Saludsod

◼ Apay a nasken ti panagannad no mangasabatayo babaen ti koreo?

Ti panangasaba babaen ti koreo ket napaneknekanen nga epektibo a wagas iti panangiranud iti naimbag a damag. Nupay kasta, gapu kadagiti nabiit pay a pasamak iti lubong, nagbalin a naannad dagiti tattao maipapan iti pananglukat kadagiti saan a gagangay a surat. Dagiti sobre a di ammo ti naggapuanda wenno awan ti address ti nagipatulod ket masansan a mapagduaduaan, nangruna no insurat ti ima ken napuskol ti linaonna. Mabalin nga ibelleng ti bumalay ti kasta a surat a dinan luktan. Ania ti mabalintay nga aramiden tapno saan a mapasamak daytoy?

No mabalin, maimakinilia koma ti surat ken ti sobre. Rumbeng a maisurat iti sobre ti nagan ti bumalay. Diyo iturong dagiti surat iti “Bumalay.” Kasta met, ikabilyo a kanayon ti address-yo. No saan a maitutop a makita ti personal nga address-yo, isuratyo ti naganyo ken ti address ti Kingdom Hall. Dikay agipatulod kadagiti surat a di ammo ti naggapuanda. Diyo usaren ti address ti sanga nga opisina.—Kitaenyo ti “Saludsod” iti Nobiembre 1996 a Ti Ministeriotayo iti Pagarian, panid 2.

Dagiti kanayonan a singasing ken pagtuladan a surat ket masarakan iti baro a libro, a Magunggonaan iti Edukasion nga Ipaay ti Teokratiko nga Eskuelaan ti Panagministro, panid 71-3. Dagitoy a pagalagadan ti makatulong kadatayo a mangusar kadagiti surat iti epektibo a pamay-an tapno maidanon kadagiti sabsabali ti naimbag a damag.