Ti Video a Maikari nga Usigen a Naimbag
1 Sumagmamano a tawenen ti napalabas, maysa nga agtutubo a lalaki ti nakapasar iti saem gapu kadagiti napilina a gagayyem. Kalpasanna, nairuar ti video a Young People Ask—How Can I Make Real Friends? Insuratna: “Nagarubos ti luak bayat ti maulit-ulit a panangbuyak iti video. Agyamanak ken Jehova ta tinulongannak iti umiso a tiempo.” Ti video ti nangtignay kenkuana a mangbalbaliw iti estilo ti panagbiagna ken maaddaan kadagiti nasayaat a gagayyem. Kinunana pay: “Nalawag nga ammo dagiti nangipablaak iti daytoy a video no ania ti mangim-impluensia kadagiti agtutubo.” Dakayo a nagannak ken agtutubo, apay a diyo buyaen manen daytoy a video iti sumaruno a panagadalyo kas pamilia sa pagsasaritaanyo dagiti saludsod kadagiti sumaganad a parapo?
2 Introduksion: Ania ti pudno a gayyem?—Prov. 18:24.
3 Dagiti Tubeng iti Pannakigayyem: Kasanoyo a maparmek ti rikna a kasla maipaspasulikayo? (Fil. 2:4) Apay a masapul a situtulokkayo a mangpasayaat iti kababalinyo, ken siasino ti makatulong kadakayo a mangaramid iti dayta? Kasanokayo a maaddaan iti ad-adu a gagayyem, ken sadino ti pakasarakanyo kadakuada?—2 Cor. 6:13.
4 Pannakigayyem iti Dios: Kasanokayo a maaddaan iti nasingsinged a relasion ken ni Jehova, ken apay a makagunggona ti panangikagumaanyo iti dayta? (Sal. 34:8) Siasino ti kasayaatan a mangpalagda iti pannakigayyemyo iti Dios?
5 Dagiti Saan a Nasayaat a Gagayyem: Siasino dagiti saan a nasayaat a kakadua? (1 Cor. 15:33) Kasano a madadael ti espiritualidad ti maysa a tao gapu kadagiti saan a nasayaat a gagayyem? Ania ti isuro kadakayo ti salaysay ti Biblia maipapan ken ni Dina?—Gen. 34:1, 2, 7, 19.
6 Maysa a Moderno a Drama: Kasano a ti kinaliday inapektaranna ni Tara? Kasanona nga inkalintegan ti pannakitimpuyogna kadagiti nailubongan nga agtutubo? Kadagiti ania a peggad ti nangirubuanda kenkuana? Apay a saan a nadlaw dagiti dadakkelna ti peggad a nakaipasanguanna, ngem kasanoda a nagbalbaliw tapno matulonganda ni Tara a makaungar iti naespirituan? Kasano a ti maysa a payunir a babai nagbalin a pudno a gayyem ni Tara? Apay a masapul nga ipangag dagiti Kristiano ti Proverbio 13:20 ken Jeremias 17:9? Ania a napateg a leksion ti nasursuro ni Tara?
7 Pangserra: Ania dagiti naadalyo iti daytoy a video? Kasanoyo nga usaren daytoy a mangtulong kadagiti sabsabali?—Sal. 71:17.