Ti Ayat Tignayennatayo a Mangasaba
1 Kas Saksi ni Jehova, agdindinamag ti kinaregtatayo a mangikasaba iti mensahe ti Pagarian. (Mat. 24:14) Nasurok nga innem a milion ti aktibo iti intero a lubong; mainayon pay dagiti kabbaro no makiramanda iti panangasaba. Umad-adu ti bilang bayat nga umad-adu ti makiraman iti daytoy a trabaho.
2 Aniat’ mangtignay kadatayo nga agboluntario iti kasta a makakarit nga annongen? Awan kadatayo ti napilit, nagunggonaan iti material, wenno naikkan iti naisangsangayan a pammadayaw. Idi damo, adu kadatayo ti bumdeng gapu ta impagaruptayo a saantay a kualipikado, ken masansan a di mangipangag dagiti kasabaantayo. (Mat. 24:9) Saan a matarusan ti kaaduan nga agpalpaliiw no ania ti mangtigtignay kadatayo. Adda la ketdi nabileg a rason no apay a nareggettayo.
3 Ti Bileg ti Ayat: Imbatad ni Jesus ti kangrunaan a bilin idi kinunana a ‘masapul nga ayatentayo ni Jehova iti amin a puso, kararua, panunot, ken pigsatayo.’ (Mar. 12:30) Ti ayattayo ken Jehova ket nairamut iti nauneg nga apresasiontayo iti kinasiasinona—kas Soberano nga Agturay, Namarsua iti amin a banag, a ‘maikari nga umawat iti dayag, dayaw, ken pannakabalin.’ (Apo. 4:11) Awan umasping kadagiti nakaskasdaaw a galadna.—Ex. 34:6, 7.
4 Matignaytayo a mangisilnag iti lawagtayo kadagiti tattao no am-ammo ken ay-ayatentayo ni Jehova. (Mat. 5:16) Agsilnag ti lawagtayo no idaydayawtayo ti Dios iti publiko, isaritatayo dagiti nakaskasdaaw nga aramidna, ken irakuraktay ti mensahe maipapan ti Pagarianna. Kas iti anghel iti nagtangatangan, addaantayo iti ‘agnanayon a naimbag a damag nga ideklara kas naragsak a damag . . . iti tunggal nasion ken tribu ken pagsasao ken ili.’ (Apo. 14:6) Ti ayattayo ti makagapu no apay a maar-aramid ti sangalubongan a panangasaba.
5 Ti lubong matmatanna ti panangasabatayo kas “kinamaag” a rumbeng a di ikankano. (1 Cor. 1:18) Adu ti mangikagkagumaan a mangpasardeng iti trabahotayo. Ti nasungdo nga ayattayo ti mangpabileg kadatayo a mangikuna iti imbaga met laeng idi dagiti apostol: “Dikam mabalin ti agsardeng nga agsao maipapan kadagiti bambanag a nakita ken nangngegmi. . . . Masapul nga agtulnogkami iti Dios kas agturay imbes a kadagiti tattao.” (Ara. 4:20; 5:29) Agtultuloy a rumangrang-ay ti trabaho a panangasaba iti amin a paset ti daga iti laksid ti ibubusor.
6 Mayarig iti dumardarang nga apuy ti ayattayo ken Jehova a mangtigtignay kadatayo a mangideklara iti kinatan-okna iti nadumaduma a lugar. (Jer. 20:9; 1 Ped. 2:9) Itultuloytayo nga ‘ipakaammo kadagiti ili dagiti pannakilangenna . . . ta isu nagaramid a nakaringringbaw’!—Isa. 12:4, 5, NW.