Panangparang-ay Iti Abilidadtayo Iti Ministerio​—Panagaramid iti Nasayaat a Surat

NO APAY A NAPATEG: Karaman ti libro nga 1 Corinto iti 14 a surat ni apostol Pablo a mangparegta kadagiti padana a Kristiano. No mangaramid iti surat ti maysa a tao, mapilina a naimbag dagiti sasaona ken mabalin nga ulit-uliten a basaen ti umawat iti dayta. Dagiti surat ket nagsayaat a pamay-an tapno makasabaan dagiti kabagian ken am-ammo. Epektibo met dagita tapno makasabaan dagiti saantayo a makasarsarita iti personal. Kas pagarigan, mabalin nga adda nakasaritatayo nga interesado ngem ditay madandanon iti balayda. Mabalin a narigat met a danonen dagiti dadduma iti teritoriatayo gapu ta agnanaedda kadagiti pasdek a nainget ti pannakabantayna, subdibision, wenno kadagiti nasulinek a lugar. Ania ti masapul nga ikabilangantayo no agsurattayo nangnangruna kadagiti ditay am-ammo?

NO KASANO NGA ARAMIDEN:

• 

  Isuratmo no ania koma ti ibagam iti personal. Iyam-ammom ti bagim iti rugi ti surat, ken ilawlawagmo no apay a nagsuratka. Mabalin a mangidatagka iti saludsod a pagpanunotan ti tao sa iturongmo iti website-tayo. Ibagam ti maipapan iti Online Bible Study Lessons, ilawlawagmo ti maipapan iti panangyadaltayo iti Biblia iti pagtaengan, wenno mangdakamatka iti sumagmamano a paulo ti kapitulo manipud iti maysa kadagiti publikasion nga us-usarentayo a pangyadal. Mabalin met a mangiragpinka iti literatura a kas iti contact card, imbitasion, wenno tract

• Ababa laeng koma ti suratmo ta no atiddog unay, baka mauma nga agbasa ti sinuratam.​—Kitaem ti pagtuladan a surat

• Kitaem no adda dagiti kamalina, no nadalus ken nalaka a basaen. Siguraduem a nainggayyeman, nataktika, ken positibo ti suratmo. No masapul nga ibusonmo ti surat, siguraduem nga umdas ti seliona