Ania ti Ipangpangrunayo?

¹ Ipagpaganetget ti adu a narelihiosuan nga organisasion ti panangtulong kadagidiay agkasapulan, a kas ti panagibangon kadagiti pasilidad a para iti edukasion wenno medisina. Ngem dagiti Saksi ni Jehova, nupay saanda a liplipatan “ti panagaramid iti naimbag ken ti panangiranud iti bambanag iti sabsabali,” ipangpangrunada ti panangtulong kadagiti tattao iti naespirituan.—Heb. 13:16.

² Ti Padron Idi Umuna a Siglo: Adu ti nasayaat nga inaramid ni Jesus kabayatan ti ministeriona ditoy daga, ngem ti panangsaksina iti kinapudno ti kangrunaan a trabahona. (Luc. 4:43; Juan 18:37; Ara. 10:38) Binilinna dagiti pasurotna a ‘mapanda ket agaramidda iti ad-adalan kadagiti tattao iti amin a nasion, . . . nga isuroda ida.’ (Mat. 28:19, 20) Ken impasimudaagna a dagidiay mangwatwat iti pammati kenkuana aramidendanto a nasaksaknap ti trabaho nga inrugina. (Juan 14:12) Impangpangruna ni Jesus ti trabaho a panangasaba gapu ta dayta ti tumulong kadagiti tattao a mangammo iti dalan a pakaisalakanan.—Juan 17:3.

³ Minatmatan ni apostol Pablo ti trabahona a panangasaba kas maysa a “panagkasapulan,” maysa a bilin a dina mabalin a baybay-an. (1 Cor. 9:16, 17) Situtulok idi a mangisakripisio iti uray ania ken mangibtur iti aniaman a suot wenno rigat a kasapulan tapno maturposna ti ministeriona. (Ara. 20:22-24) Kasta met laeng a kababalin ti impakita ni apostol Pedro ken dagiti kakaduana. Nupay naibalud ken nababautda, “nagtultuloyda nga awan sarday a mangisuro ken mangideklara iti naimbag a damag maipapan iti Kristo, a ni Jesus.”—Ara. 5:40-42.

⁴ Datayo met ngay? Ipangpangrunatayo kadi ti trabaho a panangiwaragawag iti naimbag a damag ti Pagarian ken panagaramid iti ad-adalan? Kas ken Jesus, adda kadi napaypayso a pannakaseknantayo kadagidiay ‘nalalatan ken naiwarawara a kasla karkarnero nga awanan pastor’? (Mat. 9:36) Dagiti agdama a pasamak ditoy lubong ken ti padto ti Biblia nabatad a pasingkedanda a dandanin agpatingga daytoy dakes a sistema! No sipapanunottayo a naimbag iti kinapateg ti trabaho a panangasaba matignaytayo nga agtultuloy a mangasaba a sireregta.

⁵ Tingitingenyo ti Kasasaadyo: Yantangay masansan nga agbaliw ti kasasaad ti tunggal maysa, nasayaat no regular nga usigentayo no mabalintayo ti mangaramid kadagiti panagbalbaliw tapno ad-adu ti maaramidantayo iti trabaho a panangasaba. Adda maysa a sister a dati a regular pioneer idi dekada 1950, 1960, ken 1970 ngem simmardeng gapu iti di nasayaat a salun-at. Ngem idi agangay, simmayaat ti salun-atna. Itay nabiit, tiningitingna manen ti kasasaadna ket nautobna a kabaelanna manen ti agpayunir. Napalalo ti ragsakna a timmabuno iti Pioneer Service School iti edad a 90! Dakayo met ngay? Dandanikayo kadin agretiro wenno aggraduar? Makapagpayunirkayo kadi no agbaliw ti kasasaadyo?

⁶ Idi napaliiw ni Jesus a “nasinga [ni Marta] iti panagasikaso iti adu nga annongen,” siaayat nga insingasingna a dakdakkel ti magunggona ni Marta no pagbalinenna a simple dagiti bambanag. (Luc. 10:40-42) Mapasimpleyo kadi ti estilo ti panagbiagyo? Talaga kadi a kasapulan nga agpada a mangged dagiti agassawa? No adda maaramid a panagbalbaliw, saan ngata nga umdasen a pagbiag ti pamilia ti mateggedan ti maysa laeng a tao? Adu ti nagunggonaan iti naespirituan babaen ti panagaramidda kadagiti panagbalbaliw tapno ad-adu ti maaramidanda iti ministerio.

⁷ Sapay koma ta surotentayo amin ti padron nga impasdek ni Jesus ken dagiti apostol! Masiguradotayo a bendisionan ni Jehova ti napasnek a panangikagumaantayo a makipaset a naan-anay iti nagpateg a trabaho a panangikasaba iti naimbag a damag ti Pagarian.—Luc. 9:57-62.