Idayawyo ni Jehova Babaen Kadagiti Nasayaat nga Aramid
1 No maranaannakayo ti nakaro unay a bagyo, anian a makapabang-ar ti makasarak iti pagkamangan! Maragsakankayo nga agyan dita no naimeng ken natalged iti unegna ket managpadagus dagiti agnanaed. Ti trabaho a panangikasaba iti Pagarian iturongna dagiti tattao iti kasta a pagkamangan manipud iti sistema ni Satanas. Ti kadi inaldaw a konduktatayo tulonganna ti sabsabali a makakita a makaallukoy daytoy natalged a pagkamangan? Wen, ta kinuna ni Jesus a dagiti tattao ‘makitada dagiti nasayaat nga aramidtayo ket idayawda ti Amatayo nga adda iti langlangit.’—Mat. 5:16.
2 Kasano koma ti konduktayo tapno dagiti aramidtayo maallukoyna ti sabsabali nga agturong ken ni Jehova ken iti organisasionna? Bay-antay a ti sasao ni Jesus a nailanad iti Lucas 6:31 ken 10:27 ti mangmolde iti kabibiagtayo iti inaldaw. Daytoy ti manggutugot kadatayo a mangipakita iti naayat a pannakaseknan kadagiti padatayo a tattao, a mangiduma kadatayo iti daytoy a lubong nga awan asina ken awan pannakaseknanna.
3 Maysa a kabsat a babai a nakalugan iti barko nadlawna ti maysa nga agkabannuag a babai a maul-ulaw ket saannan a maaywanan ti bassit nga anakna. Intukon ti kabsat nga aywananna ti ubing. Idi dinamag ti babai no kasano a makapagyaman, kinuna ti kabsat: ‘Pangngaasim ta umimdengka kadagiti Saksi ni Jehova inton sumarungkarda manen kenka.’ Kastat’ inaramid ti babai, ket maysa itan a Saksi agraman ti asawana. Gapu kadagiti nasayaat nga aramid, impangagda ti mensahe maipapan iti Pagarian.
4 Nairaman ti Intero a Biagtayo: Mabukel ti opinion ti sabsabali maipapan kadatayo ken iti relihiontayo maibatay iti konduktatayo iti sangakaarrubaan, no addatayo iti panggedan wenno eskuelaan, ken bayat nga agal-aliwaksaytayo. Gapuna, rumbeng nga isaludsodtay iti bagbagitayo: ‘Kasanot’ panangmatmat dagiti agpalpaliiw kaniak ken iti pamiliak? Ibilang kadi dagiti kaarruba a nadalus ken nadalimanek ti balay ken arubayanmi? Matmatandakam kadi dagiti katrabahuan ken kaeskuelaan kas managsapsapa ken nagaget? Nanakman ken mararaem kadi ti panaglanglangami a makita ti sabsabali?’ Dagiti nasayaat nga aramidtayo pagbalinenna ti panagdayawtayo ken Jehova a makaallukoy kadagiti sabsabali.
5 Impakdaar ni Pedro a mauy-uyaw dagiti Kristiano. (1 Ped. 4:4) Siguraduentay koma a ti konduktatayo saan nga isut’ makagapu iti pammadakes kadatayo. (1 Ped. 2:12) No dagiti inaldaw nga aramidtayo idayawda ti Dios a pagdaydayawantayo, kaslatayto iti pagsilawan a naitag-ay, a mangallukoy kadagiti sabsabali nga agturong iti natalged a pagkamangan nga ipapaay ni Jehova.—Mat. 5:14-16.