Ti Naimbag-Pannakaurnosna a Kawes Ipakitana ti Panagraem iti Dios
1. Kasanotayo a maipakita ti panagyamantayo iti mapaspasungad a kombension distrito?
1 Din agbayag, tagiragsakentayo ti pribilehio nga agbalin a sangaili ni Jehova iti 2003-2004 nga “Idayawyo ti Dios” a Kombension Distrito. Anian a yamantayo ken ni Jehova ta aw-awisennatayo iti kasta a nabaknang a naespirituan a padaya! Maipakitatayo ti panagraemtayo kenkuana ken ti panagyamantayo kadagiti naespirituan a probisionna babaen ti panagkawkawes ken panaglanglangatayo.—Sal. 116:12, 17.
2. Apay a nasken a nadalus ken naurnos ti panaglanglangatayo?
2 Nadalus ken Naurnos: Ti langatayo iyanninawna koma dagiti pagalagadan ti Diostayo, a nadalus ken naurnos. (1 Cor. 14:33; 2 Cor. 7:1) Rumbeng a nadalus ti bagi ken dagiti kukotayo, naurnos ti buoktayo, ken nadalustayo koma a kitaen. Gagangay itan dagiti di natakneng a panaglanglanga. Ngem nupay ti maysa nga artista wenno atleta ket agkawes iti di nanakman, saan a rason dayta tapno tuladen ti maysa a Kristiano. No sumurottayo iti uso, mabalin a saan a mabigbig dagiti tattao no ania ti nakaidumaan dagidiay agserserbi iti pudno a Dios ken dagidiay saan nga agserserbi kenkuana.—Mal. 3:18.
3. Kasanotayo a masigurado a ti langatayo ket maitunos iti balakad iti 1 Timoteo 2:9, 10?
3 Kawes a Maitutop Kadagiti Kristiano a Ministro: Idi nagsurat ni apostol Pablo iti Kristiano a manangaywan a ni Timoteo, pinaregtana ‘dagiti babbai nga arkosanda ti bagbagida iti naimbag-pannakaurnosna a kawes, buyogen ti kinaemma ken kinasimbeng ti panunot, . . . iti wagas a maitutop kadagiti babbai nga agkunkuna nga agraemda unay iti Dios, awan sabali, babaen iti naimbag nga ar-aramid.’ (1 Tim. 2:9, 10) Tapno masigurado a naimbag ti pannakaurnos ti kawestayo, nasken a kitaentayo a naimbag dayta. Rumbeng a naurnos, nadalus, ken nanakman ti kawestayo—saan a naparammag wenno makagargari.—1 Ped. 3:3.
4, 5. Ania dagiti pakdaar a rumbeng nga ipangag dagiti Kristiano a lallaki ken babbai?
4 Namakdaar pay ni Pablo maipapan iti nalabes nga “estilo a panangsallapid iti buok ken balitok wenno kadagiti perlas wenno nangina unay a lupot.” (1 Tim. 2:9) Ti panagbalin a balanse iti panagusar iti alahas, kolorete, ken dadduma pay nga arkos ket nainsiriban nga aramiden dagiti Kristiano a babbai.—Prov. 11:2.
5 Agaplikar met kadagiti Kristiano a lallaki ti balakad ni Pablo para kadagiti Kristiano a babbai. Dagiti kakabsat a lallaki rumbeng a liklikanda dagiti nailubongan nga estilo. (1 Juan 2:16) Kas pagarigan, iti dadduma a pagilian, uso dagiti kawes a nalawa ken dakkel unay, ngem daytoy nga estilo ket saan a maitutop para iti ministro ti Dios.
6. Apay a nasken a taginayonen ti nangato nga estandarte iti panagkawkawes ken panaglanglangatayo no agbiahetayo a mapan ken agawid manipud iti kombension, bayat ti kombension, ken kalpasan dagiti sesion?
6 Bayat ti Panagaliwaksay: No tumabunotayo iti programa, mapagulidanan ti panagkawkawes ken panaglanglanga ti kaaduan a kakabsat. Nupay kasta, ipakita dagiti report a dagiti dadduma saan a naannad ti panagkawkawesda no agbiaheda a mapan ken agawid manipud iti kombension wenno kadagiti panagaliwaksay kalpasan dagiti sesion. Wen, ti panagkawkawes ken panaglanglangatayo—kabayatan man ti programa wenno iti sabali pay a gundaway—apektaranna ti panangmatmat dagiti dadduma kadagiti Saksi ni Jehova. Tangay nakasuottayo iti badge card iti kombension, kanayon koma nga agkawestayo iti wagas a maitutop kadagiti Kristiano a ministro. Gapu iti daytoy, masansan a padayawandatayo dagiti dadduma ket daytoy ti mangted met kadatayo iti gundaway a mangasaba.—1 Cor. 10:31-33.
7. Ania ti mabalin nga epektona kadagiti dadduma ti naimbag-pannakaurnosna a kawes ken panaglanglangatayo?
7 No kasano a ti nainggayyeman nga isem papintasenna ti rupatayo, ti naimbag-pannakaurnosna a kawes ken langa padayagenna met ti mensahe nga awittayo ken ti organisasion nga itaktakderantayo. Dagiti dadduma a mangpaliiw kadatayo sakbay, bayat, ken kalpasan ti “Idayawyo ti Dios” a Kombension Distrito iti daytoy a tawen, mabalin a matignayda nga agsaludsod no apay a naidumdumatayo ken mabalin a maikunada: “Kumuyogkaminto kadakayo, ta nangngegmi [ken napaliiwmi] a ti Dios adda kadakayo.” (Zac. 8:23) Sapay koma ta tunggal maysa kadatayo ipakitana ti panagraem ken ni Jehova babaen ti panagkawkawes ken panaglanglangatayo.
[Kahon iti panid 5]
Nadayaw Koma ti Langatayo
▪ No agbiahetayo
▪ Iti kombension
▪ Bayat dagiti panagaliwaksay