Ti Video a Jehovah’s Witnesses—Organized to Share the Good News
Nasurok a 100 a tawenen a naorganisar dagiti Saksi ni Jehova tapno iwaragawagda ti naimbag a damag. Iti daytoy kasaknapan pay laeng a kampania a panangasaba ditoy lubong, iwarwaragawagtayo ti naimbag a damag iti ginasut a pagsasao ken iti nasurok a 230 a pagilian. (Mat. 24:14) Apay a napateg daytoy a trabaho? Kasano a maitungtungpal daytoy iti sangalubongan? Ti video a Jehovah’s Witnesses—Organized to Share the Good News sungbatanna dagitoy a saludsod babaen ti detalyado a panangilawlawagna iti adu nga aspeto ti aktibidadtayo iti intero a lubong. Kalpasan ti panangbuyayo iti daytoy a video, sungbatanyo dagiti sumaganad a saludsod.
Kasano a pinarayray daytoy a video ti panangapresiaryo (1) iti panangikagumaan ti organisasion ni Jehova a mangikasaba iti naimbag a damag? (2 Tim. 4:2) (2) kadagiti pamilia ti Bethel iti intero a lubong? (3) iti edukasion a maipapaay kadagiti misionero ken manangaywan? (2 Tim. 2:2) (4) iti kinapateg ti panangusig iti teksto ti Biblia iti inaldaw ken ti linawas a panagsagana kadagiti gimong ti kongregasion? (Ara. 17:11) (5) kadagiti pagsayaatan ti itatabuno kadagiti Nakristianuan a taripnongtayo? (Heb. 10:24, 25) (6) kadagiti bendision a tagiragsakentayo inton agbalin a Paraiso ti daga? (Isa. 11:9) (7) iti pribilehio a makiraman iti trabaho a panagani a maar-aramid ita?—Juan 4:35.
Dakkel ti maitulong daytoy a video tapno maammuan dagiti interesado a tattao ti trabaho nga ar-aramiden dagiti Saksi ni Jehova iti intero a lubong. (8) Kaano ti kasayaatan a panangipabuyatayo iti daytoy a video kadagiti iyad-adalantayo, kadagiti kakabagiantayo, ken kadagiti dadduma? (9) Ania ti napaliiwmo a positibo a reaksion iti panangipabuyam iti daytoy?
No utobentayo dagiti maar-aramidan ni Jehova, matignaytayo met a mangibaga iti kas iti kinuna ti salmista: “Adu a banag ti inaramidmo, O Jehova a Diosko, ti mismo a nakaskasdaaw nga ar-aramidmo ken ti pampanunotmo maipaay kadakami; awan ti maipadis kenka.” (Sal. 40:5) Sapay koma ta usarentayo a naimbag daytoy a video a tumulong kadagiti sabsabali a mangapresiar ken Jehova ken iti organisasionna!