Ti Nakristianuan a Ministerio—Kangrunaan a Trabahotayo
1 Addaantayo amin iti nagduduma a trabaho a masapul nga aramidentayo. Iparebbeng ti Dios ti panangasikaso iti kasapulan ti pamilia. (1 Tim. 5:8) Nupay kasta, ti trabaho a nainaig iti dayta a pagrebbengan saan koma nga agbalin a napatpateg ngem iti trabaho a panangikasaba iti Pagarian ken panangaramid kadagiti adalan.—Mat. 24:14; 28:19, 20.
2 Nangted ni Jesus iti pagwadan a surotentayo no maipapan iti ‘panangsapul nga umuna iti pagarian.’ (Mat. 6:33; 1 Ped. 2:21) Nupay nanumo ti panagbiagna, impamaysana nga inaramid ti pagayatan ni Amana. (Luc. 4:43; 9:58; Juan 4:34) Inkagumaanna ti nangasaba iti amin a gundaway. (Luc. 23:43; 1 Tim. 6:13) Indagadagna kadagiti adalanna a maaddaanda met koma iti kasta a napasnek a pannakaseknan iti trabaho a panagani.—Mat. 9:37, 38.
3 Panangtulad ken Jesus Ita: Matuladtayo ti ulidan ni Jesus babaen ti panangsalimetmet iti simple a panagbiag a naipamaysa iti Nakristianuan a ministerio. No adda la ket dagiti masapsapultayo iti biag, ipangagtayo ti balakad ti Biblia a ditay umagawa a mangpaadu iti sanikuatayo ditoy lubong. (Mat. 6:19, 20; 1 Tim. 6:8) Anian a nasaysayaat nga amang no ad-adda a gagetantayo ti makiraman iti trabaho a panangasaba! No maipasangotayo kadagiti narigat a kasasaad, aramidentay koma ti amin a kabaelantayo a kas ken Jesus, a ditay ipalubos a ringbawan dagiti pakaringgoran iti biag ti kangrunaan a trabahotayo a panangiwaragawag iti naimbag a damag ti Pagarian.—Luc. 8:14; 9:59-62.
4 Uray dagidiay aduan iti rebbengen, ipangpangrunada ti trabaho a panangasaba. Kastoy ti kuna ti maysa a kabsat nga addaan iti dakkel a pamilia, nangato ti saadna iti trabaho, ken agserserbi a panglakayen iti kongregasion Kristiano: “Ti ministerio ti ibilangko a kangrunaan a trabahok.” Kuna ti maysa a kabsat a babai a payunir: “Adayo a napatpateg ti panagpayunir ngem ti naballigi a sekular a trabaho.”
5 Aniaman ti kasasaadtayo, tuladentay koma ti ulidan ni Jesus. Kasano? Babaen ti panangipangrunatayo iti Nakristianuan a ministerio.