Dagiti Alikamen a Makaisuro, Makagutugot, ken Makapabileg
Nabileg dagitoy a pangisuro kadagiti tattao maipapan iti Biblia ken kadagiti Saksi ni Jehova. Adun ti nagutugotda a dumasig a sititibker iti kinapudno. Pinabilegda ti pammati ken apresasion dagiti dedikado a tattao ti Dios. Ania dagitoy? Dagiti video nga inaramid ti organisasion ni Jehova. Nabuyayo kadin amin dagita a sangapulo a video? Kaano ti naudi a panagbuyayo? Us-usarenyo kadi dagitoy iti ministerioyo? Kasanokayo nga ad-adda a mabenepisiaran kadagitoy a nagsayaat nga alikamen?
2 Insingasing ti artikulo a “Regular nga Adalenyo a Sangapamiliaan ti Sao ti Dios” iti Pagwanawanan a Hulio 1, 1999, a “kabayatan ti panagadalyo mabalinyo met ti agbuya iti paset ti maysa kadagiti makaisuro a video ti Sosiedad . . . sayo pagsasaritaan dayta.” Maitunos iti dayta a nasayaat a balakad, maitampok iti Gimong ti Serbisio ti tunggal maysa kadagiti nadumaduma a video iti kada maikadua a bulan. Paregtaenmi ti amin a buyaenda ti video iti pagtaenganda sakbay a mapagsasaritaan dayta iti Gimong ti Serbisio.
3 Iti daytoy a bulan, irugitayo ti umuna a video nga inaramidtayo, ti Jehovah’s Witnesses—The Organization Behind the Name. Buyaenyo ken denggenyo ti sungbat dagitoy a saludsod:
◼ Ania ti kangrunaan a makagapu nga agdindinamag dagiti Saksi ni Jehova?
◼ Nainaig iti ania a teksto ti amin a maar-aramid idiay Bethel?
◼ Ania nga eksena iti Biblia ti nabuyayo a naiparang, naretrato, ken naipinta a mausar kadagiti publikasion?
◼ Ania ti magustuanyo maipapan iti pannakaisagana dagiti literaturatayo?
◼ Manipud idi 1920 agingga idi 1990, mano a kopia dagiti literatura ti nayimprenta ti Sosiedad?
◼ Siasino kadagiti tattao ti Dios ti nangnangruna nga agregget koma nga agbalin a kualipikado nga agserbi idiay Bethel?—Prov. 20:29.
◼ Kadagiti ania a pamay-an a ti pamilia ti Bethel ket nagsayaat a pagwadan para kadagiti amin a Saksi ni Jehova?
◼ Ania ti magustuanyo maipapan iti trabaho a maar-aramid idiay Bethel tapno maidanon ti naimbag a damag iti adu a tattao?
◼ Kasano a masupsuportaran iti pinansial ti sangalubongan a trabaho?
◼ Ania a trabaho ti mabalin a sireregta a suportarantayo, ken buyogen ti ania a kababalin?—Juan 4:35; Ara. 1:8.
◼ Ania ti makunayo maipapan iti organisasion a naipanagan kadatayo?
◼ Kasanoyo a mausar daytoy a video iti ministerio?
Inton Disiembre, repasuentayo ti video a The Bible—Accurate History, Reliable Prophecy.