Naan-anay Kadi nga Itungtungpalyo ti Ministerioyo?
1 Iti libro ti Aramid, naibaga kadatayo nga intungpal dagiti adalan ni Jesus ti ministerioda babaen ti panangipaayda iti ‘naan-anay a pangsaksi’ kadagiti tattao. (Ara. 2:40; 8:25; 28:23) Sigurado a dayta ti panggep ni apostol Pablo. (Ara. 20:24) Saan kadi a dayta ti kalatyo kas ministro ti naimbag a damag? Kasanoyo nga aramiden dayta?
2 Isagana ti Presentasionyo: Napateg ti panagsagana tapno masigurado nga epektibo ti panangasabayo. Nangnangruna a kasta no itukonyo dagiti magasin, yantangay kanayon nga agbaliw ti linaonna. Tapno ad-adda a makabalantayo, mangiparang daytoy a ruar Ti Ministeriotayo iti Pagarian iti baro a seksion—ti benneg iti kannigid, a nakailanadan dagiti wagas ti panangitukon kadagiti kaudian a magasin a Pagwanawanan ken Agriingkayo! Maitampok iti tunggal isyu ti naintiempuan a suheto a makaguyugoy iti adu a tattao. Kasanoyo nga usaren dagitoy nga ababa a parang?
3 Mangpilikayo iti singasing nga ammoyo a kaepektibuan iti teritoriayo. Basaenyo a naimbag ti naitampok nga artikulo, ket kitaenyo dagiti espisipiko a punto a manggutugot iti interes. Mangsapulkayo iti naisitar a kasuratan iti magasin a napateg iti pagsarsaritaan ken mabalinyo nga ibasa iti bumalay. Inayonyo ti ababa a pammakada a mangparegta iti dumdumngeg a mangbasa iti magasin ken apagbiit a dakamatenyo, no maitutop, a mabalin ti bumalay nga agdonar iti sangalubongan a trabaho dagiti Saksi ni Jehova. Ita, ensayuenyo ti presentasionyo.
4 Iplanoyo ti Panangusar iti Biblia: No nakapagplanokayo a naimbag, masansan a mabalin a maikalam-ityo ti maysa a kasuratan iti presentasionyo. Kas pagarigan, mabalinyo a tuladen dagiti naballigi nga agibumbunannag iti adu a lugar babaen ti ipapanyo kadagiti ruangan nga adda iggemyo a Biblia, kablaawanyo ti bumalay, ket kunaenyo:
◼ “Salsaludsodanmi dagiti tattao no patienda daytoy . . .” Basaen ti Genesis 1:1, kalpasanna isaludsodyo: “Umanamongkayo kadi kadagita a sasao?” No umanamong ti tao, di kunaenyo: “Kastaak met. Ngem no pinarsua ti Dios amin a bambanag, panagkunayo isu met laeng ti makinggapuanan iti kinadakes?” Kalpasan a mangngeganyo ti sungbatna, basaenyo ti Eclesiastes 7:29. Ukradenyo ti libro a Pannakaammo iti panid 71, ket basaenyo ti parapo 2. Paregtaenyo ti tao a mangbasa iti libro. No saan nga umanamong ti bumalay iti ibagbaga ti Genesis 1:1, gutugotenyo a mangusig iti libro a Creation.
5 Sarungkaranyo ti Amin a Nangipakita iti Interes: Saanyo a naan-anay a maitungpal ti ministerioyo no saanyo a sarungkaran dagiti nangipakita iti interes. No nasayaat ti panagsaritayo, napaimaanyo man iti magasin wenno dadduma a literatura, ilistayo ti nagan ken address ti tao. Siaanep nga ikagumaanyo a patanoren ti interes ti tao babaen ti panagsarungkaryo a dagus. Siempre, itukonyo ti panagadal iti Biblia.
6 Idi umuna a siglo, ammo dagiti adalan a binilin ida ni Jesus a “mangipaay iti naan-anay a pangsaksi.” (Ara. 10:42) Kasta met laeng ti naibilin kadatayo, yantangay dayta ti kakaisuna a wagas a makaaramidtayo kadagiti adalan. (Mat. 28:19, 20) Aramidentayo koma ti amin a kabaelantayo tapno naan-anay a maitungpal ti ministeriotayo.—2 Tim. 4:5.