Ti Kasaknapan Pay Laeng a Kampania a Panangasaba Ditoy Lubong!
Nasurok a 100 a tawenen a naorganisar dagiti Saksi ni Jehova tapno iwaragawagda ti naimbag a damag. (1 Cor. 9:23) Iti daytoy kasaknapan pay laeng a kampania a panangasaba ditoy lubong, iwarwaragawagtayo ti naimbag a damag iti ginasut a pagsasao. Ikaskasabatayo daytoy iti nasurok a 230 a pagilian. (Mat. 24:14) Ngem apay a napateg daytoy a trabaho? Ken kasano a maitungtungpal iti sangalubongan?
Ti video a Jehovah’s Witnesses—Organized to Share the Good News sungbatanna dagitoy a saludsod babaen ti detalyado a panangilawlawagna iti adu nga aspeto ti aktibidadtayo iti intero a lubong. Bayat ti panangbuyam iti daytoy, usigem dagitoy a saludsod: (1) Kasano ti pannakaorganisar ken pannakaimaton ti aktibidadtayo? (2) Ania ti akem ti Writing, Translation Services, Art, ken Audio/Video Services Department iti pannakaikasaba ti naimbag a damag? (3) Ania ti panggep ti nasaknap a panagimprenta ken panagipatulodtayo kadagiti literatura? (Juan 17:3) (4) Mano a literatura ti mayim-imprenta iti uneg ti makatawen? (5) Ania ti naibanagen dagiti publikasiontayo a naibatay iti Biblia? (Heb. 4:12) (6) Kasano a maipapaayan iti naespirituan a tulong dagiti bulsek wenno tuleng? (7) Kasano a masupsuportaran iti pinansial a pamay-an ti trabahotayo? (8) Kasanotay a mabembenepisiaran iti trabaho ti Hospital Information Services, ti Service Department, ken ti Convention Department? (9) Kas maysa kadagiti Saksi ni Jehova, kasano a naparayray daytoy a video ti apresasionmo (a) iti panangikagumaan ti organisasion ni Jehova a mangikasaba iti naimbag a damag? (b) iti nasurok a 100 a pamilia ti Bethel iti intero a lubong? (c) iti edukasion a maipapaay kadagiti manangaywan ken misionero? (d) iti kinapateg ti panangusig iti teksto ti Biblia iti inaldaw ken ti linawas a panagsagana kadagiti gimong ti kongregasion? (e) kadagiti pagsayaatan ti itatabuno kadagiti Nakristianuan a taripnongtayo? (f) iti kasasaad iti Paraiso ditoy daga? (Isa. 11:9) (g) iti personal a pannakiraman iti trabaho a panagani a maar-aramid ita?—Juan 4:35.
Ania ti napaliiwmo a positibo a reaksion dagiti kabagiam, am-ammom, sarsarungkaram, ken iyad-adalam iti Biblia idi impabuyam kadakuada daytoy a video? Mabalinmo nga ipabulod daytoy a video ken iranud ti naimbag a damag itan.—Mat. 28:19, 20.