Tuladenyo ni Kristo iti Ministerioyo
1 Nangipasdek ni Jesus iti ulidan a surotentayo iti ministeriotayo. Namin-adu ken nagduduma ti pamay-an a panangipakitana iti nauneg nga ayatna iti Dios ken kadagiti tattao. Insurona ti kinapudno kadagiti napakumbaba ken nangipakita iti naayat a kinamanangngaasi kadagidiay naparigatan ken naidadanes.—Mat. 9:35.
2 Ti Ulidan ken Pannursuro ni Jesus: Saan nga impalubos ni Jesus a ti pannakiraman kadagiti napolitikaan nga aramid wenno iti makunkuna a panangsaranay a makagunggona iti komunidad ti mangsinga kenkuana. Saanna met nga intulok nga agbalin a segundario ti kangrunaan a trabahona gapu laeng kadagiti dadduma pay a banag a saan met a dakes. (Luc. 8:1) Impamaysana nga inkasaba ti naimbag a damag ti Pagarian ti Dios kas ti kakaisuna a permanente a solusion dagiti parikut ti sangatauan. Nagdakkel ti trabaho nga aramiden ni Jesus ngem limitado ti panawenna a mangaramid iti dayta. Kayat dagiti tattao idiay Capernaum nga agtalinaed sadiay ni Jesus, ngem kinunana kadagiti adalanna: “Mapantayo iti sabali pay a lugar . . . tapno mangasabaak met sadiay, ta gapu itoy a panggep a rimmuarak.”—Mar. 1:38.
3 Kalpasan ti panangsanay ni Jesus kadagiti adalanna, imbaonna ida babaen kadagitoy nga espesipiko a bilin: “Mangasabakayo, a kunkunayo, ‘Ti pagarian ti langlangit asidegen.’” (Mat. 10:7) Insurona kadagiti pasurotna nga ipangpangrunada dagiti interes ti Pagarian. (Mat. 6:33) Sakbay nga immuli sadi langit, dagiti maudi a sasao ni Jesus agpaay kadagiti adalanna imbatadna no ania ti aramidenda. Kinunana: “Inkayo ngarud ket mangaramidkayo iti ad-adalan kadagiti tattao iti amin a nasion.”—Mat. 28:19.
4 Ti Pateg ti Pagarian: Ti kangrunaan a topiko nga insarsarita ni Jesus ket ti Pagarian ti Dios, ken indagadagna kadagiti adalanna a surotenda ti ulidanna. Saan nga agballigi ti panagregget dagiti tattao a mangrisut kadagiti parikut ti sangatauan. (Jer. 10:23) Ti laeng Pagarian ti Dios ti mangsantipikar iti nagan ti Dios ken mangipaay iti permanente a bang-ar iti sangatauan. (Mat. 6:9, 10) No isurotayo dagiti kinapudno maipapan iti Pagarian kadagiti tattao nga “agsensennaay ken umas-asug gapu iti amin a nakarimrimon a bambanag a maar-aramid,” maaddaanda iti naragsak, naballigi a biag itan ken masalimetmetanda ti mapagtalkan a namnama iti masanguanan.—Ezeq. 9:4.
5 Agtultuloy a makiramraman ni Jesus iti panangikasaba iti naimbag a damag ti Pagarian ti Dios, ken impanamnamana a tulongannatayo. (Mat. 28:20) No iti ministeriotayo, kasano kasinged ti panangsurottayo iti ulidan nga impasdek ni Jesus agpaay kadatayo? (1 Ped. 2:21) Iti daytoy nagpateg a maudi nga al-aldaw, sapay koma ta aramidentayo ti amin a kabaelantayo a mangsurot a naimbag iti ulidan nga impasdek ni Jesus iti ministerio!