Pannakisarita Babaen Dagiti Surat

DAKKEL ti maitulong dagiti sursurat iti biag ken kababalin ti minilion a tattao. Kaaduan kadagiti libro ti Kristiano a Griego a Kasuratan ket sursurat idi damo. Mabalintay itatta ti agsurat tapno mapakired dagiti kabbaro a kapammatian, makidinnamag kadagiti gagayyem, mangparegta kadagiti kakabsat a nangibaklay kadagiti naisangsangayan a responsabilidad, mangpabileg kadagidiay maipaspasango kadagiti pakarigatan, ken mangyallatiw iti impormasion a kasapulan tapno mataming dagiti aktibidad iti kongregasion.​—1 Tes. 1:1-7; 5:27; 2 Ped. 3:1, 2.

Ti panagsurat ket epektibo met a wagas ti panangasaba. Iti dadduma a lugar, adu dagiti agnanaed kadagiti naguardiaan nga apartment wenno kondominium a maiparit ti mangasaba. Dagiti dadduma kaaduanna nga awanda iti pagtaenganda, isu a saantay ida a madanon no mamalaybalaytayo. Adda met dagidiay agnanaed kadagiti naiputputong a lugar.

No dadduma addaka laeng iti balaymo gapu iti sakit, dakes a panniempo, wenno curfew. Mabalinmo ngata a suratan ti kabagiam wenno daydiay datin a nakasaritam iti impormal a pamay-an tapno ituloymo a kasabaan? Immakar kadi ti maysa kadagiti iyad-adalam iti Biblia? Nalabit a ti suratmo ti masapulna tapno agtalinaed a narayray ti interesna iti naespirituan. Wenno nalabit adda maikanatad a Nainkasuratan nga impormasion a mairanudmo kadagidiay kakaskasar, addaan kappasngay nga anak, wenno pimmusay ti ing-ingungotenda.

Panangasaba Babaen ti Surat

No kasabaam babaen ti surat ti tao a dimo pay pulos naam-ammo, iyam-ammom nga umuna ti bagim. Mabalin nga ilawlawagmo a makipaspasetka iti internasional a boluntario a trabaho. No maikanatad, dakamatem a maysaka kadagiti Saksi ni Jehova. Ipakaammom kenkuana no apay a nagsuratka imbes a sinarungkaram a personal. Suratam a kas man la agsasaokayo iti rupanrupa. Nupay kasta, mayannurot iti bilin a “paneknekanyo ti bagbagiyo a naannad a kas kadagiti serpiente ket kaskasdi a nasingpet a kas kadagiti kalapati,” tingitingem a naimbag no kasano ti kaadu ti impormasion nga ibagam maipapan iti bagim.​—Mat. 10:16.

Iramanmo iti surat no ania ti ibagam koma kenkuana no nakasaritam a personal. Mabalinmo a tuladen ti introduksion nga adda iti libro a Panakirinnason wenno usarem ti Nainkasuratan a presentasion iti kabbaro a ruar Ti Ministeriotayo iti Pagarian. Mabalinmo ti mangpataud iti saludsod ket paregtaem nga utobenna dayta. Adda dagiti agibumbunannag nga ibagada laeng nga addaantayo iti libre a programa a mangsungbat kadagiti saludsod a mainaig iti Biblia sada mangdakamat iti sumagmamano a paulo dagiti kapitulo iti maysa kadagiti katulongan iti panagadal nga us-usarentayo. Agparang iti panid 73 ti pagtuladan a surat a pangasaba. Mabalin nga ikkannaka dayta kadagiti ideya, ngem nasaysayaat no baliwbaliwam ti linaonna. Ta no saan, inton agangay, mabalin a maulit-ulit a makaawat dagiti tattao iti agpapada a surat.

Masadut dagiti dadduma a mangbasa iti atiddog a surat a naggapu iti tao a dida am-ammo. Isu a nainsiriban no ababa laeng ti suratmo. Ingudom ti suratmo sakbay a mauma a mangbasa daydiay sinuratam. Maikanatad a mangiragpinka iti nayimprenta nga imbitasion kadagiti gimong iti Kingdom Hall. Mabalinmo ti mangiragpin iti tract, broshur, wenno ruar Ti Pagwanawanan wenno Agriingkayo! ket ilawlawagmo a mabalinna ti regular nga umawat kadagitoy no tarigagayanna. Wenno damagem no mabalinmo a sarungkaran iti pagtaenganna tapno pagtungtonganyo pay ti topiko a napagsaritaanyo.

Palagip Maipapan iti Pakabuklan ti Surat

Imutektekam ita ti pagtuladan a surat. Paliiwem dagitoy: (1) Naurnos, saan a kusokuso ti pannakaisuratna. (2) Uray no maiwagatna ti sobre, addanto pay la kenkuana ti nagan ken address ti nagsurat. (3) Simple ken direkta ti pannakaibaga ti panggep ti surat iti umuna a parapo. (4) Nailawlawag ti tunggal kangrunaan a punto iti kada parapo. (5) Gapu iti panggepna, saan nga impormal wenno pormal unay ti surat.

No mas pormal ti surat, kas ti ipatpatulod ti sekretario ti kongregasion iti sanga nga opisina, mairaman ti nagan ti kongregasion, agraman ti mismo a nagan ti sekretario, ti address-na, ken ti petsana. Masapul met nga agparang ti nagan ken address ti tao wenno organisasion a papanan ti surat. Sarunuen daytoy ti maitutop a pangablaaw. Kas panangingudo iti surat, agparang iti dadduma a lenguahe ti sasao a kas iti “Toy sidadayaw kadakayo” wenno “Toy sipupudno” iti ngatuen ti pirma. Ti mismo a pirma ket masapul nga insurat ti ima.

Iti aniaman a surat, siguraduem nga umiso ti ispeling, gramatika, puntuasion ken, siempre, nadalus koma. No kasta ti aramidem, manayonan ti dignidad ti suratmo ken ti mensahe a linaonna.

Iti ruar ti sobre, ilanadmo a kanayon ti address-mo​—ti us-usarem nga address ti koreo, no mabalbalin. No pagarupem a saan a nasayaat nga ited ti address-mo kadagidiay kasabaam babaen ti surat, damagem kadagiti panglakayen no ipalubosda nga usarem ti address ti Kingdom Hall-yo. Saanmo koma a pulos nga us-usaren ti address ti Watch Tower Society para iti daytoy a panggep, tapno saanda nga ipapan a naggapu ti suratmo iti opisina ti Sosiedad ket mangriro daytoy. No dimo ikabil ti address-mo ket adda nairagpin a literatura, mabalin nga ipapandanto met a ti Sosiedad ti naggapuanna.

Siguraduem nga umiso ti gatad ti selio nga impigketmo, nangruna no nangilukonka iti literatura. No kurang ti seliona ket singirenda ti nangipatulodam, maperdi ti mensahem. Laglagipem nga iti adu a pagilian, nanginngina ti maiselio no adda magasin wenno broshur a mailukon.

Ti Umiso a Tonada ti Surat

Apaman a nalpasen ti suratmo, basaem tapno matingitingmo ti linaonna. Kasano ti pannakayablatna? Nainggayyeman kadi ken nataktika? Iti pannakilangentayo kadagiti dadduma, ikagumaantay nga iparangarang ti ayat ken kinamanangngaasi. (Gal. 5:22, 23) No madlawmo a negatibo wenno saan a makapabileg ti panagsaad ti suratmo, baliwam ti pannakaisaona.

Madanon ti surat dagiti lugar a saanmo a magtengan. Daytoy laengen ket pagbalinenna ti surat a napateg nga instrumento iti ministerio. Tangay ipalnaad ti suratmo no siasinoka ken no ania dagiti banag a napateg kenka, amirisem ti linaonna, ti itsurana, ken ti pannakayebkasna. Nalabit a dayta ti masapul tapno matignay, mapabileg, wenno maparegta ti maysa a napateg a kararua a magna iti dalan nga agturong iti biag.