Naan-anay a Makiraman iti Panagani
1 Adda trabaho a panagurnong a dinakamat dagiti mammadto ni Jehova idi ugma kasta met ni Jesu-Kristo. (Isa. 56:8; Ezeq. 34:11; Juan 10:16) Maar-aramid itan dayta a trabaho bayat a maikaskasaba ti naimbag a damag ti Pagarian iti sangalubongan. (Mat. 24:14) Ad-adda a lumawlawag ti nagdumaan dagidiay agserserbi iti Dios ken dagidiay saan nga agserserbi kenkuana. (Mal. 3:18) Ania ti kaipapananna daytoy kadatayo?
2 Personal a Responsabilidad: Adda maadaltayo iti ulidan ni Pablo, a naan-anay a nangidaulo iti Nakristianuan a ministerio. Minatmatanna nga obligasionna ti mangasaba tapno maikkan ti amin a tattao iti gundaway a dumngeg iti naimbag a damag ket maisalakanda. Daytoy ti nangtignay kenkuana nga agbannog nga awan ressatna para kadakuada. (Roma 1:14-17) Maigapu iti napeggad a kasasaad a sangsanguen ti sangatauan ita, saan kadi a dakdakkel ti responsabilidadtayo a mangasaba kadagidiay adda iti teritoriatayo?—1 Cor. 9:16.
3 Tiempo ti Naganat a Panagtignay: Ti panangasaba ket mabalin a maipadis iti trabaho a panangbirok ken panangalaw kadagiti biktima ti didigra. Nasken a sapulen ken ipantayo dagiti tattao iti natalged a disso sakbay a naladaw ti amin. Bassiten ti tiempo. Agpegpeggad ti biagda! Di pakasdaawan nga indagadag ni Jesus kadagiti adalanna nga ‘ipakaasida iti Apo ti panagani a mangibaon kadagiti trabahador iti panaganina.’—Mat. 9:38.
4 Yantangay bigbigenda a naganat ti panawen ita, adu a trabahador ti Pagarian ti ad-adda a nakiraman iti daytoy makaispal-biag a trabaho. Ti tin-edyer a ni Hirohisa ken ti uppat nga adingna ket agnanaed iti pagtaengan nga addaan agsolsolo a nagannak. Kada alas tres ti parbangon, agitulod ni Hirohisa iti diario tapno masuportaranna ti pamiliana. Nupay kasta, kayat ni Hirohisa nga ad-adu pay ti magapuananna iti ministerio, isu a nag-regular pioneer. Mabalinyo met kadi ti makiraman nga ad-adda pay iti daytoy dinto mauliten a trabaho?
5 “Ti tiempo a nabati ket ababan.” (1 Cor. 7:29) Ikabiltay koma ngarud ti amin a kabaelantayo iti kapatgan a trabaho a maar-aramid ditoy daga itatta—ti panangikasaba iti naimbag a damag ti Pagarian ken panangaramid iti ad-adalan. Daytoy a ministerio ket inyasping ni Jesus iti panagani. (Mat. 9:35-38) Babaen ti naan-anay a pannakiramantayo iti daytoy a panagani, ti bunga ti panagbannogtayo mabalin nga iramannanto ti panangtulong iti maysa nga agbalin a paset ti dakkel a bunggoy dagiti managdaydayaw a nadeskribir idiay Apocalipsis 7:9, 10.