Ar-aramidenyo Kadi ti Pasetyo Tapno Magupgop ti Umiso a Report?
1 Adu a salaysay ti Biblia ti naglaon kadagiti espesipiko a bilang, a tumulong iti nalawag a pannakailadawan ti maysa a pasamak. Kas pagarigan, pinarmek ni Gideon ti kampo dagiti Midian babaen laeng ti 300 a lallaki. (Uk. 7:7) Pinapatay ti anghel ni Jehova ti 185,000 nga Asirio a soldado. (2 Ar. 19:35) Idi Pentecostes 33 K.P., agarup 3,000 ti nabautisaran, ket di nagbayag kalpasanna, dimmakkel ti bilang dagiti manamati iti agarup 5,000. (Ara. 2:41; 4:4) Nalawag kadagita a salaysay a dagiti nagkauna nga adipen ti Dios pinagreggetanda nga inurnong ti kompleto ken umiso a rekord.
2 Bilinennatayo ti organisasion ita ni Jehova a binulan nga ireporttayo dagiti nagapuanantayo a nangasaba. Epektibo a maiwanwan ti trabaho a panangasaba no simamatalek a makitunostayo iti daytoy nga urnos. Dagiti report ti mabalin a mangipakita no ania nga aspeto ti ministerio ti agkasapulan iti atension wenno no ania a teritoria ti agkalikagum iti kanayonan a trabahador. Iti kongregasion, dagiti report iti tay-ak ti serbisio ket tumulong kadagiti panglakayen a mangammo no siasino dagidiay mabalin a maikkan iti dakdakkel a pribilehio wenno no siasino ti agkasapulan iti tulong. Ken makapabileg iti intero a timpuyog dagiti Kristiano dagiti report maipapan iti panagrang-ay ti trabaho a panangikasaba iti Pagarian. Ar-aramidenyo kadi ti pasetyo tapno magupgop ti umiso a report?
3 Ti Personal a Responsabilidadyo: Iti ngudo ti bulan, marigatankayo kadi a manglagip no ania ti nagapuananyo iti ministerio? No kasta, apay a diyo irekord dagiti nagapuananyo tunggal mangasabakayo? Dadduma ti agusar iti kalendario wenno diary. Adda dagidiay mangitugot iti blanko a pagreportan. Iti ngudo ti bulan, itedyo a dagus ti reportyo iti manangaywan iti panagadal iti libro ti kongregasionyo. Wenno no kayatyo, ipisokyo ti reportyo iti kahon ti report iti Kingdom Hall. No nalipatanyo ti nagreport, kasaritayo a dagus ti manangaywan iti panagadal iti libro ti kongregasionyo imbes nga urayenyo a dakayo ti asitganna. No silalagipkayo a mangireport iti nagapuananyo, ipakpakitayo a raraemenyo ti urnos ni Jehova ken siaayat a maseknankayo kadagiti kakabsat a nadutokan a mangkolekta ken mangkuenta kadagiti report.—Luc. 16:10.
4 Ti Akem ti Manangaywan iti Panagadal iti Libro: Kas iti maysa nga alerto ken nasiput a pastor, ti manangaywan iti panagadal ti libro paginteresanna ti nagapuanan ti grupona iti makabulan. (Prov. 27:23) Ammona no ti tunggal agibumbunannag ket addaan iti regular, makapnek, ken naragsak a pannakiraman iti panangasaba ken napartak a mangitukon iti tulong no adda asinoman a di nangasaba iti intero a bulan. Masansan a ti kasapulan laeng ket makaparegta a sasao, praktikal a singasing, wenno awis a makikadua kenkuana a mangasaba.
5 Iti ngudo ti bulan, ti manangaywan iti panagadal ti libro siguraduenna a nagreport ti amin a kameng ti grupona tapno maipatulod ti sekretario ti umiso a report ti kongregasion iti sanga nga opisina a di naladladaw ngem iti maikainnem nga aldaw ti sumaruno a bulan. Bayat nga umas-asideg ti ngudo ti bulan, nasaysayaat no palagipanna ti grupo ken mangikabil iti porma a pagreportan iti lugar a pagad-adalan ti grupo. No adda dagidiay managliplipat a mangireport ti nagapuananda, mabalinna nga ipaay dagiti maiparbeng a pammalagip ken pammaregta.
6 No dagus nga ireporttayo dagiti nagapuanantayo iti tay-ak ti serbisio, tumulong dayta iti pananggupgop iti umiso a report a mangipakita no ania a talaga ti nagapuanan iti tay-ak. Aramidenyo kadi ti pasetyo babaen ti dagus a panangireport iti nagapuananyo iti kada bulan?