Tuladenyo ti Naindaklan a Mannursuro iti Panangusar iti Libro nga Isursuro ti Biblia
1. Kasano ti panangisuro idi ni Jesus?
1 Ti Naindaklan a Mannursuro a ni Jesus, kanayon a simple ken nabatad ti panangilawlawagna kadagiti bambanag. No dadduma, saludsodenna nga umuna no ania ti kapanunotan dagiti agdengdengngeg tapno magutugotda nga agpanunot. (Mat. 17:24-27) Iturongna ti atension iti Sao ti Dios. (Mat. 26:31; Mar. 7:6) Saanna a ginabsuonan iti adu unay nga impormasion dagiti adalanna gapu ta ammona nga agtultuloy ti panagsursuroda. (Juan 16:12) Kayat met nga ammuen ni Jesus no patien ken natarusan met laeng dagiti adalanna ti insurona kadakuada. (Mat. 13:51) Ti libro nga Isursuro ti Biblia ket nairanta a tumulong kadatayo a mangisuro iti kasta met laeng a pamay-an.
2. Kadagiti ania a pamay-an a mabalintayo nga usaren dagiti pangiruangan a saludsod ti tunggal kapitulo?
2 Pangiruangan a Salsaludsod: No irugiyo nga adalen ti maysa a kapitulo, nasayaat nga iturongyo ti atension kadagiti pangiruangan a saludsod iti baba ti paulo. Ibangonyo dagiti mamagpanunot a saludsod tapno matukay ti interes ti estudiante. Wenno mabalin a damagenyo no ania ti ababa a sungbatna kadagiti saludsod. Saanen a kasapulan a pagsaritaan iti nabayag dagiti komentona wenno aturen ti aniaman a di umiso a naibagana. Apresiarenyo laeng ti sungbatna sa irugiyon nga usigen ti material. Makatulong ti sungbatna kadagiti pangiruangan a saludsod tapno maammuanyo no adda paset ti leksion a kasapulan nga ipaayanyo iti ad-adu nga atension.
3. Kasanotayo a pagbalinen a simple ti panangyadaltayo?
3 Kasuratan: Ti koma Kasuratan ti nakaipamaysaan ti panagadal. (Heb. 4:12) Ngem saan a kasapulan a basaen ti amin a naisitar a teksto. Ipaganetgetyo dagiti Kasuratan a nakaibatayan dagiti patpatientayo. Mabalin a saanen a nasken a basaen dagiti teksto a mangipaay iti kanayonan nga impormasion. Saan a narikut ti pamay-an a panangidatag ti libro nga Isursuro ti Biblia iti kinapudno. Pagbalinenyo simple ti panagadal. Ipamaysayo dagiti kangrunaan a punto, ken saan koma a nakapapaut ti panangilawlawagyo kadagiti bambanag. Kasta met, dikay mangiserrek kadagiti kanayonan nga impormasion a saan met a kasapulan.
4. Kasanotayo a matingiting no masapul nga iwayaantayo nga usigen ti impormasion iti apendise bayat ti panagadal?
4 Apendise: Ti apendise ket naglaon iti 14 a topiko a mangsuporta iti kangrunaan a tema. Dakayo ti mangikeddeng no ilawlawagyo dagitoy a topiko bayat ti panagadal. Iti dadduma a topiko, mabalinyo a paregtaen ti estudiante a basaenna a mismo ti kanayonan a material, nangnangruna no matarusan ken patienna ti impormasion iti kangrunaan a tema. Kas pagarigan, no patien ti estudiante a ni Jesus isu ti Mesias bayat a pagsarsaritaanyo ti kapitulo 4, iti topiko a “Siasino ni Jesu-Kristo?” mabalin a saanen a kasapulan nga usigen pay ti topiko a “Ni Jesus-Kristo—Ti Naikari a Mesias.” Iti sabali a gundaway, mabalin a makagunggona no iwayaanyo a pagsaritaan ti topiko iti apendise wenno ti pasetna bayat ti panagadal.
5. Ania ti aramidentayo no ikeddengtayo nga usigen ti impormasion iti apendise?
5 No ikeddengyo nga ilawlawag ti material iti apendise, mangisaganakayo a nasaksakbay kadagiti saludsod ken usigenyo dagiti parapo a kas iti pamay-an a panangusigyo iti kangrunaan a teksto. Wenno depende iti kasapulan ti estudiante, mabalin nga ikeddengyo nga irepaso ti impormasion iti sumagmamano a minuto bayat ti panagadal. Iti kasta, makitayo no natarusanna met laeng ti binasana.
6. Kasano a mausar ti kahon ti repaso iti ngudo ti tunggal panagadal?
6 Kahon ti Repaso: Ti kahon iti ngudo ti tunggal kapitulo ket naglaon kadagiti sentensia a masansan a mangsungbat kadagiti pangiruangan a saludsod. Mabalinyo nga usaren dagitoy kas pangrepaso kadagiti kangrunaan a punto iti kapitulo. Natakuatan ti dadduma nga agibumbunannag a makatulong no basaenda, a kadua ti estudiante, ti tunggal sentensia ken nalabit dagiti teksto. Kalpasanna, kiddawenda iti estudiante nga ilawlawagna iti apagbiit no kasano a dagiti teksto suportaranna ti sentensia. Iti kasta, maammuan ti mangyad-adal no naawatan a naimbag ti estudiante dagiti kangrunaan a punto iti leksion ken no kasano a suportaran dagita ti Biblia ken no anamonganna dagita. Masanay pay ti estudiante nga agusar iti Biblia a mangilawlawag iti kinapudno kadagiti sabsabali.
7. Kasanotayo nga usaren ti libro nga Isursuro ti Biblia a mangitungpal iti annongentayo?
7 Ti kaepektibuan a pamay-an tapno maitungpaltayo ti annongentayo a mangisuro kadagiti tattao ken mangaramid kadagiti adalan ket ti panangtulad kadagiti metodo ti pangisuro ni Jesus. (Mat. 28:19, 20) Makatulong ti libro nga Isursuro ti Biblia iti panangaramidtayo iti dayta. Usarenyo a naimbag dayta iti panangisuro iti kinapudno kadagiti sabsabali iti nalawag, simple, ken makagutugot a pamay-an.