Naintiempuan a Tulong
1 Idi nabigbig ni apostol Pedro a kasapulan dagiti kapammatianna ti pammabileg, natignay a mangipaay iti naayat a pammalagip ken pammaregta gapu ta maseknan kadakuada. (2 Ped. 1:12, 13; 3:1) Pinaregtana ‘dagidiay nakagun-od iti pammati’ nga itultuloyda ti rumang-ay kadagiti naespirituan a galad tapno saanda nga agbalin “a di aktibo wenno di nabunga maipapan iti umiso a pannakaammo ken ni Apotayo a Jesu-Kristo.” (2 Ped. 1:1, 5-8) Ti panggep ni Pedro ket tulonganna ida a mangsalimetmet a naimbag iti panangayab ken panangpili ni Jehova kadakuada, tapno ‘iti kamaudiananna masarakanna ida a di namulitan ken awan pakapilawanna ken sitatalna.’ (2 Ped. 1:10, 11; 3:14) Para kadagiti adu, naintiempuan a tulong dayta a pammaregtana.
2 Iti kaaldawantayo, kasta met laeng ti pannakaseknan dagiti Kristiano a manangaywan iti ili ti Dios. Kadagitoy “napeggad a tiempo a narigat a pakilangenan,” masapul a makidangadang ti adu nga adipen ni Jehova kadagiti narikut a kasasaad. (2 Tim. 3:1) Gapu kadagiti dumegdegdeg a parikut iti pinansial, pamilia, wenno personal a problema, mabalin a marikna ti dadduma ti kas iti narikna ni David: “Dagiti didigra pinalawlawandak agingga a saanen a mabilang ida. Ad-adu a biddutko ti nangkamakam kaniak ngem iti nabaelak a kitaen; nagbalinda nga ad-adu ngem kadagiti buok ti ulok, ket ti bukodko a puso binaybay-annak.” (Sal. 40:12) Nalabit makapadagsen unay dagitoy a parikut isu a mabaybay-andan dagiti naespirituan a rebbengen ken saandan a makiramraman iti Nakristianuan a ministerio. Ngem nupay marigrigatanda, ‘saanda a linipatan dagiti mismo a bilin ni Jehova.’ (Sal. 119:176) Itan ti umiso a tiempo tapno ipaay dagiti panglakayen ti nasken a tulong kadagita a kakabsat.—Isa. 32:1, 2.
3 Tapno maaramidda daytoy, naparegta dagiti panglakayen a mangaramid iti naisangsangayan a panagregget a tumulong kadagidiay saanen a makiramraman iti trabaho a panangasaba. Madama itan ti napinget a panangikagumaanda a mangaramid iti daytoy ket agtultuloy dayta agingga iti bulan ti Marso. Nakiddaw kadagiti manangaywan ti panagadal iti libro a sarungkaranda dagidiay di aktibo tapno mangitukonda iti naespirituan a tulong. Ti panggepda ket tulonganda dagitoy nga agserbi manen a kadua ti kongregasion. No kasapulan, mabalin a mayurnos ti personal a panangyadal iti Biblia. Mabalin a makiddaw a tumulong ti dadduma nga agibumbunannag. No dakayo ti makiddaw a tumulong, makagunggona unay ti panagreggetyo, nangnangruna no naanus ken naayatkayo a mangparegta.
4 Maragsakantayo amin no agbalin nga aktibo manen ti maysa a kameng ti kongregasion. (Luc. 15:6) Ti panangikagumaantayo a mangparegta kadagiti di aktibo ket pudno nga agresulta iti “sao a naisao iti umiso a tiempona.”—Prov. 25:11.