ti makitulag para iti panagsarungkar, ken tulongam a mangtarus a nasken ti panagsubli no inkarina ti agsubli.
Paset 12: Panangtulong Kadagiti Estudiante a Mangirugi ken Mangikondukta Kadagiti Panagadal iti Biblia
Napateg ti panangtuladmo ken ni Jesus babaen ti panangipakitam iti nasayaat nga ulidan iti ministeriom. Bayat a palpaliiwennaka ti iyad-adalam, matarusanna a ti panggep dagiti panagsarungkar ket ti panangirugi kadagiti panagadal iti Biblia.—km 9/05 p. 1.
Panangitukon iti Panagadal iti Biblia
◼ Ilawlawagmo iti iyad-adalam a saan a kasapulan nga ibaga amin a detalye ti panagadal.
◼ Masansan a kasayaatan no idemostra laeng ti panagadal babaen ti panangilawlawag iti maysa wenno nalabit dua a parapo iti mapagadalan a publikasion.
◼ Repasuen ken ensayuenyo ti maysa kadagiti singasing iti panangirugi kadagiti panangyadal iti Biblia.—km 8/05 p. 4; km 5/02 p. 6.
Panangsanay Kadagiti Estudiante nga Agbalin a Mannursuro
◼ Paregtaem dagiti iyad-adalam nga agpasalista iti Teokratiko nga Eskuelaan ti Panagministro.
◼ Awisem dagiti kabbaro nga agibumbunannag a kumuyog kenka kadagiti panangyadal iti Biblia, a mabalin mangted kadakuada iti gundaway a maaddaan iti bassit a paset iti panangisuro.