Mangasaba ken Naan-anay a Mangsaksi

¹ Kas “panguluen ken komandante,” sinanay ni Jesus dagiti adalanna para iti dakkel a trabaho a panangasaba nga agur-uray kadakuada. (Isa. 55:4; Luc. 10:1-12; Ara. 1:8) Maipapan iti impaannong ni Jesus kadakuada, kinuna ni apostol Pedro: “Imbilinna a mangasabakami kadagiti tattao ken mangipaay iti naan-anay a pangsaksi nga isu daytoy ti Maysa nga inkeddeng ti Dios nga agbalin nga ukom dagiti sibibiag ken dagiti natay.” (Ara. 10:42) Ania ti kaipapanan ti naan-anay a panangsaksi?

² Adu ti masursurotayo no usigentayo ti inaramid ni apostol Pablo. Idi nakipagkita kadagiti lallakay iti kongregasion sadi Efeso, impalagipna kadakuada: “Saanko a minedmedan ti panangibaga kadakayo ti aniaman kadagiti banag a makagunggona wenno uray ti panangisuro kadakayo iti publiko ken iti binalaybalay. Ngem naan-anay a nangsaksiak agpadpada kadagiti Judio ken kadagiti Griego maipapan ti panagbabawi iti Dios ken ti pammati ken Apotayo a Jesus.” Nupay naipasango a mismo kadagiti suot, inkagumaan ni Pablo nga inranud ti naimbag a damag kadagiti amin aginggat’ mabalin. Saan a napnek iti basta panangiranudna kadagiti pagdamdamuan a kinapudno kadagiti sabsabali, no di ket inkagumaanna nga impakaammo ti “isuamin a pammatigmaan ti Dios.” Tapno maaramidna dayta, situtulok nga impakatna ti amin a kabaelanna ken nagsakripisio. Kinunana pay: “Diak ilalaen ti kararuak a kas napateg kaniak, maturposko la ketdi ti tarayek ken ti ministerio nga inawatko ken Apo Jesus, tapno naan-anay a mangsaksiak iti naimbag a damag ti di kaikarian a kinamanangngaasi ti Dios.”​—Ara. 20:20, 21, 24, 27.

³ Kasanotay a matulad ita ni Pablo? (1 Cor. 11:1) Babaen ti panangbirok kadagiti maikari a sangakabbalayan uray no maipasangotayo a mismo kadagiti suot, babaen ti panangikagumaan a mangidanon iti naimbag a damag kadagiti tattao uray ania ti puli ken pagsasaoda, ken babaen ti siaanep a panangtulong kadagiti interesado. (Mat. 10:12, 13) Kalikaguman daytoy ti panawen, panagregget, ken panagayat kadagiti tattao.

⁴ Makapagserbika Kadi kas Auxiliary Pioneer? Maipaayandaka ti bulan ti Marso, Abril, ken Mayo iti nasayaat a gundaway a mangsaksi a naan-anay babaen ti panag-auxiliary pioneer. Anian a makaparegta a makita a nagadu dagiti nangikagumaan a nag-auxiliary pioneer idi napan a tawen!

⁵ Adda maysa a sister a 80 ti tawenna ken adu ti saksakitenna a naparegta gapu iti pammabileg ti organisasion ni Jehova. Insuratna: “Natukay ti tarigagay a nabayagen nga adda iti pusok, ket nariknak a masapul nga ag-auxiliary pioneer-ak iti uray maminsan pay.” Inkeddengna ti agpayunir iti Marso. Kinunana: “Nagtugawak nga umuna ket tiningitingko dagiti bambanag. Imbagak dayta iti balasangko agsipud ta masapulko ti tulongna. Sinorpresanak babaen ti panagpayunirna a mismo.” Iti bulan ti Marso, nakabusbos daytoy baketen a kabsat iti 52 nga oras iti ministerio. “Namin-adu nga inkararagko ken Jehova a pabaruenna ti pigsak no mariknak a kumapkapsutak. Iti ngudo ti bulan, naragsakan ken napnekak unay, ket namin-adu a nagyamanak ken Jehova gapu iti panangtulongna kaniak. Kayatko ti agpayunirto manen.” Ti naragsak a kapadasanna maparegtana met dagiti dadduma a pudno nga agtarigagay nga ag-auxiliary pioneer iti laksid dagiti nakaro a parikut iti salun-at.

⁶ Idi di ninamnama a naikkat iti trabahona ti maysa a kabsat, ginundawayanna ti nag-auxiliary pioneer. Iti bulan a panagpayunirna, ad-adda a rimmayray ti regtana a mangasaba, ket iti ngudo ti bulan, naaddaan iti baro nga iyadalan iti Biblia. Maipapan iti kapadasanna, kinunana: “Anian a makagunggona dayta a bulan!” Napalaus ti ragsakna gapu iti pannarabay ken tulong ni Jehova! Wen, imbukbok ni Jehova kenkuana ti nabaknang a bendision gapu iti naisangsangayan a panangikagumaan daytoy a kabsat iti ministerio, ket sigurado a bendisionannakanto met.—Mal. 3:10.

⁷ Para kadagiti adu, saan a nalaka ti ag-auxiliary pioneer. Nupay kasta, iti baet dagiti pagrebbenganda iti panggedan ken pamilia agraman dagiti personal a problemada, adu a kakabsat ti nakapagpayunir. Ti naan-anay a panangsaksi masansan a kaipapananna ti panangisakripisio iti napateg a panawen ken pigsatayo, ngem awan ti kaasping dagiti bendision nga itdenna.—Prov. 10:22.

⁸ Nagsayaat a bulan ti panag-auxiliary pioneer ti Marso, Abril, ken Mayo. Adda lima a ngudo ti lawas ti Marso ken lima a Sabado iti Mayo. Maysa pay, awan ti klase kadagitoy a bulan. No gundawayanda dagiti ekstra a ngudo ti lawas ken piesta opisial ken mangasabada iti rabii ti dadduma nga aldaw, mabalin a makapag-auxiliary pioneer ti dadduma kadagidiay agmalmalem nga adda iti trabahoda. Tapno mayeskediulmo ti 50 nga oras iti Marso, Abril, wenno Mayo, apay a dimo usaren ti maysa kadagiti pagtuladan nga eskediul ti panag-auxiliary pioneer a naipasurot iti daytoy nga artikulo? Ibagam kadagiti dadduma ti maipapan iti eskediulmo; awan duadua a maparegta dagiti dadduma a kumadua kenka iti ministerio. No saanka a makapag-auxiliary pioneer, mangaramidka iti espesipiko a kalat kadagita a bulan, ken makipagtrabahoka kadagidiay makapagpayunir. Agplanoka itan tapno ad-adu ti tiempom a mangasaba inton Marso, Abril, ken Mayo.

⁹ Panangapresiar iti Memorial: Kada tawen iti panawen ti Memorial, ti panagyamanda iti subbot ti mangtignay kadagiti rinibu a ‘manggatang iti tiempo’ nga ag-auxiliary pioneer. (Efe. 5:15, 16) Iti Pilipinas idi napan a tawen, 9,515 ti nag-auxiliary pioneer idi Marso, 15,458 idi Abril, ken 12,652 idi Mayo. Agpromedio dayta iti 12,542 iti tunggal maysa kadagitoy tallo a bulan. Idiligmo dayta iti promedio a bilang a 1,691 a nag-auxiliary pioneer iti tunggal maysa kadagiti napalabas a bulan ti tawen serbisio. Ti panawen ti Memorial ita a tawen ket maysa manen a nagsayaat a gundaway tapno maipakitatayo ti naimpusuan a panangapresiar iti daton a pangsubbot ni Kristo babaen ti ad-adda pay a pannakiramantayo iti ministerio iti tay-ak.

¹⁰ Bayat nga umad-adani ti Abril 16, utobem no ania ti kaipapananna kenka ti Memorial. Panunotem dagiti pasamak a nangiturong iti ipapatay ni Kristo ken dagiti banag a pakaseknanna unay idi. Utobem met ti rag-o nga agur-uray idi ken ni Jesus ken no kasano a nakatulong dayta kenkuana a mangibtur iti pannakairurumen. Panunotem ti agdama a saadna kas Ulo ti kongregasion, nga imatmatonanna ti trabaho a panangasaba ken panagaramid kadagiti adalan. (1 Cor. 11:3; Heb. 12:2; Apoc. 14:14-16) Kalpasanna, ipakitam ti panagyamanmo iti amin nga inaramid ni Kristo babaen ti naan-anay a pannakiramanmo iti trabaho a panangasaba aginggat’ ipalubos ti kasasaadmo.

¹¹ Paregtaem Dagiti Sabsabali a Mangsaksi a Naan-anay: No ag-auxiliary pioneer-da, adda dagiti panglakayen ken ministerial nga adipen iti nasayaat a kasasaad a mangparegta kadagiti dadduma. No kaduada a mangasaba dagiti agibumbunannag ken no sarungkaranda ida, addaanda iti nasayaat a gundaway a tumulong a mismo kadagiti dadduma a makiraman a naan-anay iti daytoy naisangsangayan a trabaho. Sapay koma ta ikararagtayo amin daytoy a banag, iti kasta bumileg ti nagkaykaysa a panangikagumaantayo a mangsaksi a naan-anay.

¹² Nupay makikooperar dagiti amin a panglakayen ken ministerial nga adipen kadagiti urnos ti kongregasion para iti naganetget nga aktibidad iti bulan ti Marso, Abril, ken Mayo, ti manangaywan iti serbisio ti nangnangruna a maseknan a mangaramid kadagiti maitutop nga urnos iti panangasaba. Iyurnosna dagiti pakaangayan ti taripnong sakbay a mangasaba, dagiti aldaw, ken oras a kombeniente kadagiti kaaduan nga agibumbunannag ken kanayon nga ipaanunsiona dagitoy. Mabalin a saan la a mammaminsan a maaramid ti panagtataripnong iti maysa nga aldaw tapno maipaayan dagiti amin iti kongregasion iti gundaway a makiraman iti nadumaduma a wagas ti panangasaba. Nalabit karaman kadagitoy ti panangasaba kadagiti pagnegosiuan, lansangan, panagbalaybalay, panagsarungkar, ken panangasaba babaen ti telepono. Maysa pay, siguraduenna nga adda umdas a literatura, magasin, ken teritoria kadagita a bulan.

¹³ Maitukon inton Marso ti libro a Pannakaammo, nga addaan kalat a makairugi kadagiti panangyadal iti Biblia. Nagparang iti suplemento ti Mayo 2002 a Ti Ministeriotayo iti Pagarian dagiti nasayaat a singasing iti panangitukon iti libro a Pannakaammo. Inton Abril, maitukon ti magasin a Pagwanawanan ken Agriingkayo! Padasem nga usaren dagiti naisingasing a presentasion nga agparang iti “No Ania ti Ibagayo Maipapan Kadagiti Magasin.” Rumbeng nga agsagana a naimbag ti tunggal maysa tapno makaipaay iti naan-anay a pammaneknek.

¹⁴ Anian a ragsaktayo nga agtrabaho iti sidong ti panangiturong ti Ulo ti kongregasion, ni Kristo Jesus, ken maaddaan iti pribilehio a mangiranud iti naimbag a damag kadagiti sabsabali! Bayat nga umad-adani ti bulan ti Marso ken Abril, ikagumaantayo manen a pagbalinen dagita a kasayaatan a bulan bayat a tungpalentayo ti bilin ni Kristo a mangasaba ken mangsaksi a naan-anay.

[Kahon iti panid 4]

Nadumaduma nga Eskediul ti Panag-Auxiliary Pioneer iti Marso, Abril, ken Mayo 2003

Aldaw Oras

Lunes 1  2  — — 2  —

Martes 1  — 3 — — —

Mierkoles 1  2  — 5 — —

Huebes 1  — 3 — — —

Biernes 1  2  — — — —

Sabado 5 4 3 5 6 7

Domingo 2  2  3 2  2  3

Marso  56 56 54 55 50 50

Abril  50 50 51 53 ​— —​

Praktikal kadi kenka ti maysa kadagitoy nga eskediul?