Tulonganyo Dagidiay Umiso ti Pagannayasanda
1. Siasino iti kaaldawantayo dagiti um-ummongen ni Jehova nga umadani kenkuana?
1 Tunggal tao ket addaan iti pagannayasan a nairamut iti piguratibo a pusona. (Mat. 12:35) Dakamaten ti Biblia daydiay maysa a ti “pusona agannayas a makidangadang.” (Sal. 55:21) Ti dadduma ket “agannayas nga agpungtot.” (Prov. 29:22) Ngem adda met dagidiay “siuumiso nga agannayas iti agnanayon a biag.” (Ara. 13:48) Iti kaaldawantayo, ni Jehova um-ummongenna nga umadani kenkuana dagiti kasta nga umiso ti pagannayasanda. (Hag. 2:7) Kasanotay a matulongan ida nga agdayaw ken ni Jehova?
2. Ania ti nairaman iti annongentayo a panagaramid iti ad-adalan?
2 Agsarungkarkayo a Siaanep: Napateg ti umiso a panangmatmat iti panagsarungkar tapno maitungpaltayo ti annongentayo a panagaramid iti ad-adalan. (Mat. 28:19, 20) Naaneptayo kadi a sumarungkar kadagiti interesado? Sarsarungkarantayo kadi dagiti amin nga immawat iti literatura wenno dagiti nangyebkas iti interesda iti naimbag a damag? Sipipingettayo kadi a mangtulong kadakuada a rumang-ay iti naespirituan? Tangay biag ti nairaman, ikagumaantayo koma a sarungkaran dagiti amin nga interesado.
3. Ania ti nasken nga aramidentayo no adda nakasaritatayo iti ministerio?
3 Bayat a malagipyo pay ti nagsaritaanyo iti interesado a tao, isuratyon ti nagan ken adresna, ti topiko a nagsaritaanyo, dagiti teksto nga imbasayo, ken ti literatura nga impaimayo. Kalpasanna, sarungkaranyo iti kabiitan a panawen.
4. Ania ti aramidentayo tapno epektibo dagiti panagsarungkartayo?
4 No Kasano ti Agsarungkar: No agsarungkarkayo, makatulong no nabara ken nainggayyemankayo ken no mangipakitakayo iti napasnek a personal nga interes iti bumalay. Pagbalinenyo a simple ti saritaan ken usarenyo ti Kasuratan. Mangisaganakayo iti makaallukoy a topiko iti Biblia a mapagsasaritaan, ken sakbay nga agpakadakayo, mangibatikayo iti saludsod a masungbatan iti sumaganad nga isasarungkaryo. Kasayaatan no saankayo a makipinnapilit iti bumalay no adda dagiti di nainkasuratan a panangmatmatna. Usarenyo dagiti bambanag a pagtunosanyo a mangilawlawag kadagiti nainkasuratan a kinapudno.—Col. 4:6.
5. Ania ti inkagumaan ti maysa a payunir, ket ania ti resultana?
5 Kasapulan ti kinaanep iti panagsarungkar, ngem makapnek dagiti gunggona. Maysa a payunir idiay Japan ti nangikeddeng iti kalat a mangaramid iti ad-adu a panagsarungkar iti binulan. Insuratna amin a nakasabaanna iti binalaybalay, sa iti uneg ti pito nga aldaw, sinarungkaranna ida. Insaganana a naimbag no ania ti sawenna ken intungpalna ti ministeriona buyogen ti naan-anay a panagtalek iti mensahe nga awitna. Iti naminsan a panagsarungkarna, nakairugi iti panangyadal iti tao a nagkuna: “Diak pulos kayat ti makisarita kadakayo idi. Ita laeng a dimngegak.” Nagsayaat ti imbunga ti naayat a kinapinget ti payunir. Iti ngudo ti umuna a bulan, nakaireport iti sangapulo a panagadal iti Biblia.
6. Apay a masapul nga itultuloytayo ti agsarungkar?
6 Agbaliwbaliw ti kasasaad dagiti tattao. (1 Cor. 7:31) Masansan a sa la madanon manen ti interesado a tao iti pagtaenganna kalpasan ti sumagmamano a panagsubli. Babaen ti sipapasnek a panagsarungkartayo, matulongantayo dagidiay umiso ti pagannayasanda a sumrek iti dalan nga agturong iti agnanayon a biag.—Mat. 7:13, 14.