Mabalin a Maaddaanka iti Kinabaknang!
1. Apay nga usigem no mabalinmo ti agserbi kas regular pioneer?
1 Kayatmo kadi a naragragsak ken ad-adda a makapnek ti biagmo? Kaay-ayo ken kapkapnekam kadi ti tumulong kadagiti sabsabali? Kayatmo kadi nga ad-adu pay ti maaramidam iti panagserbim ken Jehova? No wen ti sungbatmo iti aniaman kadagitoy a saludsod, mabalin a makapagserbika kas regular pioneer. Nupay kasta, nasken nga ikabilangam ti pamiliam ken ti dadduma pay a Nainkasuratan nga annongem, kasta met ti salun-at ken pisikal a limitasionmo.
2. Mangdakamatka iti sumagmamano a naespirituan a kinabaknang a matagiragsak dagiti regular pioneer.
2 Ti impaltiing ti Dios a surat ni Solomon innaigna ti pamendision ni Jehova kadagiti material a kinabaknang. (Prov. 10:22) Iti kaaldawantayo, ti pamendision ni Jehova ket nangnangruna a mangyeg iti naespirituan a kinabaknang. Aglaplapusanan dagiti regular pioneer kadagiti kasta a kinabaknang. Kas pagarigan, addaanda iti dakdakkel a ragsak nga itden ti panangted kadagiti sabsabali bayat a ‘gatgatangenda ti nainggundawayan a tiempo’ manipud kadagiti personal a banag. (Col. 4:5; Ara. 20:35) Ammo ken ap-apresiaren ni Jehova ti naayat a trabahoda. Saan a pulos a bumaba ti pateg dagiti kasta a “gameng idiay langit.” (Mat. 6:20; Heb. 6:10) Malaksid iti dayta, ad-adda a tumibker ti relasion dagiti payunir kenni Jehova bayat a tagtaginayonenda ti ‘simple a mata’ ken agtalekda kenkuana nga ipaayna dagiti kasapulanda.—Mat. 6:22, 25, 32; Heb. 13:5, 6.
3. Ania ti nagdumaan ti pananggun-od iti naespirituan a kinabaknang ken ti pananggun-od iti material a kinabaknang?
3 Ti pananggun-od kadagiti material a kinabaknang ket masansan a mangituggod iti “adu a minamaag ken makapasakit a tartarigagay.” (1 Tim. 6:9, 10; Sant. 5:1-3) Naiduma unay dayta iti bendision ni Jehova. Gapu ta adu nga oras ti busbusbosen dagiti regular pioneer iti ministerio, mapagtalinaedda a natimbeng ti espiritualidadda ken maipamaysada ti atensionda kadagiti napatpateg a banag. (Fil. 1:10) Adda kabsat a lalaki a nagikkat iti makaibus iti tiempo a trabahona kas inheniero tapno makapagpayunir. Kinunana: “Makabannog ti sekular a trabahok ngem ti panagpayunir ket saan. Matultulongak itan dagiti tattao ken maisursurok kadakuada ti kinapudno. Ad-adda a makapnek ken makapainteres unay daytoy.”
4. Kasano a nabendisionan dagiti regular pioneer bayat a mangiranranudda iti bendision kadagiti sabsabali?
4 Bendision Kadagiti Sabsabali: Iti kaaldawantayo, maipaspasango ti tunggal maysa kadagiti “napeggad a tiempo a narigat a pakilangenan.” (2 Tim. 3:1) Kasapulan unay dagiti tattao ti maipaayan iti namnama. Maayatan dagiti manangiwaragawag iti Pagarian no dagiti tattao nga awanan iti namnama ket matulonganda nga agsursuro ken mangipangag iti naimbag a damag. Anian a nagdakkel a ragsak ti itden dayta kadagiti regular pioneer a mangbusbusbos iti nasurok a 800 nga oras iti kada tawen iti daytoy makaispal-biag a trabaho!—1 Tim. 4:16.
5, 6. Ania ti makatulong kenka nga agserbi kas regular pioneer?
5 Pinampanunotmo kadin a naimbag ti agserbi kas regular pioneer? Mabalin nga agkalikagum dayta iti ‘pananggatang iti nainggundawayan a tiempo’ manipud kadagiti saan unay a napateg a bambanag. (Efe. 5:15, 16) Adu ti nangaramid iti dayta ken pinasimpleda ti biagda isu a basbassiten ti tiempo a pananggedda tapno ad-adu nga oras ti busbosenda maipaay kadagiti interes ti Pagarian. Kabaelam kadi nga urnosen ti eskediulmo tapno makapagpayunirka met?
6 Agkararagka a dumawat ken Jehova iti sirib tapno makaaramidka iti praktikal nga eskediul. (Sant. 1:5) Ania dagiti bendision a kasukatna no aramidem dayta? Nawadwad a naespirituan a kinabaknang! Bendisionannaka pay ni Jehova babaen ti panangipaayna kadagiti material a kasapulam. (Mat. 6:33) Dagidiay mangsubok ken Jehova no iti daytoy a banag umawatda iti “bendision agingga nga awanen panagkasapulan.”—Mal. 3:10.