Tulonganyo Dagiti Dadduma a Tumabuno Kadagiti Gimong
1 “Sibabara a maawis a makigimong ti asinoman nga adda iti daytoy a lugar nga agtarigagay a tumabuno.” Sipud idi nagparang daytoy a pakaammo iti Nobiembre 1880 a ruar ti Zion’s Watch Tower, dagiti Saksi ni Jehova sigagagar nga iyaw-awisda kadagiti tattao ti grupo a panagadal iti Biblia. (Apo. 22:17) Napateg daytoy a paset ti pudno a panagdayaw.
2 Napateg ti Tumabuno: Mabendisionantayo no makitimpuyogtayo iti kongregasion. Ad-adda a maam-ammotay ti nakaskasdaaw a Diostayo, ni Jehova. Iti kongregasion, agtataripnongtayo tapno ‘sursuruan ni Jehova.’ (Isa. 54:13) Mangyur-urnos ti organisasionna iti agtultuloy a programa ti panangisuro iti Biblia nga ad-adda a mangyadani kadatayo iti Dios ken mangipaay kadagiti praktikal a tulong tapno mayaplikartay ti “isuamin a pammatigmaan ti Dios.” (Ara. 20:27; Luc. 12:42) Kadagiti gimong, masanaytayo a mangipakat iti arte ti panangisuro iti Sao ti Dios. Dagiti pammalagip manipud iti Kasuratan tulongannatayo a mangtagiragsak iti naballigi a relasion ken Jehova a mismo ken kadagiti sabsabali. Mapabileg ti pammatitayo no makitimpuyogtayo kadagidiay mangay-ayat iti Dios.—Roma 1:11, 12.
3 Direkta nga Iyawis: Manipud iti damo a panagadal, awisenyo a makigimong ti tunggal iyad-adalanyo iti Biblia. Ikkanyo iti handbill. Rubrobanyo ti interesna babaen ti panangiranudyo iti maysa a punto a nakaparegta kadakayo manipud iti naudi a gimong ken ti panangdakamat iti maysa a punto a mausig iti sumaruno a gimong. Deskribiren ken itedyo ti address ti Kingdom Hall.
4 No saan a dagus a makatabuno ti iyad-adalanyo, ituloyyo latta nga awisen. Mangbusboskayo iti sumagmamano a minuto kada lawas a mangilawlawag kenkuana no kasano nga agan-adar ti organisasiontayo. Usarenyo ti broshur a Mangar-aramid iti Pagayatan ti Dios ken ti video a Jehovah’s Witnesses—The Organization Behind the Name tapno agbalin a pamiliar kenkuana ti organisasion ken dagiti gimongtayo. Mangikuyogkayo iti dadduma pay nga agibumbunannag tapno mayam-ammoyo ida iti iyad-adalanyo. No agkararagkayo, agyamankayo ken Jehova gapu iti organisasionna ket dakamatenyo a nasken a makitimpuyog iti dayta ti iyad-adalanyo.
5 Dikay bumdeng a tumulong kadagiti kabbaro nga interesado a makitimpuyog kadatayo. Bayat a dumakkel ti apresasionda ken Jehova, matignaydanto a mangyaplikar iti naadalda ken makitimpuyog iti nagkaykaysa nga organisasion ti Dios.—1 Cor. 14:25.