Mangipakita iti Personal nga Interes—Babaen ti Panagsagana
1 Ti panagsagana a naimbag para iti ministerio tulongannatayo a mangipakita iti personal nga interes kadagiti sabsabali. Kasano? No nakasaganatayo a naimbag, saantay unay a makumikom iti presentasiontayo ket ad-adda a maipamaysatayo ti atensiontayo iti bumalay. Maysa pay, makatulong dayta tapno saantayo nga agnerbios ken makapagsaotayo a naimpusuan. Ngem kasanotayo a makaisagana iti epektibo a presentasion?
2 Usarenyo Dagiti Maitutop a Presentasion: Mangpilikayo iti maysa kadagiti singasing a presentasion iti Enero 2006 a Ti Ministeriotayo iti Pagarian a maitutop iti lugaryo, ken panunotenyo no kasano a mayebkasyo dagita iti bukodyo a sasao. Ibagayyo dayta iti teritoriayo. Kas pagarigan, no masansan a makasarakkayo kadagiti tattao nga addaan iti relihion wenno etniko a nalikudan, panunotenyo no kasano a makapainteres kadakuada ti presentasionyo. Ti panangibagayyo iti presentasionyo kadagiti indibidual a makasaritayo ipakitana ti napasnek a pannakaseknanyo kadakuada.—1 Cor. 9:22.
3 Apaman nga irugiyon nga usaren ti presentasion, itultuloyyo a pasayaaten dayta. Yantangay nangnangruna a napateg dagiti panglukat a sasao, nasken nga imutektekanyo ti sungbat dagiti bumalay. Makapainteres kadi kadakuada ti topiko? Matignayda kadi a sumungbat kadagiti saludsodyo? No saan, balbaliwanyo ti presentasionyo agingga a makatumpongkayo iti epektibo a pamay-an.
4 Dagiti Makatulong iti Panangikabesa: Adu ti marigatan a manglagip iti presentasion no addadan iti ruangan ti bumalay. No mapaspasamak kadakayo ti kastoy, pinadasyo kadin ti nangensayo a sipipigsa iti presentasion a kadua ti sabali a tao? Mabalin a tumulong daytoy kadakayo tapno nalawag iti panunotyo dagiti punto ken mayebkasyo dagita iti simple ken lohikal a pamay-an. Makatulong met daytoy kadakayo a mangtaming kadagiti nagduduma a reaksion dagiti bumalay.
5 Ti sabali pay a makatulong iti panangikabesa isu ti panangisurat iti ababa a sumario ti presentasion iti bassit a papel sa kitaenyo dayta sakbay nga agtuktokkayo iti ruangan. Natakuatan ti dadduma a daytoy nga ababa a palagip ti nakatulong kadakuada nga agbalin nga ad-adda a kalmado ken nasaysayud iti pannakisaritada kadagiti tattao. Kadagitoy a pamay-an, ti panagsagana a naimbag matulongannatayo a mangipakita iti personal nga interes kadagiti sabsabali ken pasayaatenna ti panangidatagtayo iti naimbag a damag.