Nagunggonaan ti Kinamasindadaanna a Mangyun-una
ADU NGA AGTUTUBO KADAGITI SAKSI NI JEHOVA ti mangipakpakita iti nasayaat nga ulidan iti situtured a panagsaoda maipapan iti pammatida. Amirisem ni Stella, a maysa a tin-edyer a taga Salonika, Grecia. “Iti maysa kadagiti Nakristianuan a gimongmi,” kunana, “napagsasaritaan dagiti pamay-an a mausar dagiti video-tayo tapno matulongan ti sabsabali a mangammo ken Jehova. Nakapanunotak iti pamay-an a mausarko ti video a Jehovah’s Witnesses—The Organization Behind the Name. Kabigatanna, nakisaritaak iti prinsipal ti eskuelaanmi, ket insingasingko a maipabuya ti video iti eskuelaanmi. Nasdaawak ta di nagkedked—no la ket ta umanamong idi dagiti mannursuro.
“Kamalmanna, imbaga kaniak ti prinsipal a mabalin a maipabuya ti video iti sumaganad a lawas—ngem kalpasan laeng ti klase. Naupayak agsipud ta impagarupko a saan nga isakripisio dagiti kaklasek ti nawaya nga orasda tapno agbuya iti video. Nupay kasta, kabigatanna, inawisko ti amin nga agbuya. Saanda laeng nga immannugot no di ket inawisda pay ti sabsabali nga estudiante kadagiti dadduma a klase. Innem a mannursuro—agraman ti maysa a teologo—ti immay met nagbuya iti video.
“Tunggal maysa ket nagbuya a naimbag. Kalpasanna, inawisnak ti prinsipal a mangsungbat kadagiti rimsua a saludsod. Adu nga estudiante ti nasdaaw iti boluntario a trabaho a maar-aramid idiay hedkuarter dagiti Saksi ni Jehova, a naipabuya iti video. ‘Uray no dida masusuelduan, naragsakda nga agtartrabaho!’ kinuna ti maysa nga estudiante.
“Imbagak iti amin a nagbuya maipapan kadagiti publikasiontayo a naibasar iti Biblia. Nagibunongak met iti Kingdom News Num. 36, a ‘Ti Baro a Milenio—Ania a Masakbayan ti Agur-uray Kenka?’ Nagdawat ti prinsipal iti kanayonan pay a kopia nga itedna kadagiti mannursuro a saan a dimmar-ay.
“Kalpasanna, nagsasaritaan ti adu nga aggagayyem nga estudiante ti maipapan iti video. Naragsakanak ta ginundawayak ti nangasaba. Ad-adda itan a raraemendak dagiti kaklasek; ngem ti kapatgan ket raraemendan ti Dios a pagdaydayawak!”