Siguraduenyo nga Agsublikayo!
1 “Nagsayaat ketdin a panagsarita! Masapul a laglagipek dayta tapno masarungkarak.” Naibagayo kadin dagita a sasao ket idi agangay nalipatanyon ti pagnaedan dayta a tao? No kasta, ammoyo a ti kakaisuna a pamay-an tapno sigurado a makasublikayo ket isuratyo dayta.
2 Isuratyo Amin: Bayat a nalawag pay iti panunotyo ti pannakisaritayo iti interesado a tao, iwayaanyo nga isurat amin a mainaig nga impormasion maipapan iti dayta a panagsarita. Isuratyo ti nagan ti tao ken no kasanoyonto a mailasin. Isuratyo ti direksionna, ngem diyo pugpugtuan—siertuenyo nga umiso ti isuratyo. Isuratyo ti tema a nagsaritaanyo, aniaman a kasuratan a binasayo, ken ti literatura a naipaima.
3 No nangibatikayo iti saludsod a masungbatan iti sumaganad nga ibibisita, isuratyo dayta. Adda kadi naammuanyo maipapan iti dayta a tao, ti pamiliana, wenno ti relihionna? No adda, isuratyo. Iti kasta, iti sumaganad nga ibibisitayo, ti panangdakamatyo iti dayta ipakitana ti personal nga interesyo iti indibidual. Kamaudiananna, iramanyo ti aldaw ken oras ti damo a pannakisaritayo ken no kaano ti imbagayo a panagsubliyo. Babaen ti umiso a panaginotar, addaankayto iti nalawag a pammalagip ket saanyonto a nalaka a malipatan ti kariyo nga agsubli.—1 Tim. 1:12.
4 No kompleton ti rekordyo, iragpinyo kadagiti dadduma pay nga alikamenyo a pangasaba—bag, Biblia, libro a Panakirinnason, ken literatura—tapno kanayon nga adda no kasapulan dayta. Kadagidiay di madanon iti pagtaenganda, kasayaatan nga irekord dayta iti house-to-house record a maiduma kadagidiay us-usarenyo a pangisuratan kadagiti sarungkaranyo. Siempre, aniaman a panangikagumaanyo a mangirekord a siuumiso kadagiti masarungkaran, ti napateg ket siguraduen nga agsublikayo!
5 Panunotenyo Dayta a Tao: No agsagsaganakayo para iti ministerio, repasuenyo dagiti insuratyo a masarungkaran. Panunotenyo ti kada indibidual ken no ania ti kasayaatan nga aramiden iti sumaganad a panagsarungkar. Adalen no kasano a patanoren ti interes dayta a tao nga agadal iti Biblia. Ti kasta a panagplano ad-adda a pagbalinennakayo a nabunga a ministro ti naimbag a damag, ket iti kasta ad-adda nga agrag-okayo.—Prov. 21:5a.
6 Gapuna, inton makasarakkayo manen iti interesado a dumngeg, diyo kunaen a nalakayonto laeng a malagip dayta. Imbes ketdi, isuratyo, repasuenyo dagiti notayo, kanayon a sipapanunotkayo iti dayta a tao, sa kalpasanna siguraduen nga agsublikayo!