Panagsagana—Tulbek ti Epektibo a Panagsarungkar
1. Kasano a maisaknap ti nagkauna a Nakristianuan a ministerio?
1 Naan-anay nga insagana ni Jesus dagiti adalanna nga agbalin nga epektibo a manangikaskasaba “iti naimbag a damag ti pagarian.” (Mat. 4:23; 9:35) Sinanay ida ni Jesus idiay Palestina. Nupay kasta, sakbay a nagsubli ni Jesus idiay langit, impakaammona a maisaknap ti Nakristianuan a ministerio tapno adda ‘maaramid nga ad-adalan iti amin a nasion.’—Mat. 28:19, 20.
2. Ania ti ramanen ti panangtungpal iti bilin ni Jesus a ‘mangaramid iti ad-adalan’?
2 Dayta a trabaho ramanenna ti panangsarungkar kadagiti tattao a mangipakita iti interes iti naimbag a damag maipapan iti Pagarian ti Dios ken panangisuro kadakuada a mangtungpal kadagiti amin nga imbilin ni Kristo. Tapno epektibo ti panagsarungkartayo, nasken nga agsaganatayo a naimbag.
3. Uray iti damo a pannakisaritayo iti bumalay, kasanokayo a makairuangan iti panagsarungkar?
3 Agsaganakayo a Nasaksakbay: Adda dagiti agibumbunannag a mangibatbati iti saludsod iti ngudo ti damo a pannakisaritada iti bumalay sa ikarida nga agsublida tapno pagsaritaanda dayta. Natakuatanda a ti panangusar kadagiti impormasion iti libro nga Isursuro ti Biblia bayat ti panagsarungkarda ket nakatulong kadakuada a mangirugi iti panangyadal iti Biblia.
4. Apay a ditay itantan ti agsarungkar uray no saan pay a simmangpet dagiti kabbaro a ruar dagiti magasin?
4 Nupay maysa a Pagwanawanan ken Agriingkayo! laeng ti itukontayo iti tunggal bulan, dina kayat a sawen a satayto la agsarungkar inton sumangpet manen ti sumaganad a ruar dagiti magasin. Mabalintay a parayrayen ti interes ti bumalay babaen ti panangilawlawagtayo iti impormasion a naitampok iti magasin nga addan kenkuana.
5. Ania ti pagsayaatanna no adda masinunuo a panggep ti panagsarungkaryo?
5 Adda Koma Masinunuo a Panggepyo: Sakbay nga agsarungkarkayo, repasuenyo iti sumagmamano a minuto dagiti notayo ket ikeddengyo no ania ti kayatyo a maibanag. Kas pagarigan, mangilawlawagkayo iti maysa a punto manipud iti publikasion nga impaimayo kenkuana itay nabiit. Wenno saan, mangibatikayo iti kanayonan a literatura nga adda pakainaiganna iti naudi a napagsaritaanyo. No nangibatikayo idi iti saludsod, sigurado a panggepyo a sungbatan dayta. No mangitampokkayo iti maysa a teksto a mangpasingked iti punto, ikagumaanyo nga ibasa dayta manipud iti Biblia.
6. Ania ti kalattayo kadagiti panagsarungkar?
6 Ti Kangrunaan a Kalattayo: Siempre, ti kangrunaan a kalattayo ket ti panangirugi iti panangyadal iti Biblia. Adda kabsat a lalaki a nangitukon iti panangyadal iti Biblia iti maysa a lalaki bayat ti panagsarungkarna, ngem nagkedked ti lalaki. Nagsubli ti kabsat ket nangitugot kadagiti kaudian a magasin sa kinunana, “Bayat nga addakami ditoy, kayatmi a sungbatan ti maysa a saludsod dagiti tattao mainaig iti Biblia.” Kalpasan ti panangimdengna iti komento ti lalaki, nangibasa ti kabsat iti maysa a teksto ken iti maitutop a parapo manipud iti publikasion a maus-usar iti panangyadal iti Biblia. Kas resultana, nairugi ti panangyadal iti Biblia.
7. Kasano a ti panagsagana a naimbag natulongannakayo a mangirugi iti panangyadal iti Biblia?
7 Saan nga ubbaw ti panangilatang iti tiempo nga agsagana para iti panagsarungkar. Ad-adda a rumagsaktayo, ken mabalin a maaddaantayo iti pribilehio a tumulong kadagidiay “siuumiso nga agannayas” a magna iti dalan nga agturong iti biag.—Ara. 13:48.