Tagiragsakenyo ti Panangadaltayo iti Ania a Talaga ti Isursuro ti Biblia?
1 Ti makapagagar a paset dagiti “Panagtulnog iti Dios” a Kombension Distrito ket ti pannakairuar ti libro nga Ania a Talaga ti Isursuro ti Biblia? Iti din agbayag, masansan nga usarentayto daytoy iti ministeriotayo iti tay-ak, nangruna no mangikonduktatayo kadagiti panagadal iti Biblia. Gapuna, nasken a kabesaduentayo ti linaon daytoy baro a publikasion. Maaramidtayo dayta gapu ta adalentayto ti libro iti Panagadal iti Libro ti Kongregasion a mangrugi iti lawas ti Abril 17, 2006.
2 Ti manangaywan iti Panagadal iti Libro ti Kongregasion iturongna ti atension kadagiti saludsod iti rugi ti tunggal kapitulo. Kalpasanna, maikondukta ti panagadal babaen ti panangyimtuod kadagiti saludsod iti baba ti panid. Mabasa ken mapagsasaritaan dagiti kangrunaan a teksto. Ti kahon a “No Ania ti Isursuro ti Biblia” iti ngudo ti tunggal kapitulo ket makatulong iti panangrepaso iti material gapu ta naglaon ti kahon kadagiti Nainkasuratan a sungbat kadagiti saludsod nga adda iti rugi ti kapitulo. Tagiragsakenyonto ti agkomento yantangay nalawag, simple, ken makapainteres ti pannakaisalaysay dagiti topiko a linaon daytoy a libro.
3 Ti apendise daytoy a libro ket mangipaay kadagiti detalye maipapan kadagiti nadumaduma a topiko. Mausartayto daytoy a material no kasapulan dagiti iyad-adalantayo iti Biblia ti ad-adu pay nga impormasion maipapan iti maysa a topiko. Addanto dagiti gundaway a mapagsasaritaan dagiti paset ti apendise bayat ti Panagadal iti Libro ti Kongregasion. Amin a material iti apendise a karaman iti topiko ket basaen ti parabasa iti panagadal iti libro, ken mabennebenneg ti pannakasaklaw dagiti at-atiddog nga artikulo. Iti apendise, awan dagiti saludsod para iti panagadal. Ngem ti manangaywan mabalinna a pagkomentuen dagidiay timmabuno babaen ti panangyimtuodna kadagiti saludsod a mangitampok kadagiti kangrunaan a punto.
4 Kadagiti Panagadal iti Libro ti Kongregasion, alisto laeng ti pannakausig ti libro nga Isursuro ti Biblia. Ngem saan koma a kasta ti aramidentayo no iyadaltayo daytoy a publikasion kadagiti sabsabali, nangruna kadagidiay bassit wenno awan pay pannakaammoda iti Biblia. (Ara. 26:28, 29) Bayat dagiti panangyadaltayo, nasken nga ilawlawagtayo a naimbag dagiti teksto, ilustrasion, ken dadduma pay. Gapuna, ikagumaanyo ti tumabuno iti tunggal lawas ken makiramankayo a naan-anay iti panangadaltayo iti libro nga Ania a Talaga ti Isursuro ti Biblia?