Mangmangankayo Kadi a Naimbag iti Naespirituan?
1 Ti pampannangantayo apektaranna ti pisikal a pigsa ken salun-attayo. Yantangay kinuna ni Jesus: “Ti tao agbiag, saan nga iti tinapay laeng, no di ket iti tunggal sao a rumrummuar iti ngiwat ni Jehova,” apektarannatay met ti pampannangantayo iti naespirituan, pagimbagan man wenno pagdaksan. (Mat. 4:4) Gapuna, mangmangankayo met laeng kadi a naimbag iti naespirituan? Napilikayo kadi iti taraon? Agap-apurakay kadi a mangan? Wenno pagragsakanyo a nanamen a naimbag ti regular, balanse, ken nasustansia a naespirituan a taraon?
2 Usigenyo ti Pampannanganyo: Mangipapaay ni Jehova iti ‘taraon iti umiso a tiempo’ ken “maysa a bangkete dagiti nataba unay a putahe,” babaen “ti matalek ken masirib nga adipen.” (Mat. 24:45; Isa. 25:6) Tapno naan-anay a mabenepisiaran kadagitoy a naayat a probision, masapul a pagreggetantayo ti mangan a naimbag iti naespirituan.
3 Mabalin a saludsodanyo ti bagiyo: ‘Inaldaw kadi a basbasaek ti teksto ken komento iti aldaw? Inaldaw kadi a basbasaek ti Biblia ken mennamennaek ti mabasbasak? Agsagsaganaak kadi kadagiti gimong ti kongregasion babaen ti nasakbay a panangadal kadagiti material? Nabasak kadin dagiti kaudian a publikasion, agraman Ti Padto ni Isaias—Lawag nga Agpaay iti Sangatauan I?’
4 Inkari ni Jesus: “Naragsak dagidiay sipapanunot iti naespirituan a kasapulanda . . . Naragsak dagidiay mabisin ken mawaw iti kinalinteg, yantangay mapennekdanto.” (Mat. 5:3, 6) Isu a mangankayo a naimbag iti naespirituan babaen ti panangpunnoyo iti panunot ken pusoyo iti pannakaammo iti Dios.