Panagadal iti Libro nga Agdayawkayo iti Dios
Ti Agdayawkayo iti Maymaysa a Pudno a Dios ket nairanta a mayadal kadagiti kabbaro kalpasan a maturposda nga adalen ti libro a Pannakaammo. Ti panangusigtayo iti daytoy a publikasion iti Panagadal iti Libro ti Kongregasion tulongannatayo a mangusar iti daytoy a libro iti ministerio ken parayrayenna ti ayat ken apresasiontayo ken ni Jehova ken iti organisasionna. Kasanotayo a magunggonaan a naan-anay iti panagadaltayo iti libro nga Agdayawkayo iti Dios?
Panangikondukta iti Panagadal: Yantangay maysa a kapitulo iti kada lawas ti adalentayo, dagiti manangaywan iti panagadal iti libro nasken a bingaybingayenda a naimbag ti oras. Saanda koma nga agbayag kadagiti umun-una a parapo tapno ad-adu ti oras a mausar iti panangusig kadagiti napatpateg a punto, a kaaduanna ket masarakan kadagiti sumarsaruno a parapo. Ti ababa a panangusig kadagiti pangrepaso a saludsod nga adda iti kahon iti ngudo ti tunggal panagadal tulonganna dagiti timmabuno a mangtandaan kadagiti kangrunaan a punto.
Iti agarup kagudua dagiti kapitulo ti libro nga Agdayawkayo iti Dios, adda dagiti naidenden a saludsod nga utoben ken pagsasaritaan, kas dagidiay masarakan iti panid 48-9. Saan a kasapulan nga iraman a basaen dagita a saludsod no maibasa dagiti parapo. No adalen ti grupo, ti manangaywan ipabasana dagiti nadakamat a teksto ken makomentuan dagitoy no ipalubos ti oras.
Nasakbay a Panagsagana: Saan laeng a basta pananguged kadagiti sungbat ti ramanen ti panagsagana a naimbag para iti panagadal. Ti napasnek a panangutob kadagiti nadakamat a teksto tulongannatayo a mangisagana saan laeng a kadagiti komentotayo no di ket nangruna ti pusotayo. (Esd. 7:10) Makapagpipinnabilegtayo amin no sieemma nga agkomentotayo.—Roma 1:11, 12.
Ti panagadaltayo iti libro nga Agdayawkayo iti Dios tulongannatayo nga agbalin a nasinged ken ni Jehova ken kabalannatayo a mangtulong kadagiti nasingpet panagpuspusoda a tattao a tumipon kadatayo nga agdayaw kenkuana. (Sal. 95:6; Sant. 4:8) Sapay koma ta magunggonaantayo a naan-anay iti daytoy nagsayaat a naespirituan a probision.