“Idiay Balay ni Jehova Mapantayo”

¹ Impangag ni David a sigagagar iti awis nga: “Idiay balay ni Jehova mapantayo.” (Sal. 122:1) Ti “balay” ni Jehova, nga itakderan daydi templo, isut’ lugar a pagtataripnongan dagiti agtarigagay nga agdayaw iti pudno a Dios. Maysa daydi a santuario iti talged ken talna. Ita, ti sangalubongan a Kristiano a kongregasion a “balay” ti Dios, isut’ “maysa nga adigi ken sadiri iti kinapudno.” (1 Tim. 3:15) Amin dagiti sagana a maipaay iti pannakaisalakan ti mabalin a magun-odan babaen daytoy a kalasugan. Gapu iti daytoy a rason, “amin dagiti nasnasion ti masapul nga agayus kenkuana” no kayatda iti agsagrap ti bendision a naikari iti sidong ti panagturay iti Pagarian ti Dios.​—Isa. 2:2.

² Daytoy a “balay” ti buklen dagiti 69,000 a kongregasion iti 229 a dagdaga. Ti ruangan dagiti Kingdom Hall iti intero a lubong ti silulukat, agraman nasurok nga uppat a milion a naregta a trabahador a mangidandanon iti imbitasion nga: “Umayka! . . . Asinoman nga agtarigagay alaenna ti danum iti biag nga awan bayadna.” (Apoc. 22:17) Adu dagiti dimngeg iti daytoy a damag ket impangagda a buyogen ti panangipateg. Adda dadduma a nasagid ngem saanda pay nga immay iti balay ni Jehova babaen ti pannakitimpuyogda iti Kristiano a kongregasion. Addaan dagita ti “espiritual a kasapulan” a mapennek babaen dagiti sagana a masarakan laeng iti kongregasion. (Mat. 5:3) Agbibiagtayo iti napeggad a tiempo, bayat a nadaras ti iyaasideg iti panagngudo daytoy a sistema. Ti di panangikankano wenno nakedked a kababalin isut’ agtinnag iti napeggad a kinaladaw. Naganat unay ti panangikagumaan koma dagiti tattao nga “umasideg iti Dios” babaen ti iyaadanida iti organisasionna. (Sant. 4:8) Kasanotayo a matulongan ida?

³ Iturong ti Interes iti Organisasion: Manipud pay damo a pannakadanon kadagiti interesado a tattao, masapul nga iturongtayon ti asikasoda iti organisasion. Bayat a kabaelantayo a saraken dagiti kasuratan ken ilawlawag dagiti pamunganayan a doktrina, saan a datayo iti gubbuayan dayta a pannakaammo. Tunggal banag a naadaltayo isut’ nagtaud ti organisasion, a naikalasugan babaen iti klase nga adipen a mangabasto ti “taraon iti umiso a tiempo.” (Mat. 24:45-47) Manipud iti rugi, dagiti agdadamo ket masapul a mailasinda a ti nadalus a panagdayaw ket ramanenna iti ad-adu ngem kadatayo laeng wenno uray ti lokal a kongregasion; nga adda maysa nga organisado, teokratiko, sangalubongan a sosiedad nga agtigtignay iti sidong ti panangidalan ni Jehova.

⁴ Ti panangiturong a maawattayo isut’ aggubbuay ken Jehova, isu a nangikari a mangigiya ken mangisuro kadatayo. (Sal. 32:8; Isa. 54:13) Daytoy nga instruksion isut’ naiwaragawag a nangruna babaen iti literaturatayo. No matulongan dagiti interesado a tattao a mangpatanor ti nangato a panangtrato iti pagbasaantayo, a bigbigenda a kas gubbuayan ti makasalbar iti biag nga instruksion, awan duadua a kayatda a basaen ken iyaplikar ti damagna imbes nga ibellengda a sidadaras. Masapul a kanayontayo nga iparang daytoy a literatura iti wagas a marukit ti panagraemda kenkuana. Daytoy ti mangisuro kadagiti agdadamo a mangipateg iti organisasion ken agpannuray kadagiti saganana.

⁵ Maammuan koma dagiti interesado nga adda sentral a lugar dagiti gimong iti komunidad a maipaay a regular dagiti instruksion. Itedyo kadakuada iti direksion ti Kingdom Hall ken iti oras dagiti gimong. Mailawlawag ti nagdumaan iti gimongtayo kadagiti relihioso a gimong a nalabit a natabunuanda iti napalabas. Tunggal maysa ti maabrasa; awan ti kolekta wenno personal a panagdawat iti pundo. Bayat a dagiti nadutokan a ministro ket idauloda dagiti programa, tunggal maysa ti addaan iti oportunidad a makipaset babaen ti panagkomento ken pannakiramanda iti paset ti programa. Maawat iti sangapamiliaan; mairaman dagiti annak kadagiti diskusion ti Biblia. Dagiti ministrotayo ket saanda a nakasuot iti nagpaiduma nga abito wenno nagayad a kawes. Kalalainganna ti pannakaarkos iti Kingdom Hall ngem awan dagiti kandela, estatua, wenno ladladawan. Ti kangrunaan a tumabuno isuda dagiti lumugar iti lokal a sangakaarubaan.

⁶ Iturong a Progresibo ti Interes Kadagiti Panagadal iti Biblia: Ti umuna a panggep iti panagadal ti Biblia isut’ panangisuro iti kinapudno ti Sao iti Dios. Pabilgenna met ti estudiante iti panangipateg ti organisasion ni Jehova ken sipupuot koma iti panagkasapulan a maipaset iti dayta. Ti dakkel a trabaho nga inaramid ni Jesus ken dagiti disipulona idi immuna a siglo isut’ nangatrakar kadagiti sinsero a tattao ken nakikaykaysada kadakuada iti trabaho babaen ti panangimaton iti sentral a bagi a manarawidwid. Kadagiti komunidad a nasayaat ti panangipangag, naporma dagiti kongregasion a mangted iti regular a panangsanay ken panursuro. Dagidiay a naikameng ti napabileg iti naespirituan, a natulonganda nga agibtor iti tiempo ti rigat. (Heb. 10:24, 25; 1 Ped. 5:8-10) Iti daytoy aldawtayo pinanggep ni Jehova nga “urnongen manen dagiti amin a bambanag ken Kristo.” (Efe. 1:9, 10) Kas resultana, addaantayo ti sangalubongan a “timpuyog ti agkakabsat.”​—1 Ped. 2:17.

⁷ Ti linawas a panagadal iti Biblia ti mangiraman iti panursuro a tumulong kadagiti estudiante a mangipateg ti organisasion ken manggundaway kadagiti sagana a maipaay iti pannakaisalakanda. Alaenyo ti sumagmamano a minutos ti kada lawas a mangistoria wenno mangiladawan iti maysa a banag maipapan ti organisasion ken no kasano iti panagandarna. Makasarakkayo iti makatulong a puntos a mapagsasaritaan idiay Nobiembre 1, 1984, a Watchtower (Mayo 1, 1985 iti Iloko). Ti broshur a Jehovah’s Witnesses in the Twentieth Century ken Jehovah’s Witnesses​—Unitedly Doing God’s Will Worldwide isudat’ mangilawlawag iti kangrunaan a langa ti organisasion ken no kasano a magunggonaantayo. Ti panangiyurnos kadagiti estudiante ti Biblia a mangbuya iti video a Jehovah’s Witnesses​—The Organization Behind the Name ti pakakitaanda a mismo no ania iti maar-aramidanna. Dagiti napili a report ken kapadasan manipud iti Yearbook ti mangipakita iti balligi ti trabaho kadagiti nagduduma a pagilian ken kultura malaksid ti bukodtayo. Dagiti dadduma a publikasion ti mabalin met a mausar. Iti pannagna ti tiempo, naprogreso koma a mailawlawag dagitoy a bambanag a kas no apay a mapantayo iti balaybalay, ti panggep dagiti gimongtayo, no kasano a magastuan ti trabahotayo, ken ti sangalubongan a kalawa iti aktibidadtayo.

⁸ Ti panangiyam-ammo kadagiti dadduma a Saksi ket addaan ti makaparegta nga epekto kadagiti agdadamo, ta mapalawa ti kapanunotanda iti kongregasion. Iti dayta a banag, awisenyo dagiti dadduma nga agibumbunannag a makikatugawda a makiadal kadakuada iti sagpaminsan. No adda maysa iti kongregasion a kapada ti nalikudanda wenno kaasping iti interesda mabalin a makanayon ti baro a panangmatmat iti estudianteyo. Nalabit a maysa a panglakayen ti kumuyog kadakayo tapno makiam-ammo laeng. Maysa a bendision kenkuana no maiyurnos ti manangaywan iti sirkito ken ti asawana a sumarungkar iti dayta a panagadal. No adda Saksi nga agnanaed iti asideg, ti panangiyammo iti estudiante ti Biblia isut’ mangted iti kanayonan a pammaregta kenkuana a tumabuno kadagiti gimong ti kongregasion.

⁹ Paregtaen Dagiti Agdadamo a Makigimong: Kasapulan dagiti agdadamo a mabigbig no kasano ti kapateg iti itatabuno kadagiti gimong. Padasenyo a riingen ti interesda. Itudoyo dagiti artikulo a mawanas iti panagadal ti Pagwanawanan. Dakamatenyo iti titulo dagiti sumungad a palawag ti publiko. Saritaenyo dagiti lawag ti material a makobrian iti Teokratiko a Pagadalan iti Ministerio ken Panagadal ti Libro iti Kongregasion. Iyebkasyo ti riknayo maipapan iti maadalyo kadagitoy a gimong ken no apay a riknaenyo a kasapulan a tumabuno. No kabaelanyo, itukonyo kadakuada ti transportasion. Ti panagtelepono sakbay iti gimong ket mangted ti kanayonan a pammaregta kenkuana a tumabuno.

¹⁰ No ti estudiante iti Biblia ket makigimong, ipariknayo nga isut’ maawat. Iyam-ammoyo iti sabsabali, agraman kadagiti panglakayen. No tumabuno iti palawag ti publiko, iyam-ammoyo iti ispiker. Ipakitayo iti aglawlaw ti Kingdom Hall. Ilawlawagyo ti panggep dagiti pagidulinan iti literatura ken magasina, kahon ti kontribusion, libraria, ken tinawen a teksto. Maammuanna koma daytoy a saan laeng a balay a pagtataripnongan iti panagdayaw ngem sentro met ti organisado a lokal a panangasaba a trabaho.

¹¹ Mailawlawag no kasano a maidaulo dagiti gimongtayo. Ipakita iti estudiante dagiti publikasion nga usarentayo. Itudo a ti Biblia isut’ kangrunaan a librotayo. Mabalin iti tunggal maysa ti makipaset, agraman dagiti ubbing. Mailawlawag nga amin dagiti musika ken liriko ti pagkantaantayo ket pinutar a mismo dagiti Saksi ni Jehova a maipaay iti panagdayawtayo. Maiyawis ti asikaso iti nagduduma a nagtaudan dagidiay a tumabtabuno. Maaramid ti positibo a komento maipapan iti espiritu ti kinagayyem ken panangsangaili. Daytoy a naanus, sinsero nga interes isut’ mabalin a kabilgan a rason a mangtignay iti estudiante nga umay manen.

¹² No Apay nga Agkedked Dagiti Dadduma: Masansan, uray ania ti aramidenyo, agkedked dagiti dadduma nga umasideg iti organisasion. Ngem saankayo koma a sidadaras a maupay. Padasenyo nga ilugar ti bagiyo iti sasaadenda. Agingga iti dayta a tiempo, nalabit a saanda pay laeng a riknaen a tumabunoda iti relihioso a serbisio malaksid dagiti espesial nga okasion. Nalabit a dagiti miembro iti pamilia wenno nadekket a gagayyemda ti mangublag kadakuada. Nalabit nga agamakda kadagiti kaaruba nga agsasao iti pangublag kadakuada. Ken, siempre, maipasango kadakuada ti nagduduma a lapped a naisinggalut iti sosial ken ragragsak nga ar-aramidda. Mabalin a matmatanda dagitoy a kas saan a malaktaw a bangen; a kasapulan a tulonganyo ida a kumita kadagiti bambanag iti umiso a panangmatmat ken “siguruen dagiti napatpateg a bambanag.”​—Fil. 1:10.

¹³ Mangtedkayo ti Nainkasuratan a rason iti panagibtor. Maigunamgunam nga amintayo ket agkasapulan ti naganat a pammaregta ken espiritual a pammabileg a maawat manipud iti panagtitimpuyogtayo a sangsangkamaysa. (Roma 1:11, 12) Imbatad ni Jesus a ti ibubusor iti pamilia ket saan a balido a rason nga umatrastayo. (Mat. 10:34-39) Kiniddaw ni Pablo a ditay koma ibain iti pannakabigbigtayo iti publiko kas disipulo ni Jesus. (2 Tim. 1:8, 12-14) Dagiti personal a gakat ken lapped ti masapul a makontrol; ta no saan a kasta, isuda ti agbalin a silo kadatayo. (Luc. 21:34-36) Dagidiay maikari iti bendision ni Jehova ti masapul nga amin a kararuada, saan a nagkadua iti pusoda. (Col. 3:23, 24) Ti panangimula iti panangipateg ti kasta a prinsipio iti Biblia ti mabalin a manglukat iti dana kadakuada nga agprogreso ti naespirituan.

¹⁴ Silulukat Dagiti Ruangan: Ti balay ni Jehova iti pudno a panagdayaw ti naitandudo iti ngatuen dagiti amin a sabsabali. Ti imbitasion a naiwaragawag iti 229 a pagilian ti intero a lubong isut’: “Umaykayo, . . . sumang-attayo iti bantay ni Jehova, . . . ket isuronatayo maipapan ti dalanna, ket magnatayo kadagiti danana.” (Isa. 2:3) Ti positibo a panangipangag dagiti agdadamo isut’ mangsalbar iti biagda. Ti panangiturong iti interesda iti organisasion ni Jehova isut’ maysa kadagiti kasayaatan a wagas a pangtulong kadakuada.