Positibo a Reaksion!
1 Dagiti Kristiano a pamilia iti sadinoman inyebkasda ti nabara nga apresasionda iti video a Young People Ask—How Can I Make Real Friends? Maysa nga ama idiay Estados Unidos ti nagkuna a siuulimek a nagtugaw dagiti babbarona kalpasan a nabuyada dayta—naawatan ken nagustuanda ti tunggal nabuyada iti video! Kuna ti maysa a report manipud Malawi a naawatan ken nagustuan met dayta dagiti agtutubo a kakabsat a lallaki ken babbai agsipud ta mapaspasaranda ti umasping a panangpilit dagiti kapatadanda iti eskuelaan. Maysa nga ama idiay Alemania ti nagkuna maipapan iti video: “Matmatak a sungbat dayta dagiti kararagko.” Maysa a balasitang ti nagkuna: “Agyamanak ta impalagipyo a maseknan ni Jehova kaniak.” Inreport ti maysa a panglakayen idiay New Zealand: “Dayta ti timmulong iti maysa kadagiti agtutubomi nga agsubli iti dalan ti biag.” Maysa a kasado ti nangbuya iti dayta ket kinunana: “Tarigagayak unay a tunggal agtutubo nga adda iti kinapudno mabuyada koma daytoy a video ket matignayda a mangtagikua iti kinapudno!” Dakayo a pamilia, apay a diyo buyaen manen? Kalpasanna, pagsasaritaanyo dagiti sumaganad a saludsod.
2 Introduksion: Ania ti pudno a gayyem?—Prov. 18:24.
3 Tubeng iti Panaggayyem: Kasanoyo a parmeken ti rikna a kasla nailaksidkayo? (Fil. 2:4) Apay a masapul a situtulokkayo a mangpasayaat iti personalidadyo, ken siasino ti makatulong kadakayo a mangaramid iti dayta? Ania ti mamataud kadagiti gundaway tapno maaddaan iti ad-adu a gagayyem, ken sadino ti pakasarakan kadakuada?—2 Cor. 6:13.
4 Pannakigayyem iti Dios: Kasanokayo a maaddaan iti relasion ken ni Jehova, ken apay a napateg nga ikagumaanyo dayta? (Sal. 34:8) Siasino ti kasayaatan a mangpasinged iti pannakigayyemyo iti Dios?
5 Dagiti Saan a Nasayaat a Gagayyem: Siasino dagiti saan a nasayaat a kakadua? (1 Cor. 15:33) Kasano a madadael ti espiritualidad ti maysa a tao gapu kadagiti saan a nasayaat a gagayyem? Ania ti isuro kadakayo ti salaysay ti Biblia maipapan ken ni Dina?—Gen. 34:1, 2, 7, 19.
6 Maysa a Moderno a Drama: Kasano a ti kinaliday inapektaranna ni Tara? Kasanona nga inkalintegan ti pannakitimpuyogna kadagiti nailubongan nga agtutubo? Kadagiti ania a peggad ti nangisagmakanda kenkuana? Apay a saan a nakita dagiti dadakkelna ti peggad a nakaipasanguanna, ngem ania a kababalin ti nangtulonganda kenkuana tapno makaungar iti naespirituan? Kasano a ti maysa a payunir a babai nagbalin a pudno a gayyem ni Tara? Apay a masapul nga ipangag dagiti Kristiano ti Proverbio 13:20 ken Jeremias 17:9? Ania a napateg a leksion ti nasursuro ni Tara?
7 Pangserra: Ania dagiti naadalyo a leksion iti daytoy a video? Kasanoyo nga usaren daytoy a mangtulong iti sabsabali?—Sal. 71:17.