Panangiturong kadagiti Estudiante ti Biblia iti Organisasion ni Jehova
1 Dagiti estudiante ti Biblia masapul nga apresiarenda a ti pannakaitimpuyogda iti organisasion ni Jehova ket nasken para iti pannakaisalakanda. (Apoc. 7:9, 10, 15) Ngarud, rugiantayo nga iturong ida iti organisasion apaman a ti panangyadal ti Biblia ket naipasdek.
2 Tulongam dagiti estudiantem ti Biblia a mangam-ammo iti naindagaan nga organisasion. Kas idi immuna a siglo, amin dagiti tattao ni Jehova ket naitimpuyogda kadagiti kongregasion a buklen dagiti panglakayen, ministerial nga ad-adipen, ken agibumbunannag. Dagiti miembro pagragragsakanda ti itatabuno kadagiti lima a gimong iti tunggal lawas. Dagiti regular nga asamblea ken kumbension naka-iskediolda bayat ti tawen. Kasta met addada dagiti payunir, misionero, ken agdaldaliasat a manangaywan, agraman ti Manarawidwid a Bagi a mangidirihir iti sangalubongan a trabaho. Kasano a matulongam dagiti estudiantem ti Biblia a mangamiris a ti sangal ti organisasion ket naibasar iti Biblia?
PANANGARAMAT TI PANANGARAMID TI PAGAYATAN TI DIOS A BROSHUR
3 Daytoy a broshur ket tumulong kenka tapno in-inut maiyam-ammom ti organisasion kadagiti estudiante ti Biblia. Ti maysa a nasayaat a wagas a panangirugi isu ti panangipalawag no ania ti maar-aramid idiay Kingdom Hall. Sakbay nga awisem daydiay estudiante idiay miting publiko iti umuna a gundaway, repasuenyo a dua ti impormasion iti pinanid 14 ken 15 ti broshur. Ipakitam kenkuana dagiti ladawan ken deskribirem ti lugar ken itsura ti lokal a Kingdom Hall yo.
4 No naiyanunsio ti ibibisita ti manangaywan ti sirkito, pagsaritaanyo a dua dagiti pinanid 20 ken 21. Usarem dagiti saludsod iti ngudo ti panid 21. Pagsaritaanyo ti Nainkasuratan a nakaibasaran ti agdama nga urnos babaen ti panangusar ti umuna a parapo idiay panid 20.
5 Umasping ti daytoy, sakbay ti kumbension distritoyo, asamblea sirkito, wenno espesial nga asamblea, saklawenyo ti naimaldit idiay panid 19. Ipaganetgetmo ti internasional a sakup a kas naipakita kadagiti ladawan iti panid 18. No komentuam daydiay ladawan a mangipakpakita ti pannakairuar ti maysa a baro a publikasion, mabalin nga isaganam isuna iti kanayonan a diskusion iti pinanid 24 ken 25. Tapno maipalawagmo ti panagpayunir, saklawenyo dagiti pinanid 22 ken 23.
IBAGAY ITI PANAGKASAPULAN
6 Kas iti makitayo, saan a masapul nga irugi idiay umuna a paset ti Panangaramid ti Pagayatan ti Dios a broshur. Imbes ketdi, bayat a dumteng ti gundaway ken panagkasapulan, salaysayen dagiti espesipiko a punto manipud ti broshur a mangtulong iti estudiante a mangapresiar iti organisasion ni Jehova ket paregtaen isuna a makigimong iti lokal a kongregasion.
7 Ti sireregta a panagsao no pagsasaritaan dagitoy a bambanag ket mangaramid ti agpaut nga impresion idiay estudiantem. Napnoka koma ti espiritu. (Ara. 18:25) Kasta met, siguraduem a sika, “a mangisursuro iti sabali,” mangipasdekka ti nasayaat nga ulidan ti panangipakita ti apresasion para iti organisasion ni Jehova. (Roma 2:21) Ti panangaramidmo ti kastoy, mabalin a matulongam dagiti dadduma a tumipon iti maysa nga arban nga iturturong ni Jesus iti biag nga agnanayon.