Agsaganakayo a Mangadal iti Padto ni Isaias!
1 “Mainanama dagiti matalek nga agdaydayaw a ni Jehova . . . dinanto ipalubos nga agtalinaed ti lubong ni Satanas iti uray maysa nga aldaw a napapaut ngem iti kalikaguman ti hustisia.” Anian a makaparegta a sasao! Sadino a naadaw dayta? Iti Padto ni Isaias—Lawag nga Agpaay iti Sangatauan I. Adda aya panggapuantayo a maaddaan iti kasta a makapabileg a konklusion iti padto ni Isaias? Wen! Iti dayta a libro ti Biblia, silalawag a naipaganetget a naimbag ti maipapan iti pannakaisalakan. (Isa. 25:9) Dayta ti gapuna a makaparegta unay kadatayo ti panangadal iti daytoy a paset ti Sao ti Dios iti Panagadal iti Libro ti Kongregasion. Addatayto kadi sadiay a linawas a mangtagiragsak iti dayta? Apay nga aramidentayo dayta?
2 Iti Isaias 30:20, naawagan ni Jehova kas “Naindaklan a Manangisuro[tayo].” Rumbeng a dumngeg a naimbag ti tunggal Kristiano bayat nga isuronatayo ni Jehova babaen ti Saona ken kadagiti naibasar iti Biblia a publikasion nga ipapaay ti “matalek ken masirib nga adipen.” (Mat. 24:45; Isa. 48:17, 18) Pudno unay daytoy no maipapan iti libro a Padto ni Isaias I. Kasano a magunggonaankayo a naan-anay a mangadal iti dayta?
3 Agsaganakayo Tapno Makipaset: Mangilasinkayo iti nawadwad a panawen kada lawas nga agsagana iti panagadal iti libro. Basaenyo amin a naituding a parapo. Utobenyo ti kada naimaldit a saludsod. Markaanyo dagiti sungbat iti libroyo. Naisurat iti napupuskol a letra dagiti naadaw a bersikulo iti Isaias. Basaenyo a nalaing dagitoy. Anagenyo no kasano a nainaig iti material dagiti dadduma a naisitar a kasuratan. Mennamennaenyo dagiti maad-adalyo. Kalpasanna, iranudyo dagiti insaganayo kabayatan ti panagadal ti grupoyo iti libro.
4 Ti kabsat a mangikondukta iti panagadal iti libro ket rumbeng a tulonganna ti amin a mangusar a naimbag iti Biblia ken mangapresiar iti praktikal a kinapateg ti material a maad-adal. No dakayo ti umuna nga agkomento, mangtedkayo iti simple, direkta a sungbat. No addan simmungbat, mabalinyo a palawaen ti punto a mapagsasaritaan. Nalabit a dakamatenyo no kasano a ti tema ket suportaran ti kangrunaan a teksto. Padasenyo ti agkomento iti bukodyo a sasao, ket tagiragsakenyo ti makipaset iti saritaan.
5 Sangsangkamaysatayo koma a sigagagar a mangadal iti nagpateg a mensahe iti libro ni Isaias. Paregtaennatayo dayta nga agbiag iti kada aldaw a siraragsak a mangnamnama iti panangisalakan ni Jehova!—Isa. 30:18.