Mapnekkayo Koman iti Adda Kadakayo
1 Balakadannatayo ti Kasuratan nga ipaaytayo dagiti kasapulan ti sangakabbalayantayo, ngem saan koma a daytoy ti kangrunaan iti biagtayo. Masapul nga iyun-unatayo dagiti naespirituan a banag. (Mat. 6:33; 1 Tim. 5:8) Ti panagbalin a natimbeng ket maysa a karit kadagitoy “napeggad a tiempo a narigat a pakilangenan.” (2 Tim. 3:1) Ania ti tumulong kadatayo nga agbalin a natimbeng?
2 Panangsurot iti Panangmatmat ti Biblia: Ballaagannatayo ti Sao ti Dios a mabalin a makadangran iti naespirituan ti pananggun-od iti kinabaknang. (Ecl. 5:10; Mat. 13:22; 1 Tim. 6:9, 10) Iti daytoy napeggad a panawen, adda pagdaksanna no makumikom unay ti asinoman kadatayo iti panggedan wenno pinansial a pakaseknan nga uray la a maikadua laengen iti biagtayo dagiti naespirituan nga aktibidad a kas iti pannakigimong, panagadal, ken panangasaba. (Luc. 21:34-36) Imbes ketdi, mamalakad ti Biblia: “No adda pagtaraon ken pagkawestayo, mapnektayon kadagitoy a banag.”—1 Tim. 6:7, 8.
3 Di kayat a sawen daytoy a rantaen dagiti Kristiano ti agbalin a napanglaw. Ngem tulongannatayo dayta a mangbigbig no ania a talaga dagiti material a banag a kasapulantayo—taraon, kawes, ken pagtaengantayo. No addan kadatayo dagiti kasapulantayo iti biag, ditay koman tarigagayan ti nanamnam-ay pay a panagbiag. No pampanunotentayo ti gumatang iti maysa a banag wenno mangala iti kanayonan a panggedan, nasken nga isaludsodtayo iti bagitayo, ‘Talaga kadi a kasapulak daytoy?’ Tulongannatay dayta a mangipangag iti daytoy naipaltiing a balakad: “Ti wagas ti panagbiagyo siwayawaya koma iti panagayat iti kuarta, bayat a mapnekkayo iti agdama a bambanag.”—Heb. 13:5.
4 No agtalektayo ken Jehova, tulongannatayo. (Prov. 3:5, 6) Nupay nasken nga igaedtayo ti agtrabaho tapno addaantayo kadagiti inaldaw a kasapulantayo, ditay ipamaysa ti biagtayo kadagita a banag. Bassit man wenno adu ti sanikuatayo, agpannuraytayo ken Jehova nga ipaayna dagiti kasapulantayo. (Fil. 4:11-13) Iti kasta, masagraptayo ti nadiosan a pannakapnek agraman ti adu a dadduma pay a bendision.
5 Tuladenyo ti Pammati Dagiti Sabsabali: Maysa nga agsolsolo nga ina a nangpadakkel iti balasangna iti kinapudno ti in-inut a nangpasimple iti panagbiagna. Nupay komportable unay ti pagtaenganna, immakar iti bassit a balay ket idi agangay iti maysa nga apartment. Nakissayanen ti oras a busbusbosenna iti trabahona, isu nga ad-adun ti panawenna iti ministerio. Idi nataenganen ken nakiasawan ti anakna, nasapa a nagretiro ti ina, nupay kaipapanan daytoy nga ad-adda pay a bimmassit ti maurnongna. Pito a tawenen nga agserserbi kas regular pioneer daytoy a kabsattayo ket saanna a pinagbabawyan ti panangisakripisiona kadagiti material a banag tapno mayun-unana iti biagna dagiti interes ti Pagarian.
6 Adu a tawen a nagpayunir ti maysa a panglakayen ken ti asawana bayat a mangpadpadakkelda iti tallo nga annak. Kas pamilia, nasursuroda ti mapnek kadagiti kasapulanda imbes a gun-odenda dagiti kayatda. Kinuna ti kabsat: “Pinagbalinmi nga ad-adda a simple ti panagbiagmi. Nupay adda dagiti tiempo a marigatankami, kanayon nga ipapaay ni Jehova dagiti kasapulanmi. . . . No makitak ti pamiliak a mangyun-una kadagiti naespirituan a banag, ammok nga umiso ti ar-aramidenmi, ket mapnekak iti dayta.” Innayon ti asawana: “No makitak nga okupado [ni lakayko] kadagiti naespirituan a banag, mariknak ti nauneg a pannakapnek.” Maragsakan met dagiti annakda iti pangngeddeng dagiti dadakkelda nga agserbi ken Jehova iti amin a tiempo.
7 Kadagiti amin a mangipangpangruna iti nadiosan a debosion imbes a dagiti material a banag, inkari ti Biblia ti aglaplapusanan a bendision agpadpada ita ken iti masanguanan.—1 Tim. 4:8.