Kasayaatan ti Simple
1 Apay a masansan a mapagimdeng dagiti agtutubo nga agibumbunannag dagidiay pangiranranudanda iti mensahe ti Pagarian? Ti maysa a rason ket simple ti panagsasaoda. Ipagarup ti dadduma nga agibumbunannag a kasapulan ti nasayud a presentasion tapno epektibo ti panangasaba. Ngem ipakita dagiti kapadasan a kasayaatan ti simple ken nalawag a presentasion.
2 Inwaragawag ni Jesus ti Pagarian ti Dios iti simple, prangka a pamay-an ken sinanayna dagiti adalanna a kasta ti aramidenda. (Mat. 4:17; 10:5-7; Luc. 10:1, 9) Nagusar kadagiti simple a panangiruangan, saludsod, ken pangngarig tapno maalana ti atension dagiti dumdumngeg kenkuana ken madanonna ti pusoda. (Juan 4:7-14) Nasayaat no tuladentayo ti ulidanna ket pagbalinentayo a nalaka a maawatan dagiti presentasiontayo.
3 “Naimbag a damag ti Pagarian” ti mensahe nga iwaragawagtayo. (Mat. 24:14) Agtalinaed a simple ti presentasionyo no ti Pagarian ti kangrunaan a temayo. Mangdakamatkayo iti bambanag a pakaseknan dagiti dumdumngeg kadakayo. Masansan a mas interesado dagiti babbai iti pamiliada ngem iti maipapan iti politika. Maseknan unay ti ama iti panggedanna ken iti kinatalged ti pamiliana. Interesado dagiti agtutubo iti masakbayanda; dagiti lallakay ken babbaket iti nasaysayaat a salun-at ken kinatalgedda. Gagangay a nangnangruna a pakaseknan dagiti tattao ti paspasamak iti lugarda ngem iti paspasamak kadagiti adayo a daga. No napagsaritaanyon ti bambanag a paginteresan dagiti tattao, iturongyo ti atension kadagiti bendision a tagiragsakento ti natulnog a sangatauan iti sidong ti turay ti Pagarian ti Dios. Mabalin a kasayaatan a pangtukay iti interes ti sumagmamano laeng a simple, napili a sasao a napakuyogan iti kasuratan.
4 Mabalinyo a rugian ti saritaan babaen ti panangikuna iti kastoy:
◼ “Awan duadua nga umanamongkayo a nakaad-adu ti di maagasan a sakit a sagsagabaen ti sangatauan. Ngem ammoyo kadi nga inkari ti Dios a dandaninan ikkaten ti amin a kita ti sakit, agraman ipapatay?” Bay-anyo a sumungbat, sayo basaen ti Apocalipsis 21:3, 4.
5 Babaen kadagiti nalawag ken simple a presentasion, sapay koma ta madanonyo ti panunot ken puso ti ad-adu pay a tattao iti teritoriayo, a tulonganyo ida a mangammo iti maipapan ken ni Jehova ken iti namnama a panangtagiragsak iti biag nga agnanayon.—Juan 17:3.