Saludsod
◼ Ania a panagkawkawes ti maitutop no sumarungkartayo kadagiti pasilidad a maus-usar iti panagdayaw ken Jehova?
Iti intero a lubong, dagiti lugar a nairanta a pagdaydayawan ken Jehova ket dagiti Kingdom Hall, Assembly Hall, pagtaengan a Bethel, ken dagiti pasilidad ti sanga nga opisina. Simple, nadalus, ken naurnos dagita isu a presentable ti buyada. Nagdakkel ti nakaidumaan dagita kadagiti adda iti sistema ti bambanag ni Satanas. Dagidiay bumisita kadagiti lugar a pagdaydayawan ken Jehova masapul nga ipakitada met a kukua ida ni Jehova ken ar-aramidenda ti pagayatanna.
Kas Kristiano, ‘irekomendatayo ti bagbagitayo kas ministro ti Dios’ iti amin a wagas, a pakairamanan ti maitutop ken naurnos a panagkawkawes ken panaglanglanga. (2 Cor. 6:3, 4) Manamnama met a nadayaw ti konduktatayo. Iti amin a kanito, disente ken natakneng koma ti panagkawkawes ken panaglanglangatayo ta maitutop dayta kadagiti adipen ni Jehova a Dios. Nangnangruna a pudno daytoy no sumarungkartayo kadagiti pasilidad ti hedkuarter iti New York kasta met kadagiti sanga nga opisina iti intero a lubong.
Maipapan iti kinapateg ti maitutop a panagkawkawes ken panaglanglanga, kuna ti Organisado a Mangaramid iti Pagayatan ni Jehova a nasken a nadalustayo iti pisikal ken natakneng ti panagkawkawes ken panaglanglangatayo no makiramantayo iti ministerio iti tay-ak ken no tumabunotayo kadagiti gimong iti kongregasion. Kalpasanna, kastoy ti mabasatayo iti panid 138, parapo 3: “Laglagipem a ti nagan a Bethel kaipapananna, ‘Balay ti Dios.’ Gapuna, ti panagkawkawes, panaglanglanga, ken kababalintayo ket kas koma iti mainanama kadatayo no tumabunotayo kadagiti gimong iti Kingdom Hall tapno agdayaw.” Daytoy a nangato a pagalagadan ket masapul a suroten dagiti agibumbunannag iti Pagarian no mapanda bumisita iti Bethel, agnanaedda man iti asideg ti Bethel wenno saan. Iti kastoy a pamay-an, maipakita dagiti bisita ti maitutop nga apresasion ken panagraemda.—Sal. 29:2.
Ti panagkawkawestayo ipakitana koma a datayo dagidiay ‘agkunkuna nga agraem unay iti Dios.’ (1 Tim. 2:10) Ti maitutop a panagkawkawes ken panaglanglanga matulonganna dagiti sabsabali a maaddaan iti positibo a panangmatmat iti pudno a panagdayaw ken Jehova. Nupay kasta, napaliiw a parabogar, saan a naurnos, wenno makagargari ti panagkawkawes ti sumagmamano a kakabsat no bumisbisitada kadagiti pasilidad a maus-usar iti panagdayaw ken Jehova. Iti aniaman a tiempo, saan a maitutop ti kasta a panagkawkawes kadagiti Kristiano. Kas kadagiti amin a dadduma pay nga aspeto ti Nakristianuan a biagtayo, no maipapan iti panagkawkawes ken panaglanglanga, tarigagayantayo met a taginayonen dagiti nangato a pagalagadan a nakaidumaan dagiti adipen ti Dios, nga aramidentayo ti amin a banag nga agpaay a pakaidayawan ti Dios.—Roma 12:2; 1 Cor. 10:31.
Gapuna, rantayo man ti bumisita iti hedkuarter ken iti sanga nga opisina iti New York State wenno iti dadduma pay a pasilidad ti sanga nga opisina, wenno bayat nga addakayo kadagiti lugar a pagpasiaran dagiti turista, isaludsodyo iti bagbagiyo: ‘Ti kadi panagkawkawes ken panaglanglangak iyanninawna ti kinatakneng, kinadalus, ken dignidad ti lugar a pasiarek? Pakaidayawan kadi daytoy ti Dios a daydayawek? Saan ngata a dillawen wenno tagidaksen dagiti sabsabali ti itsurak?’ Babaen ti panagkawkawes ken panaglanglangatayo, sapay koma ta kanayon nga ‘arkosantayo ti sursuro ti Manangisalakantayo, ti Dios, iti amin a bambanag’!—Tito 2:10.