Report dagiti Manangiwaragawag ti Pagarian

“Agbalinkayo a Santo”

TI BILIN ti Dios kadagiti Kristiano ket “dikay anamongan dagiti dakes a tarigagayyo idi addakay pay laeng iti kinanengneng no di ket, kas daydiay nangayab kadakayo isu ti Santo, agsantokayo met iti amin a kita ti panagbiag, ta adda a naisurat: ‘Agsantokayo, ta siak santoak.’” (1 Pedro 1:14-16) Ti kasta a nasantuan a kababalin masansan a maysa a naimbag a pammaneknek kadagiti dadduma. (1 Pedro 2:12) Iti intero a daga, kas ipakita ti sumaganad a kapkapadasan, ar-aramiden dagiti napasnek a tattao dagiti kasapulan a panagbalbaliw tapno maiyeg dagiti kababalinda a maitunos iti daytoy a balakad.

◻ Idiay Ecuador maysa a lalaki ti nangisardeng ti pannakipagadalna iti Biblia idi ti Saksi a mangiyad-adal kenkuana ket nailaksid gapu iti imoralidad. Ti naespirituan a kasapulanna ti nangiturong kenkuana iti panagimbestigar kadagiti dadduma a relihion. Pinilina ti relihion nga Evangelist ket rimmang-ay agingga ti punto a nagbalin a pastor ti bukodna nga iglesia. Nupay kasta, ti konsiensiana ti mangrirriribuk kenkuana, ta isut’ di naikasar iti babai a kabkabbalayenna. Idi isut’ nagkonsulta kadagiti dadduma a papastor iti dadduma a rerrelihion, impasiguroda kenkuana a saan a problema dayta. Nupay kasta, patienna a daytoy ket di umiso, ta ti mismo a Saksi a nangadal kenkuana ket nailaksid gapu iti imoralidad. Dina matarusan no apay nga isut’ di tinubngar ti mismo nga iglesiana. Kamaudiananna, ti kabkabbalayenna ti naiyam-ammo kadagiti Saksi ni Jehova ket nangrugi a makipagadal kadakuada. Ti lalaki nangrugi manen a makipagadal a kadua ti kabkabbalayenna. Isuda a duan ti tumabtabuno kadagiti gimong, rimmang-ayda iti pannakaammo kadagiti prinsipio ti Biblia, ket al-alaendan ti addang a makapagkasarda tapno makapagserbida ken ni Jehova iti nadalus ken makaay-ayo a pamay-an.

◻ Iti sabali pay a kapadasan manipud idiay Ecuador, isalaysay ti maysa a Saksi: “Idi Pebrero 1984, maysa nga agedad-media a babai ti nagkalikagum kadakami a mangiyadal kenkuana.” Aniat’ nangtignay iti daytoy a kalikagum? Ti kabsat a lalaki daytoy a babai ti nagbalin a maysa kadagiti Saksi ni Jehova, ket isut’ agsidsiddaaw unay iti nagsayaat a kababalinna. Bayat ti maikadua a panagadal ti Biblia, nasagidna ti tema ti panagsigarilio, nga isut’ maysa kadagiti parikut ti babai. Nupay kasta, iti sumaganad a panagadal iti umay a lawas siraragsak nga inyanunsiona a nanipud pannakaammona iti panangmatmat ti Biblia maipapan iti panagsigarilio saanen a nangsagsagid iti maysa a sigarilio! Ngem adda pay sabali a parikutna​—ti balayna ti napunno kadagiti narelihiusuan a ladladawan. Ngem idi mabasana ti Deuteronomio 7:26, a kunana: “Ket dikanto iserrek iti balaymo ti makarimon . . . Ta dayta nailunod,” pinuoranna amin idan.

Manipud iti dayta a tiempo nga agtultuloy, isut’ nangrugin a tumabtabuno iti panaggigimong ket saanen a limmanglangan uray iti naminsan. Di nagbayag kalpasan dayta, naparmeknan ti karirikutan a lappedna​—ginupedna ti maysa nga immoral a pannakirelasion iti maysa a lalaki a kasado. Ita, ti damdamo iti intero a panagbiagna, naramananna ti pudpudno a ragsak, ta mabalinannan ti agserbi ken ni Jehova iti nadalus a konsiensia. Isut’ nabautisaran idi Abril 1985 ket iti dayta isu idin ti mangidadaulo iti uppat a panagadal ti Biblia kadagiti dadduma. Ti sumaganad a kalatna isut’ panagbalinna a payunir, ta mariknana nga isu daytoy ti kasayaatan a pamay-an a panangipakitana ti panangipategna ken ni Jehova, nga isut’ nangwayawaya kenkuana manipud iti “barengbareng ken imoral a panagbiag.”

◻ Ti nasasayaat a bunga ti nadiosan a kababalin ti makita idiay pagkaskaseraan dagiti babbai sadi Kenya, a sadiay ti naimbag a kababalin ti maysa a Saksi ti nakadkadlaw iti naisangsangayan a pamay-an. Siam a lallaki a mannursuro ti tangtangdanan ti eskuelaan, agraman maysa a Saksi ni Jehova. Ngem nagsasarunoda a naikkat gapu iti seksual nga imoralidad kadagiti estudiante a babbai. Di nagbayag, maymaysa laengen kadagiti siam ti nabati​—ti maestro a maysa kadagiti Saksi ni Jehova!

Pudno, posible para kadagiti tattao nga addaan imoral a panagbiag ti agbalbaliw. No agbalintayo a ‘nasantuan iti isuamin a kababalintayo,’ saantay laeng a makaipaay iti nasayaat a pammaneknek kadagiti dadduma no di ket paragsakentayo met ti puso ni Jehova. Gapuna, maikabiltayo dagiti bagbagitayo a nakalinea a maipaay iti biag nga agnanayon.​—Proverbio 27:11.

[Kahon iti panid 21]

“Ta siak ni Jehova a Diosyo; santipikarenyo dagiti bagbagiyo ket agsantokayo, ta siak santoak.”​—Levitico 11:44.

[Kahon iti panid 21]

“Agdalustay koma iti isuamin a kinarugit ti lasag ken espiritu.”​—2 Corinto 7:1.