Ikagkagumaanyo Kadi ti Magunggonaan?

¹ Kayat dagiti minilion a tattao itatta nga ammuen no kasanoda a parmeken dagiti problema ken tagiragsaken ti biag. Agbasada kadagiti adu a mangigiya a libro wenno agkonsultada kadagiti grupo ken organisasion no kasanoda a pasayaaten ti biagda. Nalabit maibaga ti dadduma dagiti sumagmamano a gunggona a nagun-odda. Ngem no tingitingentayo ti kasasaad ti biag itatta, nasursuro kadi dagiti tattao a tagiragsaken ti natalna ken makapnek unay a biag babaen kadagiti programa ti tao a panangisuro? Pulos a saan!​—1 Cor. 3:18-20.

² Iti kasumbabangirna, libre nga ipapaay ti Namarsua kadatayo ti kasayaatan a makatulong nga instruksion kadagiti amin a dumngeg. Kayat ni Jehova a magunggonaan ti tunggal maysa iti pannursurona. Sipaparabur nga impaayna ti naipaltiing a Saona a mangigiya iti sangatauan iti kinalinteg, ken inyurnosna a maiwaragawag ti naimbag a damag ti Pagarianna iti intero a daga. (Sal. 19:7, 8; Mat. 24:14; 2 Tim. 3:16) Ti pudpudno a naragsak a biag ket direkta a mainaig iti panangipangag kadagiti bilin ni Jehova.—Isa. 48:17, 18.

³ Nasaysayaat nga amang ti panangiwanwan ni Jehova ngem ti ipapaay dagiti mangigiya a libro wenno dagiti gannuat a pangpasayaat nga ituktukon ti lubong. Magun-odtayo ti napaypayso a tulong ken dagiti manayon a gunggona no gundawayantayo a naan-anay dagiti probision ni Jehova a kas naibalabala iti Saona ken isursuro ti organisasionna.—1 Ped. 3:10-12.

⁴ Ikagumaanyo ti Magunggonaan Kadagiti Gimong ti Kongregasion: Itatta, ipakpakita ni Jehova ti napaypayso nga interesna a mangisuro kadatayo maipapan iti daldalanna, ket magunggonaantayo babaen ti panangipangag iti instruksionna. Dagiti lima a linawas a gimongtayo ti mangipaneknek iti naayat a pannakaseknan ni Jehova. No tabunuantay dagiti gimong ti kongregasion, rumang-ay ti pannakaammotayo iti Dios. Masursurotay a salakniban ti bagbagitayo a maibusor iti dakes babaen ti iyaadanitayo ken Jehova. Iti kasta, mapabilegtayo.

⁵ Saan laeng a dayta. Kadagiti gimong ti kongregasion mabalintayo ti ‘lumawa.’ (2 Cor. 6:13) Karaman iti daytoy ti panangam-ammo kadagiti kakongregasiontayo. Magunggonaantayo babaen ti panagpipinnaregta, a kas iti inlanad ni apostol Pablo iti suratna kadagiti taga Roma. (Roma 1:11, 12) Idi nagsurat kadagiti Hebreo, sibibileg a binagbagaanna dagidiay mabalin a mangyug-ugali a manglangan iti Nakristianuan a panagtitimpuyog.—Heb. 10:24, 25.

⁶ Ti naragsak ken makapnek a panagbiag ket direkta a mainaig iti panaginteres iti pagimbagan dagiti sabsabali. Maparegtatayo a mangbirok kadagiti wagas a mangparagsak kadagiti sabsabali. No kasta, dagiti Nakristianuan a gimongtayo ket sigurado a para iti personal a pagimbagantayo ken pagimbagan dagidiay nasayaat a pakitimpuyogantayo. Makalikaguman ti naimpusuan a pannakipasettayo.

⁷ Umasping iti dayta ti imbalakad ni apostol Pablo ken Timoteo idi nagsurat: “Sanayem ti bagim buyogen ti nadiosan a debosion kas kalatmo.” (1 Tim. 4:7) Mabalintay nga iyimtuod iti bagitayo: ‘Sansanayek aya ti bagik? Ad-adalek kadi no kasanoak a magunggonaan iti mangmangngegko kadagiti gimong ti kongregasion?’ Wen ti sungbattayo no ipangagtay dagiti mangngegtayo kadagiti gimong ken ikagumaantay nga iyaplikar ti maadaltayo. Babaen ti mata ti pammati, masapul a saan laeng a dagiti kakabsattayo a mangisursuro ti makitatayo no di ket mabigbigtayo a ni Jehova ti Naindaklan nga Instruktor ti ilina.—Isa. 30:20.

⁸ Teokratiko nga Eskuelaan ti Panagministro ken Gimong ti Serbisio: Nairanta dagitoy dua a gimong a tumulong kadatayo nga agbalin nga epektibo iti Nakristianuan a ministerio. Kasta ti panggep ti Teokratiko nga Eskuelaan ti Panagministro​—maysa nga eskuelaan nga addaan kadagiti estudiante a regular nga umaw-awat iti instruksion ken balakad. Addaanka iti gundaway a mangipakita iti panagrang-aymo kas pumapalawag iti publiko ken mannursuro ti Sao ti Dios. Ngem tapno magunggonaanka a naan-anay iti eskuelaan, nasken nga agpasalistaka, tumabuno, makipaset a regular, ken ipapusom dagiti pasetmo. Matulonganka a rumang-ay no awaten ken iyaplikarmo dagiti balakad.

⁹ Ti Gimong ti Serbisio isurona kadatayo ti pateg ti Nakristianuan a ministerio ken ipakitana no kasanotayo a makiraman iti trabaho a panagaramid iti ad-adalan. Ikagkagumaanyo kadi a sangapamiliaan ti mabenepisiaran a naan-anay kadagitoy dua a gimong? Kuna ti agassawa a Kristiano: “Iti maysa a Gimong ti Serbisio, naammuanmi a masapul nga usigenmi a sangapamiliaan ti inaldaw a teksto. Saanmi idi nga ar-aramiden daytoy, ngem ar-aramidenmi itan.” Kasanoda a nagunggonaan? Inadmitirda: “Nakitami a naragragsak ti panagsasaritami bayat nga addakami iti panganan. Awanen ti agsusupiat kabayatan ti pannangan.” Magunggonaan kadi kadagiti gimong uray dagiti babassit nga annak? Wen. Kuna ti ina: “Nalawag a magunggonaan unay dagiti annakmi kadagiti gimong. Iti maysa a lawas, natiliwanmi nga agul-ulbod ti baritomi nga agtawen iti innem. Ngem iti gimong iti dayta a lawas, ti makaisuro a palawag ket maipapan iti panagulbod. Bayat a madlaw iti rupa ti anakmi ti napalalo a bain gapu iti basolna, kinitana ni tatangna sa nagdumog iti tugawna. Naawatanna ti punto, ket saankamin a nagproblema kalpasan dayta.”

¹⁰ Kuna ti maysa a payunir a sister a maragsakan ta adda dagiti maipapaay a singasing iti Gimong ti Serbisio maipapan iti panangparang-ay iti ministeriotayo. Apay? Inlawlawagna: “Naruamakon iti gagangay a rutina. No dadduma ipapanko a saan nga epektibo ti naisingasing iti Ministeriotayo iti Pagarian. Ngem iti Gimong ti Serbisio, no mangngegko a rumbeng a padasentayo dayta, magagaranak a mangyaplikar kadagiti singasing. Pagbalinenna a makapainteres ti ministerio!” Kalpasan ti sumagmamano a lawas a panangyaplikarna iti singasing a padasen ti mangirugi iti panangyadal iti Biblia iti damo a pannakisarita, nairugina ti panangyadal iti damo a pannakisaritana iti maysa a babai a mangikarkararag iti tulong.

¹¹ No makangngegkayo iti palawag a naglaon iti balakad ti Biblia maipapan kadagiti personal a panagpiliyo, mariknayo kadi a makisarsarita a direkta ni Jehova kadakayo? Kasta ti narikna ti maysa a kabsat. Kinunana: “Iti maysa a gimong a saan pay unay a nabayag, adda palawag a nangisalaysayan ti kabsat no aniada a kita ti paglinglingayan ti umiso kadagiti Kristiano ken no ania dagiti di umiso. Magustuak idi ti agbuya iti boksing iti telebision. Ngem kalpasan dayta a gimong, naikeddengko a karaman daytoy nga isport kadagiti paglinglingayan a di maitutop kadagiti Kristiano. Isu a saanakon nga agbuybuya iti kasta.” Wen, nupay adda panagrayo idi daytoy a kabsat iti banag a naranggas, sipapakumbaba a nagpaiwanwan ken Jehova.—Sal. 11:5.

¹² Ti Miting Publiko, ti Panagadal iti Pagwanawanan, ken ti Panagadal iti Libro ti Kongregasion: Dagiti palawag publiko a mangmangngegantayo iti kada lawas saklawenda ti nadumaduma a tema ti Biblia. Ania dagiti magungun-odyo kadagitoy a palawag? Nagkomento ti maysa a Kristiano nga asawa a lalaki maipapan kadagiti nagunggonana: “Adda maysa a palawag publiko a nangitampok kadagiti amin a bunga ti espiritu. Insalaysay ti nagpalawag ti mismo a kapadasanna, a tapno maikagumaanna a patanoren dagitoy a bunga, mangpili idi iti maysa a partikular a galad sa ikagumaanna a patanoren dayta iti makalawas. Iti ngudo ti lawas, utobenna no ania ti naaramidanna iti panangiparangarang iti dayta a bunga iti inaldaw nga aramidna. Kalpasanna, ipamaysana iti sabali manen a galad para iti sumaruno a lawas. Nagustuak dayta a kapanunotan ket inaramidko a mismo.” Anian a nagsayaat a panangyaplikar iti naadalna!

¹³ Ti Panagadal iti Pagwanawanan isuronatayo a mangyaplikar kadagiti prinsipio ti Biblia iti nadumaduma a kasasaad iti biag. Tulongannatayo a maaddaan iti natalinaay a panunot ken puso nupay adda dagiti pakaringgoran iti biag. Ti Panagadal iti Pagwanawanan pagridamennatayo met kadagiti rumangrang-ay a kinapudno. Kas pagarigan, ditay kadi nagunggonaan iti panangadal iti Mayo 1, 1999, nga artikulo ti Pagwanawanan a napauluan: “Dagitoy a Bambanag Masapul a Maaramidda,” “Ti Agbasa Usarenna Koma ti Panangilasin,” ken “Agsalukag ken Umagawakayo!” Kasano a naapektarandakayo a personal dagitoy a panagadal? Ipakpakitayo kadi babaen iti tigtignayyo nga ipappapusoyo ti pakdaar ni Jesus maipapan iti masanguanan? Agsagsaganakayo kadi para kadagiti suot iti masanguanan inton makitatayo “ti makarimon a banag a mamataud iti panaglangalang . . . a sitatakder iti maysa a nasantuan a disso”? (Mat. 24:15-22) Dagiti kadi kalat ken ti panagbiagyo iparangarangda a saan a ti panagurnong kadagiti material a sanikua ti kapatgan kadakayo no di ket ti panangsantipikar iti nagan ni Jehova? Iti Panagadal ti Pagwanawanan, saan aya nga agad-adaltayo tapno magunggonaantayo a mismo itan?

¹⁴ Panunotenyo no kasano kawadwad ti maadaltayo iti Panagadal iti Libro ti Kongregasion iti linawas. Ad-adalentayo ita ti libro ti Biblia a Daniel. Iti uppat a bulan a panangad-adaltayon iti dayta a libro ti Biblia, ditay kadi makita a dumakdakkel ti pammatitayo iti kada lawas? Kas ken propeta Daniel nga inay-ayat ni Jehova, pabilgentay ti pammatitayo tapno makapagibturtayo.

¹⁵ Isursuronatayo ni Jehova nga Agbiag a Sirarag-o: Maliklikantayo ti adu a problema no ipangagtay dagiti bilin ti Dios. Maysa pay, masagraptayo ti pudpudno a kaipapanan ti naragsak a biag. No surotentayo ti panangidalan ni Jehova, mabalintay ti makipaset iti trabahona, a saan ket a managpaliiw laeng. Ket naragsak a tattao dagidiay agar-aramid iti trabaho ti Dios.—1 Cor. 3:9; San. 1:25.

¹⁶ Panunotenyo a naimbag no kasanoyo nga iyaplikar dagiti mangngegyo kadagiti gimong ti kongregasion. (Juan 13:17) Agserbikayo a sireregta iti Dios, iti amin a pusoyo. Aglaplapusananto ti rag-oyo. Ad-addanto a nabunga ken napnuan kaipapanan ti biagyo. Wen, magunggonaankayo.