Ipatpategyo Kadi Dagiti Sagrado a Banag?
1 No mapagsaludsodan no ipatpategtayo met laeng dagiti sagrado a banag, nalabit a wen a dagus ti sungbattayo! Ania ti dadduma kadagiti sagrado a probision ti Dios nga ipatpategtayo?
2 Apresiarentay unay ti personal a relasion a mabalintay a tagiragsaken iti nailangitan nga Amatayo! Ipanamnamana a no ‘umadanitayo kenkuana, isu umadaninto kadatayo.’ (San. 4:8) No saan a gapu iti daton a pangsubbot ni Jesu-Kristo, awan ti tao a makasagrap iti biag nga agnanayon. (Juan 3:16) Gapu iti naimpusuan a panagyaman, inaldaw nga iyebkastayo babaen ti kararag ti dakkel nga apresasion iti daytoy nagpateg a sagut ti Dios.
3 Sagrado met kadatayo ti impaltiing ti Dios a Saona, ti Nasantuan a Biblia, ken ti organisasion ni Jehova ditoy daga. Mangipakita nga ipatpategtayo dagitoy a probision a naggapu ken Jehova no agbibiagtayo maitunos kadagiti pagannurotan ti Biblia, palpalagdaentayo ti ayattay nga agkakabsat, sursurotentay a naimbag dagiti nateokratikuan nga urnos, ken makitunostayo kadagidiay mangidadaulo.—1 Ped. 1:22.
4 Babaen ti matalek ken masirib nga adipen, umaw-awattayo iti aglaplapusanan a naespirituan a taraon. Pudno dayta iti daytoy a tawen bayat ti “Managtungpal iti Sao ti Dios” a Kombension Distrito. Makaawattayo sadiay iti napateg nga instruksion ken matagiragsak ti nabara a timpuyog a kasapulantay unay. Kasanotay a maipakita ti naimpusuan a panangipateg iti daytoy a sagrado a probision?
5 Diyo Baybay-an ti Balay ni Jehova: Indagadag ni Nehemias kadagidiay nagbannog a nangbangon manen kadagiti pader ti Jerusalem a ‘dida baybay-an ti balay ti Diosda.’ (Neh. 10:39) Iti kaaldawantayo, ti “balay” ni Jehova isu ti urnosna iti panagdayaw. Paset iti dayta nga urnos dagiti kombension distrito. Tapno ditay maliwayan daytoy nga urnos, nasken ti itatabunotayo sadiay ket umimdeng a naimbag, a mangipakita ken Jehova nga ipatpategtayo unay dagiti probisionna. (Heb. 10:24, 25) Ania a panagsagana ti nasken nga aramidentayo ita a mangipakita a naan-anay nga ipatpategtayo daytoy a sagrado nga okasion?
6 Tabunuanyo ti Tallo nga Aldaw: Tunggal maysa ti rumbeng a mangikagumaan a tumabuno iti amin nga aldaw ti kombension. Planoyo kadi ti sumangpet a nasakbay iti kada aldaw ken agtalinaedkayo agingga a malpas ti pangserra a kararag iti Domingo? No kasta, adu ti masagrapyo a bendision. Saan a kanayon a nalaka ti tumabuno iti kombension. Kasapulan ti determinasion tapno makaaramidkayo iti panagbalbaliw iti sekular a trabahoyo. Adda rigrigat ti panagbiahe no dadduma. Ngem diyo ipalubos a dagitoy a banag ti mangupay kadakayo a tumabuno iti kombension.
7 Usigenyo Daytoy Naisangsangayan a Pagwadan: Itay napan a tawen iti maysa a pagilian idiay Africa a madama ti sibil a riribuk, maysa a grupo dagiti soldado ti nasabet dagiti kakabsat nga agturong iti kombension distrito. Napagsaludsodan dagiti kakabsat: “Asinokayo, ken papananyo?” Insungbatda: “Saksi ni Jehova-kami, ket mapankami tumabuno ti kombension distrito.” Kinuna ti maysa kadagiti soldado: “Awan ti pagbutnganyo dakayo a Saksi ni Jehova. Inkayon, ket awanto ti makalapped iti pannakaangay ti kombensionyo. Kaskasdi, namnamaenyo nga adu ti masabetyo a soldado. Magnakayo a kanayon iti tengnga ti dalan! No makitayo ti adu a tao nga aguummong, ituloyyo ti magna iti tengnga ti dalan!” Kasta ti inaramidda ket sitatalged a nakagtengda iti kombension. Nagunggonaan dagitoy a kakabsat gapu ta impategda dagiti sagrado a banag.
8 Kas iti kakabsattayo idiay Africa, maipasangotayo met kadagiti karit. Ngem awan duadua a kabaelantay a tuladen ti pammatida ken agbalin a determinado a tumabuno iti amin a sesion ti kombension distrito. No masapul nga adda balbaliwan, agpaiwanwan ken Jehova ta ammotayo a bendisionanna dagiti panagreggettayo a tumabuno iti intero a programa.
9 Apitenyo Dagiti Gunggona: Agpannuraytayo iti Sao ti Dios, yantangay ammotayo a babaen iti dayta rumang-aytayo nga agturong iti pannakaisalakan. (1 Ped. 2:2) No tabunuantayo ti kombension distrito ken agimdeng iti programa, mapabileg ti pammatitayo iti dayta a Sao ket ad-adda a madaerantayo dagiti panangraut ni Satanas. No aramidentayo dayta, maipakitatayo ken Jehova ken iti amin nga agbuybuya a naan-anay nga ipatpategtayo dagiti sagrado a banag ken “saan a datayo ti kita nga agsanud . . . no di ket ti kita nga addaan pammati nga agturong iti pannakataginayon a sibibiag ti kararua.”—Heb. 10:39; 12:16; Pro. 27:11.
10 Manamnamatayo a luktan ni Jehova a Dios dagiti tawa ti langit ket iburayna kadatayo dagiti aglaplapusanan a naespirituan a bendision. (Mal. 3:10) Aramidenyo a kalat ti tumabuno iti “Managtungpal iti Sao ti Dios” a Kombension Distrito manipud iti rugi ti programa iti agsapa ti Biernes agingga iti pangserra a kararag ken “Amen!” iti malem ti Domingo. Maragsakankayto ta inaramidyo ti kasta!