Panangiturong Kadagiti Iyad-adalan iti Organisasion a Nakaipanaganantayo
1 “Maysa daytoy a mensahe a maisasao iti nasurok a 200 a lengguahe. Mensahe a mangmangngegan iti nasurok a 210 a daga. Mensahe a maidandanon a personal iti sadinoman a pakasarakan kadagiti tattao. Paset daytoy ti kadakkelan pay laeng a kampania a panangasaba ditoy lubong, mensahe a mamagkaykaysa iti minilion iti intero a daga. Naorganisar dagiti Saksi ni Jehova a mangitungpal iti daytoy a trabaho iti nasurok a sangagasut a tawenen!”
2 Kasta ti rugi ti salaysay iti video a Jehovah’s Witnesses—The Organization Behind the Name. Sana ituloy a sungbatan dagiti saludsod a: Siasino a talaga dagiti Saksi ni Jehova? Kasano ti pannakaorganisar ti aktibidadda? Pannakatarawidwidna? Maigasgastuan? Ipaganetget daytoy kadagiti agbuya a “dagiti Saksi ni Jehova iti sangalubongan nasanayda kas maysa nga organisasion a tumulong kadagiti kaarrubada a maaddaan pammati iti Biblia,” ken paregtaenna ida a mangkita a mismo iti organisasion a nakaipanaganantayo. Idi nabuyana daytoy a video, nakalua ti maysa a babai a mayad-adalan gapu iti rag-o ken apresasion ket kinunana: “Kasano a di makita ti siasinoman nga isu daytoy ti organisasion ti pudno a Dios a ni Jehova?”—Idiligyo ti 1 Corinto 14:24, 25.
3 Adda maysa pay a babai a nabayagen nga agad-adal iti Biblia, ngem dina maako nga ulbod a doktrina ti Trinidad. Idi agangay naipabuya kadakuada ken lakayna ti video-tayo. Nagustuanda unay ket piniduada a binuya iti daydi met la a rabii. Iti sumaganad a panagadalda, inyebkas ti asawa a babai ti tarigagayna nga agbalin a Saksi. Kinunana a ti laeng pammatina iti Trinidad ti impamaysana idi ket dina inusig ti organisasiontayo ken dagiti tattao nga adda iti dayta. Gapu iti video nabigbigna a nasarakannan ti pudno nga organisasion ti Dios. Kayatnan a rugian a dagus ti mangasaba iti binalaybalay. Idi nailawlawag kenkuana no ania dagiti nasken nga addang iti panagbalin a di bautisado nga agibumbunannag, kinunana: “Agawaantay ngaruden.” Nagikkat iti iglesia a nakaikamenganna, rinugianna ti makiraman iti serbisio iti tay-ak, ket nakalalaing a mangbalusingsing iti Trinidad.
4 Napaneknekan a nasaysayaat ti panagprogreso iti naespirituan dagiti estudiante iti Biblia ken naparpartak ti irarang-ayda iti kinanataengan no bigbigenda ti organisasion ni Jehova ken makitimpuyogda iti dayta. Imutektekanyo ta kalpasan a nabautisaran dagiti 3,000 iti Pentecostes, “intultuloyda nga impamaysa ti bagbagida iti sursuro dagiti apostol ken iti panagkakadua.” (Ara. 2:42, footnote iti Ingles.) Nasken a tulongantayo dagiti iyad-adalan a mangaramid met iti kasta ita. Kasano?
5 Ibaklayyo ti Responsabilidad: Masapul a bigbigen ti tunggal agar-aramid iti adalan a pagrebbenganna nga iturong ti iyad-adalanna iti Biblia iti organisasion ti Dios. (1 Tim. 4:16) Mamatmatan koma ti tunggal panagadal a kas addang nga agturong iti naragsak nga aldaw a panangisimbolo ti agdadamo iti dedikasionna ken Jehova babaen ti panagpabautisar iti danum. Ti maysa kadagiti maisaludsodto kenkuana iti seremonia ti bautismo ket: “Maawatanyo kadi a ti panagdedikar ken panagpabautisaryo ipabigbignakayo kas maysa kadagiti Saksi ni Jehova a naitimpuyog iti organisasion nga iturturong ti espiritu ti Dios?” Gapuna, nasken a mabigbigna a di makapagserbi iti Dios no saan nga aktibo a makitimpuyog iti pudno a kongregasion Kristiano.—Mat. 24:45-47; Juan 6:68; 2 Cor. 5:20.
6 Itultuloyyo nga isuro ti estudiante maipapan iti lokal a kongregasion ken ti internasional nga organisasion dagiti Saksi ni Jehova. Aramidenyo daytoy iti tunggal panagadalyo iti Biblia, manipud iti umuna a panagadal. Iti rugrugina pay laeng, awisenyo ti estudiante kadagiti gimong, ket itultuloyyo nga awisen.—Apoc. 22:17.
7 Usarenyo Dagiti Naipaay a Kagawaan: Ti broshur nga Ania ti Kalikaguman ti Dios Kadatayo? ken ti libro a Pannakaammo a Mangiturong iti Biag nga Agnanayon dagiti kasayaatan a publikasiontayo nga usaren iti panangikondukta kadagiti panagadal iti Biblia iti pagtaengan. Agpada nga ipaganetgetda ti kinapateg ti pannakitimpuyog iti kongregasion. Kuna ti pagnguduan ti leksion 5 iti broshur a Kalikaguman: “Masapul nga itultuloyyo nga adalen ti maipapan ken Jehova ken tungpalen dagiti ipaannurotna. Makatulong kadakayo a mangaramid iti daytoy ti itatabuno kadagiti gimong iti lokal a Kingdom Hall dagiti Saksi ni Jehova.” Ti libro a Pannakaammo maulit-ulit a paregtaenna ti estudiante a makitimpuyog kadagiti gimong. Kastoy ti awis ti kapitulo 5, parapo 22: “Dagiti Saksi ni Jehova . . . sipapasnek a gutugotendakayo a makipagdaydayaw iti Dios ‘a buyogen ti espiritu ken kinapudno.’ (Juan 4:24)” Kuna ti kapitulo 12, parapo 16: “No itultuloyyo daytoy a panagadal ken iyugaliyo ti tumabuno kadagiti gimong dagiti Saksi ni Jehova, ad-adda a tumibker ti pammatiyo.” Kuna ti kapitulo 16, parapo 20: “Iyugaliyo ti tumabuno kadagiti gimong dagiti Saksi ni Jehova.” Kunana pay: “Tulongannakay daytoy a mangtarus sa mangyaplikar iti pannakaammo ti Dios iti biagyo ken mangyeg iti ragsak kadakayo. Ti panagbalin a paset ti sangalubongan a Kristiano a panagkakabsat tulongannakay nga agtalinaed a nadekket ken Jehova.” Naan-anay a salaysayen ti kapitulo 17 no kasano a masarakan ti maysa ti pudno a kinatalged iti ili ni Jehova. Bayat nga iyad-adalantayo dagiti sabsabali, pagrebbengantayo nga ipaganetget dagitoy a paset ti material.
8 Ti broshur a Dagiti Saksi ni Jehova—Agkaykaysa a Mangar-aramid ti Pagayatan ti Dios iti Sangalubongan ket maysa a nasayaat a kagawaan a napaadda tapno mayasideg dagiti tattao iti kakaisuna a makitkita nga organisasion nga us-usaren ita ni Jehova a mangibanag iti pagayatanna. Ti detalyado nga impormasion a linaonna maipapan iti ministeriotayo, dagiti gimong, ken organisasiontayo paregtaenna ti agbasa a makikadua kadatayo nga agdaydayaw iti Dios. Apaman a maipasdek ti panagadal iti Biblia, mairekomenda nga ikkantayo ti estudiante iti kopia daytoy a broshur a basaenna. Saanen a kasapulan nga iyadal dayta kenkuana a kas iti napalabas.
9 Nasayaat a kagawaan ti dadduma kadagiti video nga inaramid ti Sosiedad a pangiturong kadagiti estudiante iti organisasion a nakaipanaganantayo. Isu dagitoy: (1) The New World Society in Action, ti pannakarepaso ti pelikula idi 1954 a nangipakita iti naannayas, episiente, ken naayat nga espiritu a mangtigtignay iti organisasion ni Jehova; (2) United by Divine Teaching, a mangusig iti natalna a panagkaykaysa a naiparangarang kadagiti internasional a kombensiontayo iti Makindaya a Europa, Sud America, Africa, ken Asia; (3) To the Ends of the Earth, a nangiturong ti atension iti maika-50 nga anibersario ti Watchtower Bible School of Gilead ken mangipakita iti magapgapuanan dagiti misionero iti sangalubongan a trabaho a panangasaba; (4) Jehovah’s Witnesses Stand Firm Against Nazi Assault, a mangisalaysay iti makapagagar a pakasaritaan ti kinatured ken panagballigi dagiti Saksi iti sango ti nakas-ang a panangidadanes ni Hitler kadakuada; ken siempre, ti (5) Jehovah’s Witnesses—The Organization Behind the Name.
10 Mangipasdekkayo Kadagiti Progresibo a Kalat Para Kadagiti Gimong: Nasken a mailawlawag kadagiti estudiante a kasapulantayo agpadpada ti pribado a pannakaisuro iti panagadal iti Biblia iti pagtaengan ken dagiti panagsasarita a maar-aramid kadagiti gimong ti kongregasion. (Juan 6:45) Nasken a rumang-ay ti pannakaawat ti agdadamo agpadpada iti Kasuratan ken iti organisasion. Tapno maragpat dayta, awan ti maisandi iti itatabuno kadagiti gimong. (Heb. 10:23-25) Rugianyo nga awisen a dagus a tumabuno kadagiti gimong ti kongregasion. Dagiti dadduma a kabbaro nga interesado rugiandan ti makigimong uray sakbay a maaddaanda iti regular a panagadal iti Biblia iti pagtaengan. Siempre, kayattayo nga ipakita a mismo ti umiso nga ulidan babaen ti regular nga itatabunotayo.—Luc. 6:40; Fil. 3:17.
11 Mangtedkayo iti umdas nga impormasion maipapan kadagiti gimong ken no kasano ti pannakaangayda tapno nasayaat ti rikna ti iyad-adalan iti damo a pannakigimongna. Tangay alusiisen unay ti dadduma a tattao iti damo nga ipapanda iti lugar a dida pay napnapanan, nasayaat no kuyogenyo ti iyad-adalanyo a mapan iti Kingdom Hall iti damo a pannakigimongna. Nataltalged ti riknana no kaduanakayo a makiam-ammo kadagiti miembro ti kongregasion. Kangrunaan iti amin, sangailienyo a naimbag ti bisitayo, tapno mariknana nga isu ket maawat ken saan nga alusiisen.—Mat. 7:12; Fil. 2:1-4.
12 Paregtaenyo ti estudiante a tumabuno iti aldaw ti espesial nga asamblea, asamblea sirkito, wenno kombension distrito iti damo a gundaway. Nalabit mabalinyo nga iraman iti urnosyo iti transportasion.
13 Iyukuokyo ti Naimpusuan a Panangapresiar: Ilawlawag ti Organisado a Mangitungpal ti Ministeriotayo, iti panid 92: “No ti mismo a nauneg a panangapresiaryo iti organisasion ni Jehova ti maipakita met iti pannakipatpatangyo kadagiti tattao nga interesado, nalaklaka para kadakuada a dumakkel met iti panangapresiar ket daytat’ mangtignay kadakuada a mangaramid ti dakdakkel nga irarang-ay a mangammo pay ti maipapan ken Jehova.” Positibo koma a kanayon ti panagsaoyo, saan a negatibo, maipapan iti lokal a kongregasionyo. (Sal. 84:10; 133:1, 3b) Kadagiti kararagyo iti panagadal iti Biblia, dakamatenyo ti kongregasion ken ti pannakasapul ti estudiante a regular a makitimpuyog iti dayta.—Efe. 1:15-17.
14 Sigurado a kayattayo a maaddaan dagiti agdadamo iti naimpusuan a panangipateg iti makaay-ayo a panagkakadua ken naespirituan a kinatalged a masarakan iti ili ti Dios. (1 Tim. 3:15; 1 Ped. 2:17; 5:9) Kas Saksi ni Jehova, aramidentayo ti amin a kabaelantayo a mangiturong kadagiti estudiante ti Sao ti Dios iti organisasion a nakaipanaganantayo.
[Blurb iti panid 3]
Naparpartak ti naespirituan a panagprogreso dagiti estudiante no makitada a mismo ti organisasion
[Blurb iti panid 4]
Diyo itantan nga awisen a makigimong dagiti iyad-adalanyo