Usaren a Sieepektibo ti Nagduduma a Paset ti Libro nga Isursuro ti Biblia
Bayat nga ad-adalen ti estudiante ti Biblia no ania a talaga ti isursuro ti Biblia ken iyap-aplikarna dagiti masursurona, isu ket rumang-ay ken mangpataud iti naespirituan a bunga. (Sal. 1:1-3) Matulongantayo ti iyad-adalantayo nga agprogreso babaen ti panangusar a naimbag kadagiti makatulong a paset ti libro nga Isursuro ti Biblia.
Panglukat a Salsaludsod: Mangrugi ti tunggal kapitulo kadagiti saludsod a masungbatan bayat ti panagadal. Mabalinyo nga isaludsod dagitoy iti iyad-adalanyo tapno magagaran iti panagadalyo. Wenno mabalin a pagkomentuenyo iti apagbiit iti kada saludsod. No saan nga umiso ti sungbatna, saan a kasapulan a korehiren iti dayta a gundaway. Makatulong dagiti komentona tapno maammuanyo dagiti punto a maipaayan iti atension ken pannakaipaganetget.—Prov. 16:23; 18:13.
Apendise: No matarusan ken awaten ti iyad-adalanyo ti material nga adda iti kapitulo, iparegtayo nga isunton ti mangrepaso iti apendise nga adda pakainaiganna iti ad-adalenyo. Iti sumaruno a panagadal, usigenyo dayta iti sumagmamano a minuto tapno masiguradoyo a naawatanna. Ngem no makatulong kenkuana ti material iti apendise, pagsaritaanyo dayta wenno ti sumagmamano a pasetna bayat ti panagadal babaen ti panangbasa kadagiti parapo sa iyimtuodyo dagiti insaganayo a saludsod.
Repaso iti Kahon: Ti repaso iti kahon iti ngudo ti tunggal kapitulo ket naglaon kadagiti sasao a mangsungbat kadagiti panglukat a saludsod. Mabalinyo nga usaren daytoy a paset tapno masiguradoyo a matarusan ken mailawlawag ti iyad-adalanyo dagiti kangrunaan a punto. Basaenyo a dua ti tunggal sasao ken ti aniaman a teksto a nadakamat. Kalpasanna, pailawlawagyo kenkuana no apay nga umiso dagita a sasao babaen ti panangusarna iti/kadagiti teksto.—Ara. 17:2, 3.