Baro a Video Para iti Panangirugi iti Panangyadal iti Biblia
Umad-adu ti mangbuybuya iti ababa a video a napauluan iti Apay nga Adalem ti Biblia? iti jw.org/ilo. Nairanta daytoy a video a mangtukay iti interes dagiti tattao a mangawat iti libre a panagadal iti Biblia. Mabalinyo a luktan daytoy babaen ti panangi-click-yo iti “Agkiddaw iti Panagadal iti Biblia” iti baba ti home page wenno babaen ti panang-scan-yo iti QR (quick response) code iti likud dagiti baro a tract-tayo. Adtoy ti sumagmamano a pamay-an no kasanotayo a mausar a naimbag ti video.
Iti panagsarungkaryo, ibagayo iti bumalay: “Mabalin kadi nga ipabuyak kenka ti ababa a video a mangilawlawag no kasanom a maammuan ti sungbat dagiti saludsodmo maipapan iti Biblia?” No umanamong, ipabuyayo ti video iti mobile device-yo wenno iti kompiuterna.
No makaipaimatayo iti maysa kadagiti baro a tract bayat ti di pormal wenno publiko a panangasaba, ipakitayo ti QR code ken ibagayo iti kasarsaritayo nga i-scan-na dayta iti mobile device-na. Iti adu a lengguahe, direkta nga iturongnakayo ti QR code iti dayta a video iti Web site-tayo isu a mabalinyo nga i-play a mismo ti video iti mobile device-yo.
Ibagayo kadagiti katrabahuan, kaeskuelaan, kabagian, ken dadduma pay nga am-ammoyo ti maipapan iti video ken saludsodenyo no mabalinyo nga ipabuya dayta kadakuada. Wenno mabalinyo nga i-email ti link ti video, ken ibagam a buyaenda dayta.
No usarentayo a naimbag daytoy a baro a probision, makairugitayo iti ad-adu a panangyadal iti Biblia ken matulongantayo iti naespirituan dagidiay “siuumiso nga agannayas iti agnanayon a biag.”—Ara. 13:48.