Report Dagiti Manangiwaragawag iti Pagarian

Dagiti Nasayaat nga Aramid a Mangipadayag ken Jehova

ITI Sermonna iti Bantay, kinuna ni Jesus kadagiti adalanna: “Agsilnag koma ti silawyo iti sanguanan dagiti tattao, tapno makitada dagiti nasayaat nga aramidyo ket mangipaayda ti dayag iti Amayo nga adda iti langlangit.” (Mateo 5:16) Kasta met, okupado dagiti pudno a Kristiano ita kadagiti “nasayaat nga aramid” a mangipadayag ken Jehova.

Ania dagitoy a nasayaat nga aramid? Mairaman kadagitoy ti panangikaskasaba iti naimbag a damag, ngem napateg met a paset ti mapagulidanan a kababalintayo. Masansan a ti nasayaat a kababalintayo ti umun-una a mangguyugoy kadagiti tattao nga agturong iti kongregasion Kristiano. Iyilustrar dagiti sumaganad a kapadasan no kasano a dagiti Saksi ni Jehova idiay Martinique ‘pagsilsilnagenda ti silawda iti sanguanan dagiti tattao.’

◻ Kabayatan a makiramraman iti trabaho a panangasaba iti binalaybalay, sinarungkaran ti maysa kadagiti Saksi ni Jehova ti maysa a Katoliko a babai. Makidendenna a di naikasar daytoy a babai iti maysa a lalaki iti 25 a tawenen. Ammona ti sursuro dagiti Saksi ni Jehova, yantangay, agarup pito a tawenen ti napalabas, nakaawat iti libro a Mabalinyo ti Agbiag nga Agnanayon iti Paraiso a Daga.a Kinuna ti babai iti Saksi: “Nakaad-adu ti relihion. Mariribukanak no asino ti patiek kadagitoy.” Inlawlawag ti Saksi a masarakan laeng ti kinapudno iti Biblia ken tapno masarakan dayta, masapul a siaannad nga adalenna ti Kasuratan ken agkararag iti Dios maipaay iti espiritu ken panangiwanwanna.

Nupay interesado idi iti panagadal iti Biblia, pinagkedkedan ti babai ti sumagmamano nga awis a tumabuno kadagiti Nakristianuan a panaggigimong iti Kingdom Hall dagiti Saksi ni Jehova. Apay? Managbabain unay. Nupay kasta, kalpasan a naawatna ti imbitasion iti Panglaglagip iti ipapatay ni Kristo, naparmekna ti kinamanagbabainna ket timmabuno.

Ti naayat a panaglalangen idiay Kingdom Hall ti kangrunaan a namagsiddaaw kenkuana iti gimong. Pulos a dina pay napasaran ti kasta a napudno a panaggagayyem iti iglesiana! Kalpasan dayta a gimong rinugianna ti tumabuno iti amin a panaggigimong nga idadauluan dagiti Saksi iti dayta a lugar, ket di nagbayag nakikallaysa iti lalaki a pakidendennaanna. Maysa itan a bautisado a kameng ti kongregasion.

◻ Namataud kadagiti naimbag a bunga dagiti nasayaat nga aramid ti maysa pay a Saksi. Addaan iti responsable a posision iti maysa nga opisina. Idi naawat iti trabaho ti maysa a lalaki manipud iti puro ti Réunion, nangrugi a suronen ti sumagmamano a trabahador gapu iti kinapandekna. Nagbalin a pagkakatawaan. Iti kasupadina, kanayon a naasi ken nadayaw ti Saksi iti lalaki. Di nagbayag nagsaludsod no apay a naiduma unay.

Inlawlawag ti Saksi a ti nadayaw a kababalinna bunga dagiti prinsipio iti Biblia a naadalna manipud kadagiti Saksi ni Jehova. Impakitana met kenkuana no aniat’ kuna ti Kasuratan maipapan kadagiti panggep ti Dios ken ti namnama iti baro a lubong. Inawat ti lalaki ti pannakipagadal iti Biblia, rinugianna ti tumabuno kadagiti Nakristianuan a panaggigimong, ken inkallaysana ti babai a kabkabbalayna.

Kamaudiananna, nagsubli idiay Réunion. Idi napalabas, nagparikut kadagiti kabagianna, nangnangruna iti pamilia ni baketna. Ngem ita nasdaawda unay iti nasayaat a Nakristianuan a kababalinna. Nabautisaran ti lalaki ken agdaman a ministerial nga adipen. Sumagmamano a kameng iti pamilia, agraman ni baketna ken dua nga annakna a babbai, ti agserserbi met iti kongregasion Kristiano kas agibumbunannag iti naimbag a damag ti Pagarian ti Dios.

[Footnote]