Mangipakita iti Personal nga Interes—Babaen ti Pannakibagay
1 Nangipaay ni apostol Pablo iti nasayaat nga ulidan iti wagas a panangidatagna iti naimbag a damag. Kanayon nga imbagayna dayta iti nalikudan ken pampanunot dagiti agdengdengngeg kenkuana. (1 Cor. 9:19-23) Ikagumaantayo met koma nga aramiden ti kasta. No agpanunottayo a nasaksakbay, masansan a kabaelantayo a baliwan dagiti pagtuladan a presentasion nga adda iti Ti Ministeriotayo iti Pagarian tapno maibagay kadagiti kasapulan dagiti tattao iti teritoriatayo. Bayat nga umasidegtayo iti ruangan, mabalin nga adda dagiti mapaliiwtayo a paginteresan ti bumalay ket iramantayo dagita iti presentasiontayo. Nupay kasta, adda sabali pay a pamay-an a mabalintayo ti makibagay iti ministeriotayo.
2 Ibagaytayo ti Presentasion iti Komento ti Bumalay: No ikaskasabatayo ti naimbag a damag, masansan nga agsaludsodtayo ken awisentayo dagiti bumalay a sumungbat. Kasano ti panangtamingyo iti sungbat dagiti bumalay? Agannayaskayo kadi a mangipaay iti parparawpaw a komendasion sa itultuloyyon ti insaganayo a presentasion? Wenno ti kadi ibagayo ipakitana nga ikabkabilanganyo dagiti komento dagiti bumalay? No mangipakitakayo iti napasnek nga interes iti sungbat dagiti bumalay, mabalin a maaddaankayo iti gundaway nga agusar iti kanayonan a nataktika a salsaludsod tapno maammuanyo no ania a talaga ti pampanunotenda. (Prov. 20:5) Iti kasta, maipamaysayo dagiti aspeto ti mensahe ti Pagarian a direkta a nainaig kadagiti pakaseknan dagiti dumdumngeg.
3 Ngarud, masapul a situtuloktayo a makisarita maipapan kadagiti sabali a topiko malaksid iti naiplanotayo nga ilawlawag. No irugitayo a komentuan ti maysa a problema nga adda iti damdamag, ngem ti bumalay ket mangdakamat iti lokal wenno personal a banag a pakaseknanna, ti pudpudno a pannakaseknantayo a mangpennek iti kasapulan ti bumalay tignayennatayo a mangipamaysa iti saritaan maipapan iti Biblia iti banag a pakaseknanna unay.—Fil. 2:4.
4 Ibagaytayo ti Pamay-antayo: No agsaludsod ti bumalay, mabalin a magunggonaantayo no ipad-eng iti sabali a gundaway ti saritaan kalpasan a makasaraktayo iti kanayonan nga impormasion maipapan iti topiko. Mabalin met a mangitukontayo iti publikasion a nakaisalaysayan a naimbag dayta a topiko. Amin dagitoy iparangarangna ti napasnek nga interestayo a mangtulong kadagiti sabsabali a mangammo ken ni Jehova.—2 Cor. 2:17.