Baro a Programa ti Asamblea Sirkito
1 Tapno sititibker a makapagtakder iti pammati iti nariribuk a lubong, masapul nga agtalektayo ken Jehova. Kasano a maipakitatayo ti kasta a panagtalek iti inaldaw a panagbiagtayo? Kasano a ti panagtalek ken Jehova apektaranna ti biagtayo kas indibidual ken kas kameng ti pamilia? Kasano a matulongannatayo dayta a mangsaranget iti impluensia ti lubong ni Satanas? Ti programa ti asamblea sirkito iti tawen 2003 sungbatanna dagitoy a saludsod. Napauluan dayta iti “Agtalek ken Jehova ket Agaramid iti Naimbag.”—Sal. 37:3.
2 Agtalektayo ken Jehova saan laeng a kadagiti espesial nga okasion wenno kadagiti tiempo ti pakasapulan. Apektaranna ti amin nga aspeto ti inaldaw a panagbiagtayo. Maipaganetget daytoy iti panglukat a palawag, “Agtalekkayo ken Jehova iti Amin a Tiempo.” (Sal. 62:8) Ti uppat a paset ti simposium a napauluan “Panangipakita iti Panagtalek ken Jehova” ibatadna kadatayo no kasano ti agsapul ken mangyaplikar kadagiti naibatay-Biblia nga impormasion a makatulong kadatayo a mangbangon iti naballigi a panagasawa, mangsolbar kadagiti parikut a tumaud iti uneg ti pamilia, ken mangpennek kadagiti material a kasapulantayo.
3 Ikagkagumaan ti lubong ni Satanas nga ipasagepsep kadatayo ti ballikug a panangmatmat no ania ti naimbag ken dakes ken mamataud iti pannakariro no ania ti ipangpangrunatayo. (Isa. 5:20) Dagiti palawag nga “Agannad Kadagiti Ubbaw a Bambanag iti Biag” ken “Liklikan ti Dakes—Managaramidkayo koma iti Naimbag,” pabilgenna ti determinasiontayo a mangitandudo kadagiti nangato a pagalagadan ni Jehova.—Amos 5:14.
4 Inton pagpatinggaen ni Jehova ti agdama a dakes a sistema ti bambanag, dagiti adipen ti Dios nasken nga agtalekda a naan-anay kenkuana. Naitampok daytoy iti palawag publiko, “Asidegen ti Pannakaispal Manipud iti Rigat iti Lubong.” Kalpasan dayta, maawistayo a mangusig iti bagbagitayo iti palawag a napauluan “Maibilangkayto Kadi a Maikari iti Pagarian ti Dios?” Maingudo ti programa babaen ti balakad nga “Agtalekkayo Kadagiti Kari ni Jehova.”
5 Ti maysa kadagiti tampok iti tunggal asamblea isu ti palawag iti bautismo. Asinoman nga agtarigagay nga agpabautisar nasken a pakaammuanda ti mamangulo a manangaywan iti kabiitan a panawen tapno maaramid dagiti kasapulan nga urnos.
6 Kadagitoy di natalged a tiempo, ni Jehova ti kakaisuna a napaypayso a gubuayan ti kompiansa ken kinatalged. (Sal. 118:8, 9) Sapay koma ta amintayo pabilgentayo ti panagtalektayo kenkuana babaen ti itatabuno iti intero a programa ti asamblea sirkito.