Diyo Liplipatan Dagidiay Di Aktibo

1. Apay a rumbeng nga ikagumaantayo a paregtaen dagidiay nagbalin a di aktibo?

¹ Adda kadi am-ammoyo a nagbalin a di aktibo? Nalabit insardengnan ti makitimpuyog iti kongregasion ken immikayen. Mabalin a nasarakanyo dayta a tao bayat ti panangasabayo iti binalaybalay. Nasken a laglagipentayo a kabsattayo pay laeng iti naespirituan dayta nga indibidual. Kayattayo a pasingkedan ti ayattayo kenkuana ken tulongantayo nga agsubli iti kongregasion ken iti ‘pastor ken manangaywan kadagiti kararuatayo.’—1 Ped. 2:25.

2. Kasano a makaipaaytayo iti pammabileg iti maysa a nagbalin a di aktibo?

² Ipakitayo a Maseknankayo: Ti ababa nga awag iti telepono wenno isasarungkar ipakitana a silalagiptayo iti daydiay maysa a nagbalin a di aktibo. Ania ti mabalin nga ibagatayo? Mabalin a makapabileg ti basta panangibagatayo iti dayta a tao nga isu ket malaglagiptayo. Pagbalinentayo a makaay-ayo ken makapabileg ti saritaan. (Fil. 4:8) Mabalin a mangdakamattayo iti punto a tinagiragsaktayo iti kalkalpas a gimong. Mabalin met nga awisentayo a tumabuno iti sumaganad a gimong wenno asamblea ken ibagatayo nga ireserbaantayo iti tugaw wenno ikalugantayo.

3. Kasano a nagbalin manen nga aktibo ti maysa a kabsat a babai?

³ Maysa a kabsat a babai a di aktibo iti nasurok a 20 a tawenen ti nasarakan iti maysa a teritoria. Nupay saanna a kayat ti mayadalan iti Biblia, sinarsarungkaran latta ti kabsat a nakasarak kenkuana ken ik-ikkanna kadagiti baro a magasin. Kalpasan ti kombension distrito, ti agibumbunannag inranudna dagiti sumagmamano a tampok ti kombension iti di aktibo a kabsat, ket idi agangay nagbalin manen nga aktibo.

4. Kasano ti panangtratotayo iti maysa a makitimtimpuyog manen babaen ti itatabunona kadagiti gimong?

⁴ No Agsubli ti Di Aktibo: Kasano ti rumbeng a panangtratotayo iti maysa a di aktibo a tumabuno kadagiti gimong? Bueno, kasano ti panangtrato ni Jesus kadagiti adalanna kalpasan ti temporario a panangpanawda kenkuana? Sidudungngo nga inawaganna ida kas “kakabsatko.” Nagtalek ken inikkanna pay ida iti napateg nga annongen. (Mat. 28:10, 18, 19) Di nagbayag kalpasanna, nagbalinda nga okupado a nangiwaragawag iti naimbag a damag nga ‘awanan sarday.’—Ara. 5:42.

5. Mangdakamatkayo kadagiti situasion a masapul a makiumantayo kadagiti panglakayen maipapan iti maysa a di aktibo.

⁵ Nasken nga agpaiwanwantayo kadagiti panglakayen sakbay nga itukonantayo ti panagadal iti Biblia ti maysa a nagbalin a di aktibo wenno sakbay nga awisentayo a kumuyog kadatayo iti ministerio ti nabayagen a di aktibo. No adda makasaritatayo a di aktibo nga agibumbunannag iti teritoriatayo, nasken nga ipakaammotayo kadagiti panglakayen tapno makaipaayda iti kasapulan a tulong.

6. Ania a rag-o ti mapasarantayo no tulongantayo dagidiay di aktibo?

⁶ Kas nalawag nga ipakita ti Biblia, dagidiay laeng makapagtultuloy agingga iti panungpalan isu ti maisalakan. (Mat. 24:13) Ngarud, laglagipenyo dagidiay naitibkol wenno immikay. Mapasarantayo ti rag-o nga itden ti pannakakita kadagidiay mangitultuloy manen a makipagkaykaysa kadatayo iti sagrado a panagserbi no siaanus nga iparangarangtayo ti ayat ni Jehova babaen ti napasnek a pannakaseknan kadakuada.—Luc. 15:4-10.