Dagiti Saksi ni Jehova ti Organisasion iti Likudan ti Nagan

IDI OKTUBRE 6, 1990, immawat iti sorpesa ti agarup 5,000 a tattao a naguummong iti Assembly Hall of Jehovah’s Witnesses idiay Jersey City, New Jersey, E.U.A., maipaay iti tinawen a miting ti Watch Tower Bible and Tract Society. Impakaammo ti tsirman a ni John E. Barr iti tallaong ti pannakairuar ti 55-minuto a video a napauluan Jehovah’s Witnesses​—The Organization Behind the Name. Daytoy ti kaunaan pay laeng a video nga inaramid ti Sosiedad, ngem sigurado a saan nga isu ti maudi.

Ipakita ti video no kasano a naorganisar ti ili ni Jehova a mangpaneknek iti nasantuan a nagan ken mangirakurak iti “naimbag a damag ti pagarian.” (Mateo 24:14) Naitampok ti hedkuarters idiay Brooklyn, Nueva York, ken dagiti pasilidad idiay Watchtower Farms. Nasuroken a 500,000 a kopia iti Ingles ti napataud, ket magun-odan itan (wenno iti mabiiten) iti 26 a dadduma a pagsasao.a

Aniat’ Reaksionda?

Aniat’ reaksion dagiti tao a saan a Saksi ni Jehova iti dayta a video? Nagsurat ti maysa a negosiante:

“Ekselente ti kalidad ti tape. Naawisak nangnangruna iti kinabaltaw ken kinasayaat ti pannakaalana. Malipatak no kua a maysa gayam a tape dayta ket ad-adda nga ipagarupko a maysa a sine. Makatulong la ketdi unay daytoy a tape a mangilawlawag ti panggep ti hedkuartersyo idiay Nueva York. Kablaawankayo iti daytoy naisangsangayan a tape.”​—J. J.

Nagunggonaan dagidiay iyad-adalan iti Biblia dagiti Saksi ni Jehova iti panangbuyada iti dayta a video. Ilawlawag dagiti sumaganad no apay:

“Iyad-adalak iti Biblia ti maysa a baro nga agtawen ti 20 ken ages-eskuela iti unibersidad iti lugarmi. Isut’ maseknan iti kumarkaro a kasasaad iti lubong. Ngem idi nabuyana ti tape ken nakitana dagiti nagsayaat nga agtutubo a kakabsat idiay Bethel nga addaan pudpudno a panggep iti biag, nagbaliw ti intero a kababalinna. Tinabunuanna ti Espesial nga Asambleatayo ket kiniddawna nga agadal iti Biblia a mamindua iti makalawas. Sabali pay nga estudiante ti Biblia, maysa a maestra iti high school, ti nangbulod iti video tapno ipakitana dayta kadagiti kabagianna. Ti ammoda ket nakapuy, saan a nalatak, bassit laeng nga organisasion dagiti Saksi ni Jehova. Napamulenglengda iti sangalubongan a trabahotayo ken iti panagballigitayo, pagyamanan ken Jehova.”​—J. B.

“Di maiyebkas dagiti sao ti rag-o a nariknak idi nagarubos ti lua ti babai nga iyad-adalak iti Biblia gapu iti rag-o ken panangapresiar idi nabuyana ti video. Aglulua a kinunana: ‘Kasano a di makita ti asinoman nga isu daytoy ti organisasion ti pudno a Dios, ni Jehova? Diak pulos ammo idi nga adda gayam kakasta a tattao.’ Sana kinuna: ‘Kayatkon ti agbautisar.’”​—C. D.

“Naballigi ti panangusarmi iti video kadagiti estudiante ti Biblia. Dimmagas idi rabii ti lakay ti maysa kadagiti iyad-adalan ni baketko iti Biblia. Napalalot’ panangbusorna. Binuyana ti video. Kalpasanna nagsalsaludsod ket nagawid nga adda iggemnan a Biblia ken libro iti panagadal ti Biblia a Mabalinyo ti Agbiag nga Agnanayon iti Paraiso a Daga. Pinuoranna idi amin a literatura ti Biblia ni baketna!”​—D. H.

Naay-ayo met dagiti agtutubo iti video, kas ipakita dagiti sumaganad a komento:

“Innem ket kagudua ti tawenko. Magustuak daydiay paset maipapan kadagiti Biblia ken ti napartak a pannakaipasa dagiti kahon.”​—K. W.

“Kinuna dagiti babassit nga annakko a nasaysayaat dayta ngem iti aniaman a programa a nabuyada iti TV.”​—R. C.

“Kalpasan a nabuyana ti video iti namindua, ti limat’-tawenna nga anakmi a lalaki, a kasta unay ti panangipamaysana a nagbuya, insaludsodna: ‘Mabalintay kadi a buyaen daytoy iti inaldaw?’ Simmampitaw ti tallot’-tawenna nga anakmi a babai, ‘Kayatko ti mapan idiay Bethel ken mangaramid kadagiti libro!’”​—M. E.

“Dagiti annakko, da Robin ken Shannan, 12 ken 9 ti tawenda, ulit-ulitenda a buyaen daytoy a tape. Kinuna ti inaudi nga anakko a babai idi nabuyana ti tape, ‘Kaykayatko ti rumuar iti tay-ak ti serbisio. Nakaragragsak.’ Mariknami nga adda direkta nga epekto daytoy a video iti pamiliami. Anian a makapabang-ar a buyaen ti maysa a programa iti telebision a mariknam a natalgedka nga agbuybuya!”​—N. B.

“Ag-13 ¹/₂ ti tawenko. Impabigbig kaniak ti baro a video no kasano a tinagtagilag-anko dagiti nakaskasdaaw a probision ni Jehova. Maysa a pribilehio ti agbalin a maysa kadagiti tattao ti Dios.”​—K. W.

“Sangapulo ket innem ti tawenko, ket tinulongannak daytoy a video a nangpatibker iti panunotko a maysa daytoy a sangalubongan a trabaho a madama a maar-aramid.”​—A. M.

“Kinuna dagiti annakmi a saan unayen a makaay-ayo kadakuada dagiti regular a programa iti TV kas resulta ti pannakabuyada iti pudpudno a teokratiko a paglinglingayan. Pinatibkerna met ti tarigagayda a sumrek iti amin-tiempo a serbisio.”​—L. M.

Uray dagidiay nabayagen a Saksi ni Jehova natignayda met iti nabuyada.

“No dakkel ti epekto ti video kadatayo a tattao ni Jehova, dinto aya dakdakkel ti epekto dayta kadagiti dadduma? No kasta a marigatanak a mangsaranget iti daytoy a sistema, iwayaak no kua a bisitaen ti Bethel idiay salasko!”​—K. B.

“Idi nakitak ti kinaannad ken kinaumiso ti panagtrabahoda, kasla kayatko ti sumrek idiay kuartok ket agepak ti literaturak iti Biblia.”​—L. P.

Paregtaendakay met a mangbuya iti video a Jehovah’s Witnesses​—The Organization Behind the Name. Ipaayannakay dayta iti naidumduma a panangmatmat iti biag ken tulongannakay a maaddaan panagtalek iti natalged a masanguanan.

[Footnote]