Saludsod

◼ Maiparbeng pay aya nga iyadalan iti Biblia ti maysa a di aktibo a kabsat no kiddawen dayta ti maysa a miembro ti Service Committee ti kongregasion?

Rebbengen dagiti panglakayen nga ipastoran ti kongregasion, a pakairamanan ti asinoman a miembro a nagbalin a di aktibo. Sarungkaranda dagita ken ammuenda no ania a personal a tulong ti kasapulan. No maiparbeng, ramanen daytoy ti panangipakitada iti pagimbagan ti personal a panagadal iti Biblia iti daydiay di aktibo. Ilawlawag ti Organisado a Mangitungpal ti Ministeriotayo, panid 103, a ti Service Committee ti kongregasion ti mangikeddeng no asino ti mabalin a magunggonaan iti kasta a probision.

Tingitingen ti manangaywan iti serbisio no siasino ti kasayaatan a tumulong, no aniada a tema ti rumbeng nga adalen, ken no ania a publikasion ti makatulong unay. Nalabit nasayaat no ti tumulong ket daydiay dati a nangyadal iti dayta a tao wenno daydiay datin nga am-ammona ken raraemenna. Mabalin a makiddaw iti makabael ken nataengan a sister a tulonganna ti di aktibo a sister. Masansan a saanen a nasken a kaduaen ti sabali nga agibumbunannag daydiay nadutokan a mangyadal. No nadutokan a mangyadal ti maysa nga agibumbunannag, mabalinna nga ireport dayta kas oras, panagsarungkar, ken panangyadal.—Kitaenyo ti Disiembre 1987 a Ministeriotayo iti Pagarian, panid 1 ken 3.

Yantangay nabautisaranen ti mayad-adalan, gagangay a saanen a nasken nga agtultuloy iti naunday a tiempo ti panagadal. Ti kalat ket tulongan ti di aktibo tapno itultuloyna a tabunuan amin dagiti gimong ti kongregasion ken agbalin a regular nga agibumbunannag iti naimbag a damag. Kitaen ti manangaywan iti serbisio ti pagrang-ayan dagita a panagadal. Babaen iti daytoy a naayat a tulong, maibaklay koma dagitoy a kakabsat ti bukodda a responsabilidad iti imatang ni Jehova ken ‘maparamut ken maipasdekda’ iti kinapudno.—Efe. 3:17; Gal. 6:5.